ଅନୁଗୁଳ: କରୋନାଭାଇରସକୁ ନେଇ ଜାରି ହୋଇଥିବା କଟକଣାକୁ ଉଲଂଘନ କରିଥିବା ଅଭିଯୋଗରେ ଅନୁଗୁଳ ଜିଲ୍ଲାରେ ତିନି ଜଣଙ୍କୁ ଗିରଫ କରାଯାଇଛି।
ଗିରଫ ବ୍ୟକ୍ତିଙ୍କ ମଧ୍ୟରୁ ଦୁଇଜଣ ଯଥାକ୍ରମେ ଏକ ମଲ୍ ଏବଂ ଏକ ଅଳଙ୍କାର ଦୋକାନ ଖୋଲିଥିବାବେଳେ ଅନ୍ୟ ଜଣେ ସହରର ଅଖଣ୍ଡାଳମଣି ମନ୍ଦିରରେ ‘ପ୍ରସାଦ’ ସେବା କରୁଥିବା ଦେଖିବାକୁ ମିଳିଥିଲା ବୋଲି ଏସଡିପିଓ ଅଶ୍ୱିନୀ କୁମାର ସାହୁ ସୂଚନା ଦେଇଛନ୍ତି ।
ସବ-କଲେକ୍ଟର ବାସୁଦେବ ସତ୍ୟପାଠୀଙ୍କ ନେତୃତ୍ୱରେ ପୋଲିସର ଏକ ଟିମ୍ ସେମାନଙ୍କୁ ଗିରଫ କରିଥିଲା ବୋଲି ଏସଡିପିଓ କହିଛନ୍ତି।
ଏହି ମାରାତ୍ମକ ଜୀବାଣୁ ବିସ୍ତାରକୁ ରୋକିବା ପାଇଁ ଜିଲ୍ଲା ପ୍ରଶାସନ ପୂର୍ବରୁ ସହରରେ ଶିକ୍ଷାନୁଷ୍ଠାନ, ମଲ୍, ସିନେମା ହଲ୍, ହୋଟେଲ, ରେଷ୍ଟୁରାଣ୍ଟ ଏବଂ ମନ୍ଦିର ବନ୍ଦ କରିବାକୁ ନିର୍ଦ୍ଦେଶ ଦେଇଥିଲା। ଏହାସତ୍ତ୍ୱେ ମଧ୍ୟ ଏହି ୩ ବ୍ୟକ୍ତି ସରକାରୀ କଟକଣାକୁ ଅବମାନନା କରିଥିବା ଅଭିଯୋଗରେ ପୋଲିସ ଏମାନଙ୍କୁ ଗିରଫ କରିଛି ।