ଡାଳ ଖାଇଲା ବୋଲି ଛେଳିକୁ ଅଟକ ରଖିଛି ବନ ବିଭାଗ

ବ୍ରହ୍ମପୁର: ବିଭିନ୍ନ ବିଷୟକୁ ନେଇ ବନ ବିଭାଗ ବିବାଦରେ ରହିଥିବା ବେଳେ ଗଞ୍ଜାମ ଜିଲାରେ ଏକ ରୋଚକ ଘଟଣା ଦେଖିବାକୁ ମିଳିଛି । ଗଛ ଡାଳ ଖାଇଦେଇଥିବା ଯୋଗୁ ଗୋଟିଏ ଛେଳିକୁ ବନ ବିଭାଗର କର୍ମଚାରୀମାନେ ଗତ ତିନି ଦିନ ହେଲା ଅଟକ ରଖିଛନ୍ତି। ଖଲିକୋଟ ବନାଞ୍ଚଳରେ ଏହି ଘଟଣା ଦେଖିବାକୁ ମିଳିଛି ।
ପ୍ରାପ୍ତ ସୂଚନା ଅନୁଯାୟୀ, ଖଲ୍ଲିକୋଟ ବ୍ଲକ ମଥୁରା ପଞ୍ଚାୟତର ଭରାଷା ନୂଆପଲ୍ଲୀ ଗ୍ରାମରେ ଥିବା ଏକ ପାହଡକୁ ଜଣେ ଚାଷୀ କିଛି ଛେଳିକୁ ଚରାଇବାକୁ ନେଇଥିଲେ । ପାଖରେ ବନ ବିଭାଗ ତରଫରୁ ବୃକ୍ଷ ରୋପଣ କରାଯାଇଥିଲା । ହେଲେ କିଛି ଛେଳି ଯାଇ ଗଛ ଖାଇ ଦେଇଥିଲା । ରକ୍ଷଣାବେକ୍ଷଣ ଦାୟିତ୍ବରେ ଥିବା ବନ ବିଭାଗର ଦୁଇଜଣ କର୍ମଚାରୀ ଏଥିରେ ଉତ୍‌କ୍ଷୀପ୍ତ ହୋଇ ଛେଳି ଗୋଠର ଗୋଟିଏ ଛେଳିକୁ ଧରି ନେଇଥିଲେ । ମାଲିକ ଅନେକ ନେହୁରା ହୋଇଥିଲେ ମଧ୍ୟ ଛେଳି ଛାଡ଼ି ନଥିଲେ। ଛେଳିକୁ ଆଣି ଖଲିକୋଟ ବନାଞ୍ଚଳ କାର୍ଯ୍ୟାଳୟରେ ଆଣି ରଖାଯାଇଛି । ଏହି ଘଟଣାକୁ ତିନି ଦିନ ବିତିଯାଇଥିଲେ ମଧ୍ୟ ଛଡ଼ା ଯାଉନାହିଁ । ତେବେ ଏନେଇ ଖଲିକୋଟ ରେଞ୍ଜର ସିଦ୍ଧାର୍ଥ ସାହୁଙ୍କୁ ଗଣମାଧ୍ୟମ ପ୍ରତିନିଧିମାନେ ପ୍ରତିକ୍ରୀୟା ପାଇଁ ଯୋଗାଯୋଗ କରିଥିଲେ ମଧ୍ୟ ସେ କୌଣସି ଉତ୍ତର ଦେବାକୁ ମନା କରିଥିଲେ ।