ଭୁବନେଶ୍ୱର: ବୁଦ୍ଧମନ୍ଦିର ସମ୍ମିଳନୀ କକ୍ଷରେ ବିଡିଏ କର୍ମଚାରୀ ସମବାୟ ଋଣ ଓ ମିତବ୍ୟୟ ସମିତିର ୧୭ ତମ ବାର୍ଷିକ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ମୁଖ୍ୟ ଅତିଥି ଭାବେ ବରିଷ୍ଠ ବିଜେପି ନେତା ତଥା ବିଡିଏ କର୍ମଚାରୀ ୟୁନାଇଟେଡ୍ ଫୋରମ୍ ସଭାପତି ସମୀର ମହାନ୍ତି ଯୋଗଦେଇଥିଲେ।
ଏହି ଅବସରରେ ସେ କହିଛନ୍ତି, ବିଡିଏ ସହ ମୋର ବହୁ ଦିନର ସମ୍ପର୍କ। ପ୍ରଥମ ଚାକିରି ଏଠାରୁ ଆରମ୍ଭ କରିଥିଲି। ଏଣୁ କର୍ମଚାରୀଙ୍କ ସୁବିଧା ଅସୁବିଧା ସହ ଅଙ୍ଗାଙ୍ଗୀ ଭାବେ ଜଡ଼ିତ। କର୍ମଚାରୀମାନେ ଏବେ ପେନ୍ସନ୍ ପାଇବା ପାଇଁ ଲଢ଼େଇ କରୁଛନ୍ତି। ଆଇନ ଅନୁସାରେ ଯାହା ପଦକ୍ଷେପ ନିଆଯାଇପାରିବ ତାହା ନିଶ୍ଚୟ ହେବ।
ଏକାମ୍ର ବିଧାୟକ ବିଧାୟକ ବାବୁ ସିଂ କହିଛନ୍ତି, ବିଡିଏ କର୍ମଚାରୀଙ୍କ ପେନ୍ସନ୍ ପାଇଁ ସରକାର ବେଶ୍ ଅବଗତ ଅଛନ୍ତି। ଯେତେଶୀଘ୍ର ସମ୍ଭବ ସରକାର କର୍ମଚାରୀଙ୍କ ଏହି ସମସ୍ୟା ସମାଧାନ କରିବେ।
ବରିଷ୍ଠ ବିଜେପି ନେତା ଜଗନ୍ନାଥ ପ୍ରଧାନ କହିଛନ୍ତି ଯେ ବିଡିଏରୁ ଯେଉଁମାନେ ଅବସର ନେଉଛନ୍ତି ସେମାନଙ୍କର କୌଣସି ରୋଜଗାରର ସୁଯୋଗ ନଥାଏ । ଏଣୁ ଏମାନଙ୍କ ପାଇଁ ପେନ୍ସନ୍ ଅପରିହାର୍ଯ୍ୟ। ସେଥିପାଇଁ ସରକାର ଏହାକୁ ଗୁରୁତ୍ୱର ସହ ନେଇଛନ୍ତି। ଆମେ ଆଶା କରିବୁ କି କର୍ମଚାରୀଙ୍କ ଏହି ଦାବି ତୁରନ୍ତ ପୂରଣ ହେବ।
ସେହିପରି ସମିତି ସଭାପତି ଶୁଭ୍ରାଂଶୁ ଶେଖର ମହାନ୍ତି କହିଛନ୍ତି, “ଆମେ ଦେଖିଛୁ ସ୍ୱଳ୍ପ ରୋଜଗାର କରୁଥିବା ସାଧାରଣ କର୍ମଚାରୀଟିