ନୂଆଦିଲ୍ଲୀ: ଏସିଆ କପ୍କୁ ନେଇ କଂଗ୍ରେସ ସାଂସଦ ଶଶି ଥରୁରଙ୍କ ବଡ଼ ବୟାନ । ସେ ଏସିଆ କପ୍ ସମୟରେ ଭାରତୀୟ କ୍ରିକେଟରଙ୍କ ଦ୍ୱାରା ପାକିସ୍ତାନୀ କ୍ରିକେଟରଙ୍କ ସହ ହାତ ମିଳାଇବାକୁ ଅସ୍ୱୀକାର କରିବା ଉପରେ ଏକ ବଡ଼ ବୟାନ ଦେଇଛନ୍ତି। ଏଏନଆଇକୁ ଦେଇଥିବା ଏକ ସାକ୍ଷାତକାରରେ ସେ କହିଛନ୍ତି, “ମୋ ବ୍ୟକ୍ତିଗତ ମତ ହେଉଛି, ଯଦି ଆମେ ପାକିସ୍ତାନ ବିଷୟରେ ଏତେ ଦୃଢ଼ ମନୋଭାବ ରଖୁଛୁ, ତାହେଲେ ଆମେ ଖେଳିବା ଉଚିତ୍ ନଥିଲା। କିନ୍ତୁ ଯଦି ଆମେ ସେମାନଙ୍କ ସହ ଖେଳୁଛୁ, ତାହେଲେ ଆମେ ଖେଳର ମନୋଭାବ ସହିତ ଖେଳିବା ଉଚିତ୍ ଏବଂ ସେମାନଙ୍କ ସହ ହାତ ମିଳାଇବା ଉଚିତ୍ ଥିଲା।”
ଶଶି ଥରୁର ଆହୁରି କହିଛନ୍ତି, “ଆମେ ୧୯୯୯ରେ ମଧ୍ୟ ଏହା କରିଥିଲୁ, ଯେତେବେଳେ କାର୍ଗିଲ ଯୁଦ୍ଧ ଚାଲିଥିଲା। ଯେଉଁ ଦିନ ଆମ ସୈନିକମାନେ ଦେଶ ପାଇଁ ସହିଦ ହେଉଥିଲେ, ସେହି ଦିନ ଆମେ ଇଂଲଣ୍ଡରେ ପାକିସ୍ତାନ ବିପକ୍ଷରେ ବିଶ୍ୱକପ ଖେଳୁଥିଲୁ। ସେତେବେଳେ ମଧ୍ୟ ଆମେ ସେମାନଙ୍କ ସହ ହାତ ମିଳାଉଥିଲୁ, କାରଣ ଖେଳର ମନୋଭାବ ଦେଶ ମଧ୍ୟରେ କିମ୍ବା ସେନା ମଧ୍ୟରେ ଥିବା ମନୋଭାବଠାରୁ ଅଲଗା। ଏହା ମୋର ବ୍ୟକ୍ତିଗତ ମତ। ଯଦି ପାକିସ୍ତାନୀ ଦଳ ପ୍ରଥମେ ଅପମାନିତ ହେବା ପରେ ଦ୍ୱିତୀୟ ଥର ଆମକୁ ଅପମାନ କରିବାକୁ ନିଷ୍ପତ୍ତି ନେଇଛି, ତାହେଲେ ଏହା ଦର୍ଶାଏ ଯେ ଉଭୟ ପକ୍ଷରେ ଖେଳର ମନୋଭାବର ଅଭାବ ରହିଛି।”
ଏସିଆ କପ୍ ସମୟରେ ଭାରତ ଓ ପାକିସ୍ତାନ ମଧ୍ୟରେ ଖେଳାଯାଇଥିବା ମ୍ୟାଚରେ ହାତ ନ ମିଳାଇବା ଠାରୁ ଆରମ୍ଭ କରି ଅନେକ ପ୍ରକାରର ବିବାଦ ସାମ୍ନାକୁ ଆସିଥିଲା। ଏଥିରେ ପାକିସ୍ତାନୀ ଖେଳାଳିଙ୍କ ଦ୍ୱାରା ଫାଇଟର ଜେଟ୍ ସହ ଜଡ଼ିତ ଅଭିବ୍ୟକ୍ତି ମଧ୍ୟ ସାମିଲ ରହିଥିଲା, ଯାହା ବେଶ ବିବାଦୀୟ ହୋଇଥିଲା। ଏସିଆ କପ୍ ସମୟରେ ଭାରତ-ପାକିସ୍ତାନ ମ୍ୟାଚରେ ବ୍ୟାଟରୁ ବନ୍ଧୁକ ପୋଜ ମଧ୍ୟ ବିବାଦରେ ଘେରି ରହିଥିଲା। ଏହି ପ୍ରସଂଙ୍ଗ କେବଳ ଖେଳ ପର୍ଯ୍ୟନ୍ତ ସୀମିତ ନ ରହି ରାଜନୈତିକ ବିତର୍କର ଅଂଶ ହୋଇଯାଇଛି। ଭାରତ ଓ ପାକିସ୍ତାନ ମଧ୍ୟରେ କ୍ରିକେଟ ସବୁବେଳେ ରାଜନୈତିକ ଏବଂ ଭାବନାତ୍ମକ ମୁଦ୍ଦା ରହିଆସିଛି। ଉଭୟ ଦେଶ ମଧ୍ୟରେ ଦ୍ୱିପାକ୍ଷିକ କ୍ରିକେଟ ସିରିଜ ୨୦୧୨ ପରଠାରୁ ବନ୍ଦ ରହିଛି ଏବଂ ମ୍ୟାଚ କେବଳ ଆଇସିସି ଟୁର୍ନାମେଣ୍ଟ କିମ୍ବା ଏସିଆ କପ୍ ଭଳି ଆୟୋଜନରେ ହିଁ ହେଉଛି।
Comments are closed.