ନୂଆଦିଲ୍ଲୀ: ଗୁଗୁଲ ପୁଣି ଥରେ ଖବରର ଚର୍ଚ୍ଚାକୁ ଆସିଛି । ଏକ ରିପୋର୍ଟ ଅନୁଯାୟୀ, ଗୁଗୁଲ ତା’ର ନୂଆ ଜେମିନି ଏଆଇ ଏବଂ ଭିଓ ୩ (Veo 3) ଭିଡିଓ ଜେନେରେସନ ମଡେଲକୁ ଟ୍ରେନିଂ ଦେବା ପାଇଁ ୟୁଟ୍ୟୁବ କ୍ରିଏଟରଙ୍କ ଅନୁମତି ବିନା ସେମାନଙ୍କ ଚ୍ୟାନେଲରେ ଅପଲୋଡ ହୋଇଥିବା ଭିଡିଓଗୁଡ଼ିକୁ ବ୍ୟବହାର କରିଛି। ଗୁଗୁଲ ନିକଟରେ ଭିଓ ୩ ଭିଡିଓ ଜେନେରେସନ ଏଆଇ ମଡେଲ ଲଞ୍ଚ କରିଛି, ଯାହା ମାଧ୍ୟମରେ ଟେକ୍ସଟକୁ ଅଡ଼ିଓ-ଭିଡିଓ ରୂପେ ରୂପାନ୍ତରିତ କରାଯାଇପାରୁଛି।
ଭିଓ ୩ ପାଇଁ ଟ୍ରେନିଂ
ଚଳିତ ବର୍ଷ ଗୁଗୁଲ I/O ୨୦୨୫ରେ ଭିଓ ୩କୁ ପ୍ରଦର୍ଶିତ କରାଯାଇଥିଲା। ଏହାକୁ କମ୍ପାନୀର ଏପର୍ଯ୍ୟନ୍ତ ସବୁଠାରୁ ଉନ୍ନତ ଏଆଇ ମଡେଲ ବୋଲି କୁହାଯାଉଛି। ଭିଓ ୩ ଦ୍ୱାରା ଜେନେରେଟ ହେଉଥିବା ଏଆଇ ଭିଡିଓଗୁଡ଼ିକ ଏତେ ବାସ୍ତବିକ ଦେଖାଯାଉଛି ଯେ ସେଗୁଡ଼ିକୁ ଅସଲି ବୋଲି ଭ୍ରମ ହେଉଛି। ରିପୋର୍ଟ ଅନୁଯାୟୀ, ଗୁଗୁଲ ଏହି ଏଆଇ ଟୁଲକୁ ଟ୍ରେନ କରିବା ପାଇଁ ୟୁଟ୍ୟୁବରେ ଉପଲବ୍ଧ ୨୦ ବିଲିୟନ ଅର୍ଥାତ୍ ୨୦୦୦ କୋଟିରୁ ଅଧିକ ଭିଡିଓ ବ୍ୟବହାର କରିଛି। ଅନେକ ୟୁଟ୍ୟୁବ କ୍ରିଏଟର ଅଭିଯୋଗ କରିଛନ୍ତି ଯେ ଗୁଗୁଲ ସେମାନଙ୍କ ଅନୁମତି ବିନା ସେମାନଙ୍କ ଭିଡିଓ ବ୍ୟବହାର କରି ଏହି ଅତ୍ୟାଧୁନିକ ଭିଡିଓ ଜେନେରେସନ ଟୁଲକୁ ଟ୍ରେନିଂ ଦେଇଛି।
ଗୁଗୁଲ କ’ଣ କହୁଛି?
