ନୂଆଦିଲ୍ଲୀ: ସମୟ ସହ ହେଲ୍ଥ ଇନ୍ସ୍ୟୁରାନ୍ସର ଆବଶ୍ୟକତା ଓ ଗୁରୁତ୍ୱ ଦିନକୁ ଦିନ ବଢ଼ୁଛି। ଏହା ଦୁର୍ଘଟଣା କିମ୍ବା ରୋଗରେ ଅପ୍ରତ୍ୟାଶିତ ଖର୍ଚ୍ଚରୁ ଆମକୁ ସୁରକ୍ଷା ଦେଇଥାଏ ଏବଂ ଆମର ସଞ୍ଚୟକୁ ମଧ୍ୟ ସୁରକ୍ଷିତ ରଖେ। କିନ୍ତୁ ହେଲ୍ଥ ଇନ୍ସ୍ୟୁରାନ୍ସ କିଣିବା ସମୟରେ କିଛି ଗୁରୁତ୍ୱପୂର୍ଣ୍ଣ ବିଷୟ ଉପରେ ଧ୍ୟାନ ଦେବା ଅତ୍ୟନ୍ତ ଜରୁରୀ। ଆସନ୍ତୁ ଜାଣିବା ଏପରି ୬ଟି ଗୁରୁତ୍ୱପୂର୍ଣ୍ଣ ପ୍ରଶ୍ନ, ଯାହା ଆପଣ ହେଲ୍ଥ ଇନ୍ସ୍ୟୁରାନ୍ସ କିଣୁଛନ୍ତି ସମୟରେ ନିଶ୍ଚିତ ପଚାରିବା ଉଚିତ।
୧. କେଉଁ କେଉଁ ରୋଗ କଭର ହେବ?
ପ୍ରଥମ ଓ ସବୁଠାରୁ ଗୁରୁତ୍ୱପୂର୍ଣ୍ଣ ପ୍ରଶ୍ନ ହେଉଛି, ଆପଣଙ୍କ ପଲିସି କେଉଁ କେଉଁ ରୋଗକୁ କଭର କରୁଛି। ପଲିସିରେ ଅନ୍ତର୍ଭୁକ୍ତ ସମସ୍ତ ରୋଗ ଓ ଅବସ୍ଥାକୁ ଭଲଭାବେ ବୁଝି ନିଅନ୍ତୁ, ଯାହା ଦ୍ୱାରା ଭବିଷ୍ୟତରେ କୌଣସି ଅସୁବିଧାର ସମ୍ମୁଖୀନ ହେବାକୁ ପଡ଼ିବ ନାହିଁ।
୨. ନୋ-କ୍ଲେମ ବୋନସ (NCB) କେତେ ମିଳିବ?
ଯଦି ଆପଣ ଏକ ପଲିସି ବର୍ଷରେ କୌଣସି କ୍ଲେମ ନ କରନ୍ତି, ତେବେ ବୀମା କମ୍ପାନୀ ପରବର୍ତ୍ତୀ ବର୍ଷରେ ଆପଣଙ୍କ ବୀମା ରାଶି (ସମ୍ ଇନ୍ସ୍ୟୁର୍ଡ) ବୃଦ୍ଧି କରିଥାଏ। ଏହାକୁ ନୋ-କ୍ଲେମ ବୋନସ କୁହାଯାଏ। ପଲିସି କିଣିବା ସମୟରେ ନିଶ୍ଚିତ ପଚାରନ୍ତୁ ଯେ, କମ୍ପାନୀ କେତେ ନୋ-କ୍ଲେମ ବୋନସ ପ୍ରଦାନ କରୁଛି। ଏହା ଆପଣଙ୍କ କଭରେଜକୁ ସମୟ ସହ ବଢ଼ାଇବାର ଏକ ଉତ୍ତମ ଉପାୟ।
୩. ଅପେକ୍ଷା ଅବଧି (ଓ୍ୱେଟିଂ ପିରିୟଡ) କେତେ?
