ନୂଆଦିଲ୍ଲୀ : ଇରାନ ଦେଖାଇଲା ମିସାଇଲ ସୋ’ । ଯାହାକୁ ଦେଖି ଏବେ ପୂରା ଦୁନିଆ ଛାନିଆ । ମାଳ ମାଳ ନୂଆ ମିସାଇଲ ଆଉ ଅତ୍ୟାଧୁନିକ ଡ୍ରୋନରେ ତିଆରି ହୋଇଯାଇଛି ଇରାନର ମିସାଇଲ ସିଟି । ଯାହା ଦେଖିଲା ବେଳକୁ ଆଚମ୍ବିତ ଲାଗୁଛି । ଇସ୍ରାଏଲ ସହ ତିକ୍ତତା ଭିତରେ ମିସାଇଲ ସିଟିର ଭିଡିଓ ସାମ୍ନାକୁ ଆଣିଛି ଇରାନ । ଇରାନର ଇସଲାମିକ ରିଭୋଲ୍ୟୁସନାରୀ ଗାର୍ଡ ଗ୍ରୁପ ବା IRGC ଏହି ଭିଡିଓ ଜାରି କରିଛି ।
ଭିଡିଓରେ ଇରାନର ବିଭିନ୍ନ ସହରରେ ଥିବା ଅଣ୍ଡରଗ୍ରାଉଣ୍ଡ ମିସାଇଲ ଓ ଡ୍ରୋନକୁ ଦେଖା ଯାଇଛି । IRGC ଏକ ନୂଆ ସ୍ପେଶାଲ ମିଶାଇଲ ତିଆରି କରିଥିବା ମଧ୍ୟ ଦାବି କରିଛି । IRGCର ମେଜର ଜେନେରାଲ ହୁସେନ ସଲାମୀ ଏବଂ ବ୍ରିଗ୍ରେଡୟର ଜେନେରାଲ ଅମୀର ଅଲ୍ଲୀ ମିସାଇଲ ଭଣ୍ଡାର ବୁଲି ଦେଖିଥିଲେ । ଇରାନର ଏହି ଅଣ୍ଡରଗ୍ରାଉଣ୍ଡରେ ରହିଛି ଶକ୍ତିଶାଳୀ ମିସାଇଲ ସହ ଅତ୍ୟାଧୁନିକ ଡ୍ରୋନ । ଭଳିକି ଭଳି ବହୁ ଶକ୍ତିଶାଳୀ ମିସାଇଲ ଏଠାରେ ଗଚ୍ଛିତ ହୋଇ ରହିଛି । ଏହି ମିସାଇଲ୍ ସେଣ୍ଟରରୁ ଇସ୍ରାଏଲ ଉପରେ ଗତବର୍ଷ ଇରାନ ମିଶାଇଲ ଆକ୍ରମଣ କରିଥିବା ତେହରିନ ମିଡିଆ ଦାବି କରିଛି ।
ଏହି ଭିଡିଓ ଜରିଆରେ ନିଜର ଶକ୍ତି ପ୍ରଦର୍ଶନ କରିଛି ଇରାନ । ଏହା ଜରିଆରେ ଶତ୍ରୁ ଦେଶକୁ ନାଲି ଆଖି ଦେଖାଇଛି ଇରାନ । ଏବେ ଇସ୍ରାଏଲ ଟାର୍ଗେଟରେ ରହିଛି ଇରାନ । ଆଉ ଆସନ୍ତା ୨୦ରେ ଆମେରିକା ରାଷ୍ଟ୍ରପତି ଭାବେ ଡୋନାଲ୍ଡ ଟ୍ରମ୍ପ ଶପଥ ନେବା ପରେ ୨୦୨୫ରେ ଇରାନ ବିରୋଧରେ କିଛି ବଡ଼ ନିଷ୍ପତ୍ତି ନେଇପାରନ୍ତି । ଏହାକୁ ନଜରରେ ରଖି ତା’ ପୂର୍ବରୁ ଇରାନ ବିଶ୍ବକୁ ନିଜର ଶକ୍ତି ଦେଖାଇଛି । ଏହି ମିସାଇଲ ଓ ଡ୍ରୋନ ଦେଖାଇ ପରୋକ୍ଷରେ ଇସ୍ରାଏଲ ଏବଂ ଆମେରିକାକୁ ଦେଇଛି ଚେତାବନୀ । ଯଦି କୌଣସି ପ୍ରକାର ଆକ୍ରମଣ ପାଇଁ ଆଗଭର ହୁଅନ୍ତି, ତେବେ ଏହାର ଜବାବ ଦେବ ଇରାନ ।
