ଭୁବନେଶ୍ୱର :ଗୁଗୁଲର ନୂଆ ଫ୍ଲାଗସିପ୍ ପିକ୍ସେଲ୍ ୧୦ ସିରିଜ୍, ଯାହା ଅଗଷ୍ଟ ୨୦ରେ ‘ମେଡ୍ ବାଇ ଗୁଗୁଲ’ ଇଭେଣ୍ଟରେ ଲଞ୍ଚ ହୋଇଥିଲା, ଏକ ନୂଆ ଓ ଅଭାବପୂର୍ବ ଫିଚର ସହିତ ସମସ୍ତଙ୍କୁ ଚମକାଇ ଦେଇଛି। ଗୁଗୁଲ ଘୋଷଣା କରିଛି ଯେ ପିକ୍ସେଲ୍ ୧୦ ସିରିଜ୍ ବିଶ୍ୱର ପ୍ରଥମ ସ୍ମାର୍ଟଫୋନ୍ ହେବ, ଯାହା ସାଟେଲାଇଟ୍ ନେଟ୍ୱାର୍କ ମାଧ୍ୟମରେ ହ୍ବାଟସ୍ଆପ୍ରେ ଭଏସ୍ ଓ ଭିଡିଓ କଲ୍ ସୁବିଧା ପ୍ରଦାନ କରିବ। ଏହି ଫିଚର ଅଗଷ୍ଟ ୨୮ରୁ ସକ୍ରିୟ ହେବ, ଯେତେବେଳେ ପିକ୍ସେଲ୍ ୧୦, ପିକ୍ସେଲ୍ ୧୦ ପ୍ରୋ, ପିକ୍ସେଲ୍ ୧୦ ପ୍ରୋ ଏକ୍ସଏଲ୍ ଓ ପିକ୍ସେଲ୍ ୧୦ ପ୍ରୋ ଫୋଲ୍ଡ ବଜାରରେ ବିକ୍ରି ପାଇଁ ଉପଲବ୍ଧ ହେବ।
ସମ୍ପର୍କରେ ସାଙ୍ଗକୁ ଆଣିବ ସାଟେଲାଇଟ୍
ଏହି ଫିଚର ସାଟେଲାଇଟ୍ କମ୍ୟୁନିକେସନ୍କୁ ସ୍ମାର୍ଟଫୋନ୍ରେ ଏକ ନୂଆ ଦିଗ ଦେଉଛି। ଏବେ ଆପଣ ଜଙ୍ଗଲ, ପର୍ବତ କିମ୍ବା ଏପରି ସ୍ଥାନରେ ମଧ୍ୟ ଯେଉଁଠାରେ ମୋବାଇଲ୍ ନେଟ୍ୱାର୍କ କିମ୍ବା ୱାଇ-ଫାଇ ଉପଲବ୍ଧ ନାହିଁ, ହ୍ବାଟସ୍ଆପ୍ ମାଧ୍ୟମରେ ଆପଣଙ୍କ ସାଙ୍ଗମାନଙ୍କ ସହ କଥା ହେବା ସହ ଭିଡିଓ କଲ୍ ମାଧ୍ୟମରେ ଦେଖା ମଧ୍ୟ କରିପାରିବେ। ଏହା କେବଳ ଜରୁରୀ ସମୟରେ ନୁହେଁ, ବରଂ ଦୈନନ୍ଦିନ ଜୀବନରେ ମଧ୍ୟ ସମ୍ପର୍କକୁ ଆହୁରି ଘନିଷ୍ଠ କରିବ। ଗୁଗୁଲର ଏକ ଟିଜର୍ ଭିଡିଓରେ ଦେଖାଯାଇଛି ଯେ ସାଟେଲାଇଟ୍ ମାଧ୍ୟମରେ କଲ୍ ଆସିଲେ ଫୋନ୍ର ଷ୍ଟାଟସ୍ ବାର୍ରେ ଏକ ସାଟେଲାଇଟ୍ ଆଇକନ୍ ଦେଖାଯିବ, ଏବଂ କଲ୍ ରିସିଭ୍ କରିବାର ପ୍ରକ୍ରିୟା ସାଧାରଣ କଲ୍ ପରି ହେବ।