ଅଧିକାଂଶ ପଲିସିରେ ପୂର୍ବରୁ ଥିବା ରୋଗ (ପ୍ରି-ଏକ୍ସିଷ୍ଟିଂ ଡିଜିଜ) ପାଇଁ ଏକ ନିର୍ଦ୍ଦିଷ୍ଟ ଅପେକ୍ଷା ଅବଧି ରହିଥାଏ। ନିୟମ ଅନୁସାରେ, ପୁରୁଣା ରୋଗଗୁଡ଼ିକ ପାଇଁ ସର୍ବାଧିକ ୩ ବର୍ଷର ଅପେକ୍ଷା ଅବଧି ରହିପାରେ, କିନ୍ତୁ ଅନେକ କମ୍ପାନୀ ୨ ବର୍ଷ ପରେ ହିଁ କଭରେଜ ଦେବା ଆରମ୍ଭ କରିଥାନ୍ତି। ପଲିସି ନେବା ସମୟରେ ସ୍ପଷ୍ଟ କରି ନିଅନ୍ତୁ ଯେ, ଆପଣଙ୍କ ରୋଗର କଭରେଜ କେତେ ବର୍ଷ ପରେ ଆରମ୍ଭ ହେବ।
୪. ପଲିସିରେ କ’ଣ କଭର ହେବ ନାହିଁ?
ପ୍ରତ୍ୟେକ ବୀମା ପଲିସିରେ କିଛି ବାଦ ଦିଆଯାଇଥାଏ, ଅର୍ଥାତ୍ କିଛି ଜିନିଷ କଭର କରାଯାଏ ନାହିଁ। ଏହା ଜାଣିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଯେ, ଆପଣଙ୍କ ପଲିସିରେ କେଉଁ କେଉଁ ଜିନିଷ ଅନ୍ତର୍ଭୁକ୍ତ ନୁହେଁ। ଏହା ଆପଣଙ୍କୁ ଭବିଷ୍ୟତରେ କ୍ଲେମ ପ୍ରତ୍ୟାଖ୍ୟାନ ଭଳି ସମସ୍ୟାରୁ ରକ୍ଷା କରିବ।
୫. କ୍ଲେମ ସେଟଲମେଣ୍ଟ ରେସିଓ (CSR) କିପରି?
କ୍ଲେମ ସେଟଲମେଣ୍ଟ ରେସିଓ ହେଉଛି ଏକ ଅତି ଗୁରୁତ୍ୱପୂର୍ଣ୍ଣ ବିଷୟ। ଆପଣ ଯେଉଁ କମ୍ପାନୀରୁ ପଲିସି କିଣୁଛନ୍ତି, ତା’ର କ୍ଲେମ ସେଟଲମେଣ୍ଟ ରେସିଓ କେତେ, ତାହା ଜାଣିବା ଅତ୍ୟନ୍ତ ଜରୁରୀ। ଏହା ଦର୍ଶାଇଥାଏ ଯେ, କମ୍ପାନୀ ତା’ର ଗ୍ରାହକଙ୍କ କ୍ଲେମ ସମାଧାନରେ କେତେ ଦକ୍ଷ ଓ ବିଶ୍ୱସନୀୟ। ସବୁବେଳେ ଉଚ୍ଚ କ୍ଲେମ ସେଟଲମେଣ୍ଟ ରେସିଓ ଥିବା କମ୍ପାନୀଙ୍କ ପଲିସି କିଣନ୍ତୁ।
୬. ପାର୍ଟନର ହସ୍ପିଟାଲ କେଉଁ କେଉଁ?
ବୀମା କମ୍ପାନୀଗୁଡ଼ିକ ଶହ ଶହ ହସ୍ପିଟାଲ ସହ ସହଭାଗୀ ହୋଇଥାନ୍ତି। କିନ୍ତୁ ଆପଣଙ୍କ ପଲିସିରେ ଆପଣଙ୍କ ଘର ନିକଟରେ ଥିବା ଉଚ୍ଚମାନର ହସ୍ପିଟାଲ ଅନ୍ତର୍ଭୁକ୍ତ ଅଛି କି ନାହିଁ, ତାହା ଜାଣିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ବିଶେଷକରି ଜରୁରୀକାଳୀନ ସ୍ଥିତିରେ, ଯଦି ଆପଣଙ୍କ ପଲିସିରେ ସୁବିଧାଜନକ ଓ ଉତ୍ତମ ହସ୍ପିଟାଲ ନାହିଁ, ତେବେ ଅସୁବିଧା ହୋଇପାରେ।
Comments are closed.