ନୂଆଦିଲ୍ଲୀ: ଏହା କୌଣସି ଧାତୁ ନୁହେଁ, କୌଣସି ରତ୍ନ ମଧ୍ୟ ନୁହେଁ ଏହା ହେଉଛି କସ୍ତୁରୀ। ପ୍ରଶ୍ନ ଉଠୁଛି, ଏଥିରେ ଏପରି କ’ଣ ଅଛି ଯାହାକୁ ପାଇବା ପାଇଁ ଦେଶଗୁଡ଼ିକରେ ଚୋରା ବେପାର ହେଉଛି ଏବଂ ବୈଜ୍ଞାନିକମାନେ ଏହାକୁ ଡାକ୍ତରୀ ଚମତ୍କାର ମାନୁଛନ୍ତି? ଏହା କେମିତି ଦେଖାଯାଏ, କେଉଁଠାରୁ ମିଳେ ଏବଂ କାହିଁକି ଏତେ ମହଙ୍ଗା? ଏହି ରିପୋର୍ଟରେ ଜାଣନ୍ତୁ କସ୍ତୁରୀର ପ୍ରକୃତ ରହସ୍ୟ।
କସ୍ତୁରୀ କେଉଁଠାରୁ ମିଳେ?
କସ୍ତୁରୀ ବିଶ୍ଵର ସବୁଠାରୁ ମୂଲ୍ୟବାନ୍ ପ୍ରାକୃତିକ ସୁଗନ୍ଧ ମଧ୍ୟରୁ ଅନ୍ୟତମ। ଏହା କୌଣସି ଗଛରୁ ମିଳେ ନାହିଁ, ବରଂ ଏକ ଦୁର୍ଲଭ ଜଙ୍ଗଲୀ ଜୀବ ପୁରୁଷ କସ୍ତୁରୀ ମୃଗରୁ ମିଳିଥାଏ। ଏହି ମୃଗ ହିମାଳୟ, ତିବତ, ସାଇବେରିଆ ଓ ନେପାଳର ଉଚ୍ଚ ପର୍ବତମାଳାରେ ଦେଖାଯାଏ ଏବଂ ଏହାର ସଂଖ୍ୟା ବର୍ତ୍ତମାନ ଅତ୍ୟନ୍ତ କମ୍ ରହିଛି। ଏହି କାରଣରୁ କସ୍ତୁରୀର ମୂଲ୍ୟ ଢେର ଅଧିକ ରହିଛି।
କସ୍ତୁରୀ କେମିତି ଦେଖାଯାଏ?
କସ୍ତୁରୀ ମୃଗର ଶରୀରରେ, ବିଶେଷକରି ନାଭି ନିକଟରେ ଏକ ଛୋଟ ଥଳି ଭଳି ଗ୍ରନ୍ଥି ରହିଥାଏ। ଏହି ଗ୍ରନ୍ଥି ଗଭୀର ବାଦାମୀ ରଙ୍ଗର, ଚିପ୍ଚିପ୍ ଏବଂ ଅତ୍ୟନ୍ତ ସୁଗନ୍ଧିତ ପଦାର୍ଥ ଉତ୍ପାଦନ କରେ, ଯାହାକୁ ଶୁଖାଇ ‘କସ୍ତୁରୀ’ ତିଆରି କରାଯାଏ। ଆଶ୍ଚର୍ଯ୍ୟର କଥା ଏହା ଯେ, ନୂଆ ବାହାର କରାଯାଇଥିବା କସ୍ତୁରୀରେ ବହୁତ ତୀବ୍ର ଓ ଝାଞ୍ଜ ଗନ୍ଧ ରହିଥାଏ, କିନ୍ତୁ ଶୁଖିଲା ପରେ ଏହାର ସୁଗନ୍ଧ ଆହୁରି ମଧୁର, ଗଭୀର ଓ ମନୋରମ ହୋଇଯାଏ।
କସ୍ତୁରୀ ଏତେ ମହଙ୍ଗା କାହିଁକି?
