ମିଳୁନାହିଁ କି ଟ୍ରେନର କନଫର୍ମ ଟିକେଟ: AI କରିବ ସାହାଯ୍ୟ, ଚୁଟକିରେ ହୋଇଯିବ ସମାଧାନ

ନୂଆଦିଲ୍ଲୀ: ଯଦି ଆପଣ ମଧ୍ୟ ରେଳବାଇ ଟିକେଟ ବୁକିଂ ସମୟରେ ଟିକେଟ ନମିଳିବା ସମସ୍ୟାରେ ଅସୁବିଧାରେ ପଡ଼ୁଛନ୍ତ, ତେବେ ଆପଣଙ୍କ ପାଇଁ ଖୁସି ଖବର। ଭାରତୀୟ ରେଳବାଇର IRCTC ଏବେ ନିଜ ସେବାକୁ ଉନ୍ନତ କରିବା ପାଇଁ ଆର୍ଟିଫିସିଆଲ ଇଣ୍ଟେଲିଜେନ୍ସ (AI) ଟେକ୍ନୋଲଜିର ବ୍ୟବହାର କରିବାକୁ ଯାଉଛି। ଏହା ଦ୍ୱାରା ଟିକେଟ ବୁକିଂ ପ୍ରକ୍ରିୟା ଆହୁରି ସହଜ ଓ ଦ୍ରୁତ ହେବ। IRCTCର ମତରେ, AI ଟେକ୍ନୋଲଜି ସାହାଯ୍ୟରେ ଟିକେଟ ବୁକିଂ ସମୟରେ ହେଉଥିବା ଅସୁବିଧାଗୁଡ଼ିକୁ କମ୍ କରାଯିବ। ଏହା ଦ୍ୱାରା ଯାତ୍ରୀମାନେ ସହଜରେ ଟିକେଟ ବୁକ୍ କରିପାରିବେ ଓ ବାରମ୍ବାର ୱେବସାଇଟରେ ଯାଇ ଟିକେଟ ଯାଞ୍ଚ କରିବାର ଆବଶ୍ୟକତା ପଡ଼ିବ ନାହିଁ। AI ମାଧ୍ୟମରେ ଟିକେଟର ଉପଲବ୍ଧତା ସମ୍ପର୍କରେ ରିଅଲ-ଟାଇମ ସୂଚନା ମଧ୍ୟ ମିଳିବ।

ପାରଦର୍ଶିତା ବଢ଼ିବ, ନକଲି ବୁକିଂ ରୋକାଯିବ
IRCTC ଅନୁସାରେ, AI ଟେକ୍ନୋଲଜି ଟିକେଟ ବୁକିଂ ପ୍ରକ୍ରିୟାରେ ପାରଦର୍ଶିତା ବଢ଼ାଇବ ଓ ନକଲି ବୁକିଂକୁ ରୋକିବ। ଏହା ଦ୍ୱାରା ଯାତ୍ରୀମାନେ ସଠିକ ସମୟରେ ସଠିକ ସୂଚନା ପାଇପାରିବେ ଓ ସେମାନେ ନିଜ ଯାତ୍ରା ଯୋଜନା ସହଜରେ କରିପାରିବେ। IRCTC ବିଶେଷ ଭାବେ AI-ଆଧାରିତ ଟେକ୍ନୋଲଜି ଆରମ୍ଭ କରିଛି ଯାହା ନକଲି ଉପଭୋକ୍ତା ଆକାଉଣ୍ଟ ଚିହ୍ନଟ କରି ସେଗୁଡ଼ିକୁ ନିଷ୍କ୍ରିୟ କରୁଛି। ଅଧିକାରୀଙ୍କ ମତରେ, ଏହି ପଦକ୍ଷେପ ମାଧ୍ୟମରେ ଗତ ବର୍ଷ ପ୍ରାୟ ୩.୫ କୋଟି ନକଲି ଆଇଡିକୁ ବ୍ଲକ୍ କରାଯାଇଛି।

ଏଜେଣ୍ଟମାନେ କିପରି ସିଷ୍ଟମର ଦୁରୁପଯୋଗ କରୁଥିଲେ?
ଅଧିକାଂଶ ଏଜେଣ୍ଟ ଅନଧିକୃତ ଆଇଡି ବ୍ୟବହାର କରୁଥିଲେ, ଯେଉଁମାନେ ନକଲି ପ୍ରୋଫାଇଲ ତିଆରି କରି ଟିକେଟ ବୁକିଂରେ ହେରଫେର କରୁଥିଲେ ଓ ସିଷ୍ଟମକୁ ଏକାଧିକ ଅନୁରୋଧ ପଠାଉଥିଲେ। ଏବେ ନୂଆ AI ଓ ମେସିନ୍ ଲର୍ଣ୍ଣିଂ ଟୁଲ୍ସ IRCTCକୁ ଏହି ଗତିବିଧିଗୁଡ଼ିକୁ ଚିହ୍ନଟ ଓ ରୋକିବାରେ ସାହାଯ୍ୟ କରୁଛି, ଯାହା ଦ୍ୱାରା ପ୍ରକୃତ ଯାତ୍ରୀମାନେ ଉନ୍ନତ ସୁବିଧା ପାଉଛନ୍ତି।