ଏ ନେଇ ଗୁଗୁଲ ସ୍ପଷ୍ଟୀକରଣ ଦେଇ କହିଛି ଯେ, ଏଥିପାଇଁ କ୍ରିଏଟର ଓ ମିଡ଼ିଆ କମ୍ପାନୀମାନଙ୍କ ସହ ଚୁକ୍ତି କରାଯାଇଛି। ଗୁଗୁଲ ଆହୁରି କହିଛି, “ଆମେ ସବୁବେଳେ ଆମର ପ୍ରୋଡ଼କ୍ଟଗୁଡ଼ିକୁ ଉନ୍ନତ କରିବା ପାଇଁ କାମ କରୁଛୁ। ଏଆଇ ଆସିବା ପରେ ମଧ୍ୟ ଏହା ବଦଳି ନାହିଁ। କ୍ରିଏଟରମାନେ ଏହି ଏଆଇ ଯୁଗରେ ସେମାନଙ୍କ ଚିତ୍ର ଓ ପରିଚୟକୁ ସୁରକ୍ଷିତ ରଖିପାରିବେ।” ଏହା ସହ, ୟୁଟ୍ୟୁବ କ୍ରିଏଟରମାନଙ୍କୁ ଆମାଜନ, ଏନଭିଡ଼ିଆ କିମ୍ବା ଆପଲ ଭଳି କମ୍ପାନୀମାନଙ୍କୁ ବ୍ଲକ କରିବାର ବିକଳ୍ପ ଦେଇଛି। ୟୁଟ୍ୟୁବ କହିଛି ଯେ ଏ ସମ୍ପର୍କରେ ସମସ୍ତ ସୂଚନା କ୍ରିଏଟର ଓ ମିଡ଼ିଆ ସଂସ୍ଥାମାନଙ୍କୁ ପୂର୍ବରୁ ଦିଆଯାଇଥିଲା।
ୟୁଟ୍ୟୁବର ଟର୍ମସ ଅଫ ସର୍ଭିସ
ୟୁଟ୍ୟୁବର ଟର୍ମସ ଅଫ ସର୍ଭିସରେ ସ୍ପଷ୍ଟ ଲେଖାଯାଇଛି ଯେ ଏହି ପ୍ଲାଟଫର୍ମରେ ଅପଲୋଡ ହେଉଥିବା କଣ୍ଟେଣ୍ଟକୁ ବିଶ୍ୱବ୍ୟାପୀ ବ୍ୟବହାର କରାଯାଇପାରିବ। ଏହା ସହ, ପ୍ରୋଡକ୍ଟ ଅଭିଜ୍ଞତାକୁ ଉନ୍ନତ କରିବା ପାଇଁ ମଧ୍ୟ ଏହାକୁ ବ୍ୟବହାର କରାଯାଇପାରିବ। ଗତ ବର୍ଷ ସେପ୍ଟେମ୍ବର ୨୦୨୪ରେ ପ୍ରକାଶିତ ଏକ ବ୍ଲଗରେ ଗୁଗୁଲ ଏହାକୁ କ୍ରିଏଟରମାନଙ୍କ ପାଇଁ ସ୍ପଷ୍ଟ କରିଥିଲା।
କ୍ରିଏଟରଙ୍କ ଚିନ୍ତା
ଅନେକ କ୍ରିଏଟର ଏହାକୁ ନେଇ ଚିନ୍ତା ପ୍ରକାଶ କରିଛନ୍ତି ଯେ ସେମାନଙ୍କ କଣ୍ଟେଣ୍ଟ ବିନା ଅନୁମତିରେ ବ୍ୟବହାର ହେଉଛି, ଯାହା ଭବିଷ୍ୟତରେ ସେମାନଙ୍କ ପାଇଁ ପ୍ରତିଦ୍ୱନ୍ଦ୍ୱୀ ହୋଇପାରେ। ଏହା ସହ, ଏହି ପ୍ରକ୍ରିୟା ବୌଦ୍ଧିକ ସମ୍ପତ୍ତି (ଆଇପି) ସମ୍ବନ୍ଧୀୟ ସଙ୍କଟ ସୃଷ୍ଟି କରିପାରେ ବୋଲି ବିଶେଷଜ୍ଞମାନେ ଚେତାବନୀ ଦେଇଛନ୍ତି। ୟୁଟ୍ୟୁବରେ କ୍ରିଏଟରମାନଙ୍କୁ ଥାର୍ଡ-ପାର୍ଟି କମ୍ପାନୀମାନଙ୍କୁ ସେମାନଙ୍କ କଣ୍ଟେଣ୍ଟ ବ୍ୟବହାର କରିବାକୁ ଅଟକାଇବାର ବିକଳ୍ପ ରହିଥିଲେ ମଧ୍ୟ, ଗୁଗୁଲର ନିଜସ୍ୱ ଏଆଇ ମଡେଲ ପାଇଁ ଏହାକୁ ଅଟକାଇବାର କୌଣସି ଉପାୟ ନାହିଁ।
Comments are closed.