କସ୍ତୁରୀର ମୂଲ୍ୟ ଏହାର ଗୁଣ, ଦୁର୍ଲଭତା ଏବଂ ବଜାରରେ ପ୍ରଚଣ୍ଡ ଚାହିଦା କାରଣରୁ ଅତ୍ୟଧିକ ଉଚ୍ଚ। କେତେକ ବିଶେଷ କାରଣ ରହିଛି:
• ଏହା କେବଳ ପୁରୁଷ କସ୍ତୁରୀ ମୃଗରୁ ହିଁ ମିଳେ।
• ଗୋଟିଏ ମୃଗ ବର୍ଷକୁ ଅତି ନଗଣ୍ୟ ପରିମାଣରେ କସ୍ତୁରୀ ଉତ୍ପାଦନ କରେ।
• ଏହାର ଅନନ୍ୟ ସୁଗନ୍ଧ ବିଶ୍ଵର ସବୁଠାରୁ ମହଙ୍ଗା ପରଫ୍ୟୁମ୍ର ମେରୁଦଣ୍ଡ ସ୍ବରୂପ। ଏହା ‘ଫିକ୍ସେଟିଭ୍’ ଭଳି କାମ କରି ଯେକୌଣସି ଇତରର ସୁଗନ୍ଧକୁ ଦୀର୍ଘ ସମୟ ଧରି ରଖେ ଏବଂ ଇତର ପୁରୁଣା ହେବା ସହ ସୁଗନ୍ଧକୁ ଆହୁରି ନିଖୁଣ କରେ।
• ଆୟୁର୍ବେଦରେ କସ୍ତୁରୀର ବିଶେଷ ମହତ୍ତ୍ଵ ରହିଛି। ଏହା କେବଳ ସୁଗନ୍ଧ ନୁହେଁ, ଔଷଧୀୟ ଗୁଣର ଭଣ୍ଡାର ମଧ୍ୟ। ଏହା ପ୍ରାକୃତିକ ଭାବେ ଫୁଲା କମାଏ, ଟ୍ୟୁମର ରୋକିବାରେ ସାହାଯ୍ୟ କରେ, ସ୍ନାୟୁ ତନ୍ତ୍ରର ସୁରକ୍ଷା କରେ, ହୃଦରୋଗ, ଅଚେତ ହେବା ଓ ଅନ୍ୟାନ୍ୟ ଗମ୍ଭୀର ରୋଗରେ ଶତାବ୍ଦୀ ଧରି ଆୟୁର୍ବେଦରେ ବ୍ୟବହାର ହେଉଛି।
ଏହାର ମୂଲ୍ୟ କେତେ?
କସ୍ତୁରୀ ଆଜି ବଜାରର ସବୁଠାରୁ ମହଙ୍ଗା ଉତ୍ପାଦ ମଧ୍ୟରୁ ଅନ୍ୟତମ। କେତେକ ରିପୋର୍ଟ ଅନୁଯାୟୀ:
• ୨୦ ଗ୍ରାମ କସ୍ତୁରୀ ୨.୫ ଲକ୍ଷ ଟଙ୍କା ପର୍ଯ୍ୟନ୍ତ ବିକ୍ରି ହୁଏ।
• କସ୍ତୁରୀ ପାଉଡର ପ୍ରତି କିଲୋଗ୍ରାମ୍ ୩୦,୦୦୦ ଟଙ୍କା ପର୍ଯ୍ୟନ୍ତ ବିକ୍ରି ହୁଏ। ଅନ୍ତର୍ଜାତୀୟ ବଜାରରେ ଏହାର ମୂଲ୍ୟ ଏହାଠାରୁ ମଧ୍ୟ କେତେକ ଗୁଣ ଅଧିକ ହୋଇଥାଏ। ଏହି କାରଣରୁ ଏହାର ଅବୈଧ ବେପାର ମଧ୍ୟ ଦ୍ରୁତ ଗତିରେ ବଢ଼ୁଛି।
Comments are closed.