ନୂଆଦିଲ୍ଲୀ: ଭାରତୀୟ ବଂଶୋଦ୍ଭବ ମହାକାଶଚାରୀ ସୁନୀତା ୱିଲିୟମ୍ସ ୧୯ ମାର୍ଚ୍ଚ ୨୦୨୫ରେ ସ୍ପେସଏକ୍ସ ଡ୍ରାଗନ ମହାକାଶଯାନ ଯୋଗେ ପୃଥିବୀକୁ ଫେରିଛନ୍ତି। ସେ ଏବଂ ତାଙ୍କ ସାଥୀ ବୁଚ ୱିଲମୋର ୫ ଜୁନ ୨୦୨୪ରେ ବୋଇଂ ଷ୍ଟାରଲାଇନର୍ ସ୍ପେସକ୍ରାଫ୍ଟରେ ମହାକାଶ ଅଭିମୁଖେ ଯାତ୍ରା ଆରମ୍ଭ କରିଥିଲେ। କିନ୍ତୁ ଯାନରେ ତ୍ରୁଟି ଯୋଗୁଁ ଉଭୟେ ୯ ମାସ ଧରି ମହାକାଶରେ ଅଟକି ରହିଥିଲେ। ଏହି ଅଭିଯାନ ସୁନୀତାଙ୍କ ମହାକାଶ ଜୀବନର ଏକ ଅଭୂତପୂର୍ବ ଅଧ୍ୟାୟ ଥିଲା, ଯାହା ତାଙ୍କୁ ବିଶ୍ୱବ୍ୟାପୀ ଚର୍ଚ୍ଚାରେ ଆଣିଥିଲା। ୩୧ ମାର୍ଚ୍ଚ ସୋମବାର ଦିନ ଏକ ସାକ୍ଷାତକାରରେ ସେ ନିଜର ଅଭିଜ୍ଞତା ଏବଂ ଭାରତ ପ୍ରତି ଗଭୀର ଆସକ୍ତି ବ୍ୟକ୍ତ କରିଛନ୍ତି।
ସାକ୍ଷାତକାରରେ ସୁନୀତା କହିଛନ୍ତି ଯେ, ମହାକାଶରୁ ଭାରତର ଦୃଶ୍ୟ ଅତ୍ୟନ୍ତ ମନୋରମ। ହିମାଳୟର ବିଶାଳ ଶୃଙ୍ଗ ଉପରେ ଯାନ ଯାତ୍ରା କରୁଥିବା ସମୟରେ ସେ ଏକ ଅବିସ୍ମରଣୀୟ ଦୃଶ୍ୟ ଦେଖିଥିଲେ। “ହିମାଳୟର ଉଚ୍ଚ ଶିଖର ଏବଂ ତା’ ତଳେ ଥିବା ସବୁଜ ଉପତ୍ୟକା ମନକୁ ମୋହି ନେଇଥିଲା। ଏହା ଏକ ଅଦ୍ଭୁତ ଅନୁଭବ ଥିଲା,” ବୋଲି ସେ କହିଛନ୍ତି। ସେ ଆହୁରି ମନ୍ତବ୍ୟ ଦେଇଛନ୍ତି ଯେ, ଗୁଜରାଟର ଉପକୂଳ ଏବଂ ମୁମ୍ବାଇର ଆଲୋକମୟ ରାତ୍ରି ଦୃଶ୍ୟ ମହାକାଶରୁ ଅପରୂପ ସୌନ୍ଦର୍ଯ୍ୟ ପ୍ରଦାନ କରିଥିଲା। “ମୁମ୍ବାଇର ଆଲୋକ ଜାଲ ଏକ ଝଲମଲ ରତ୍ନ ପରି ଦେଖାଯାଉଥିଲା, ଯାହା ଭାରତର ଆଧୁନିକତା ଓ ସଂସ୍କୃତିର ସମନ୍ୱୟକୁ ପ୍ରତିଫଳିତ କରୁଥିଲା,” ସେ ଉଲ୍ଲେଖ କରିଛନ୍ତି।
ସୁନୀତାଙ୍କ ପିତା ଭାରତୀୟ ବଂଶୋଦ୍ଭବ ହୋଇଥିବାରୁ ତାଙ୍କର ଭାରତ ସହ ଏକ ଗଭୀର ସମ୍ପର୍କ ରହିଛି। ସେ କହିଛନ୍ତି, “ମୋର ବାପାଙ୍କ ଦେଶ ଭାରତ ମୋ ପାଇଁ ସର୍ବଦା ଖାସ୍। ମହାକାଶରୁ ଏହାର ସୌନ୍ଦର୍ଯ୍ୟ ଦେଖି ମୋ ହୃଦୟ ଗର୍ବରେ ଭରି ଉଠିଥିଲା।” ସେ ଭାରତକୁ ଏକ ମହାନ ଗଣତାନ୍ତ୍ରିକ ରାଷ୍ଟ୍ର ଭାବେ ପ୍ରଶଂସା କରିବା ସହ କହିଛନ୍ତି ଯେ, “ମୁଁ ନିଶ୍ଚିତ ଭାବେ ଭାରତକୁ ପୁନର୍ବାର ଫେରିବି ଏବଂ ଏହାର ସଂସ୍କୃତି ଓ ଲୋକଙ୍କ ସହ ଅଧିକ ସମୟ ବିତାଇବି।” ତାଙ୍କର ଏହି ଭାବନା ଭାରତୀୟଙ୍କ ପାଇଁ ଗର୍ବର କଥା ହୋଇଛି।
Comments are closed.