ଏହି ସୁବିଧା ସମସ୍ତଙ୍କ ପାଇଁ ତୁରନ୍ତ ଉପଲବ୍ଧ ହେବ ନାହିଁ। ଗୁଗୁଲ ସ୍ପଷ୍ଟ କରିଛି ଯେ ଏହା କେବଳ ନିର୍ଦ୍ଦିଷ୍ଟ ପାର୍ଟନର କ୍ୟାରିଅର୍ମାନଙ୍କ ମାଧ୍ୟମରେ କାମ କରିବ, ଯେପରି ଯୁକ୍ତରାଷ୍ଟ୍ରରେ ଟି-ମୋବାଇଲ୍ ଓ ଷ୍ଟାର୍ଲିଙ୍କ୍। ଏହା ସହ ଅତିରିକ୍ତ ଚାର୍ଜ ମଧ୍ୟ ଲାଗୁ ହୋଇପାରେ। ଏହି ଫିଚର କାମ କରିବା ପାଇଁ ଖୋଲା ଆକାଶ ତଳେ ରହିବା ଆବଶ୍ୟକ, ଯେପରି ଜଙ୍ଗଲ କିମ୍ବା ପର୍ବତ ଅଞ୍ଚଳ। ସାଟେଲାଇଟ୍ କନେକ୍ସନ୍ରେ କିଛି ବିଳମ୍ବ (ଲେଟେନ୍ସି) ହୋଇପାରେ, କିନ୍ତୁ ଗୁଗୁଲର ଟେନସର ଚିପ୍ ଓ ସ୍କାଇଲୋ ନେଟ୍ୱାର୍କ ଏହାକୁ ଯଥାସମ୍ଭବ ସୁଗମ କରିବାକୁ ପ୍ରୟାସ କରୁଛି।
ଭାରତୀୟ ଗ୍ରାହକଙ୍କ ପାଇଁ ଏହି ଫିଚର ତୁରନ୍ତ ଉପଲବ୍ଧ ହେବାର ସମ୍ଭାବନା କମ୍, କାରଣ ଭାରତରେ ସାଟେଲାଇଟ୍ ସେବା ଏପର୍ଯ୍ୟନ୍ତ ସମ୍ପୂର୍ଣ୍ଣ ରୂପେ ରୋଲ୍ଆଉଟ୍ ହୋଇନାହିଁ। ତେବେ, ଭାରତରେ ହ୍ବାଟସ୍ଆପ୍ର ବିପୁଳ ଜନପ୍ରିୟତାକୁ ଦେଖିଲେ ଏହି ଫିଚର ଭବିଷ୍ୟତରେ ଏକ ବଡ଼ ପରିବର୍ତ୍ତନ ଆଣିପାରେ। ଗ୍ରାମାଞ୍ଚଳ କିମ୍ବା ଦୁର୍ଗମ ଅଞ୍ଚଳରେ ରହୁଥିବା ଲୋକଙ୍କ ପାଇଁ ଏହା ଏକ ଜୀବନରକ୍ଷାକାରୀ ସୁବିଧା ହୋଇପାରେ, ଯେଉଁମାନେ ନେଟ୍ୱାର୍କ ଅଭାବରେ ସମ୍ପର୍କରୁ ବଞ୍ଚିତ ହୋଇଥାନ୍ତି।
ଏଯାଏ ସାଟେଲାଇଟ୍ କନେକ୍ଟିଭିଟି ସ୍ମାର୍ଟଫୋନ୍ରେ କେବଳ ଜରୁରୀ ମେସେଜିଂ କିମ୍ବା ଲୋକେସନ୍ ସେୟାରିଂ ପାଇଁ ସୀମିତ ଥିଲା। ଆପଲ୍ର ଆଇଫୋନ୍ ୧୪ ଏବଂ ସାମସଙ୍ଗର ଗାଲାକ୍ସି ଏସ୨୫ ସାଟେଲାଇଟ୍ ମାଧ୍ୟମରେ ଟେକ୍ସଟ୍ ମେସେଜିଂ ସୁବିଧା ଦେଉଛି। କିନ୍ତୁ ଗୁଗୁଲର ଏହି ପଦକ୍ଷେପ ସାଟେଲାଇଟ୍କୁ ଦୈନନ୍ଦିନ ଯୋଗାଯୋଗ ପାଇଁ ବ୍ୟବହାର କରି ଏକ ନୂଆ ଅଧ୍ୟାୟ ଆରମ୍ଭ କରୁଛି। ହ୍ବାଟସ୍ଆପ୍ର ୨ ବିଲିୟନରୁ ଅଧିକ ବ୍ୟବହାରକାରୀଙ୍କୁ ଦେଖିଲେ ଏହା ସମ୍ପର୍କ ଓ ଯୋଗାଯୋଗରେ ଏକ ବୈପ୍ଳବିକ ପରିବର୍ତ୍ତନ ଆଣିପାରେ
Comments are closed.