ଏଜେଣ୍ଟମାନେ କିପରି ନକଲି ପ୍ରୋଫାଇଲ ତିଆରି କରୁଥିଲେ?
ଏଜେଣ୍ଟମାନେ ପ୍ରାୟତଃ ଅଳ୍ପ ସମୟ ପାଇଁ ବ୍ୟବହୃତ ଇମେଲ ଠିକଣା ଓ ମୋବାଇଲ ନମ୍ବର ବ୍ୟବହାର କରି ଜଣେ ଗ୍ରାହକ ପାଇଁ ଡଜନ ଡଜନ IRCTC ପ୍ରୋଫାଇଲ ତିଆରି କରୁଥିଲେ। ଏହି ଅସ୍ଥାୟୀ ଇମେଲ ଆକାଉଣ୍ଟଗୁଡ଼ିକ OTP ମାଧ୍ୟମରେ ଯାଞ୍ଚ କରାଯାଉଥିଲା, କିନ୍ତୁ କିଛି ସମୟ ପରେ ନିଷ୍କ୍ରିୟ ହୋଇଯାଉଥିଲା, ଯେତେବେଳେ ନକଲି ପ୍ରୋଫାଇଲଗୁଡ଼ିକ ସକ୍ରିୟ ରହୁଥିଲା।

ଉଦାହରଣ ସହ ବୁଝନ୍ତୁ
ମନେକରନ୍ତୁ ଜଣେ ଯାତ୍ରୀଙ୍କୁ ଦିଲ୍ଲୀରୁ ଆଗ୍ରା ଯିବା ପାଇଁ ଟିକେଟ ଦରକାର। ଏକ ଅନଧିକୃତ ଏଜେଣ୍ଟ ୩୦ଟି ଭିନ୍ନ ଆକାଉଣ୍ଟ ତିଆରି କରି ସେହି ଟିକେଟ ବୁକ୍ କରିବାକୁ ଚେଷ୍ଟା କରିପାରୁଥିଲେ। ଏହା ଦ୍ୱାରା ନିଶ୍ଚିତ ସିଟ୍ ପାଇବାର ସମ୍ଭାବନା ବଢ଼େ। ଶହ ଶହ ଯାତ୍ରୀ ପାଇଁ ଏପରି କଲେ, ଅନୁରୋଧର ସଂଖ୍ୟା ସିଷ୍ଟମକୁ ଓଭରଲୋଡ କରୁଥିଲା, ଫଳରେ ଯୋଉଁମାନେ ନିଜ ଟିକେଟ ପାଇଁ ଚେଷ୍ଟା କରୁଛନ୍ତି, ସେମାନେ ସିଟ୍ ପାଇପାରୁ ନାହାନ୍ତି।

AI ଦ୍ୱାରା ଏଜେଣ୍ଟଙ୍କ ମନମାନି ଉପରେ ରୋକ
IRCTC ନିଜ ଡିଜିଟାଲ ସିଷ୍ଟମକୁ AI ସହ ଅପଡେଟ କରିଛି ଯାହା ଅସ୍ୱାଭାବିକ ବୁକିଂ ପ୍ୟାଟର୍ଣ୍ଣକୁ ଚିହ୍ନଟ କରୁଛି। ଏହି AI ଟେକ୍ନୋଲଜି ଅସ୍ଥାୟୀ ଇମେଲ ବା ଅଟୋମେଟେଡ ବଟ୍ସ ବ୍ୟବହାର କରୁଥିବା ଆକାଉଣ୍ଟଗୁଡ଼ିକୁ ଚିହ୍ନଟ କରି ନିଷ୍କ୍ରିୟ କରୁଛି। ଏହା ସେମାନଙ୍କୁ ବୁକିଂ ଚେଷ୍ଟା କରିବା ପୂର୍ବରୁ ରୋକିଦେଉଛି। ଏହି AI-ଆଧାରିତ ପଦକ୍ଷେପ ଯାତ୍ରୀମାନଙ୍କୁ ଅଧିକ ସୁବିଧା ଓ ନ୍ୟାୟପୂର୍ଣ୍ଣ ଟିକେଟ ବୁକିଂ ସୁଯୋଗ ପ୍ରଦାନ କରିବ। ନକଲି ବୁକିଂ ଓ ଅନଧିକୃତ ଏଜେଣ୍ଟଙ୍କ କାର୍ଯ୍ୟକଳାପ ଉପରେ ରୋକ ଲଗାଇବ ।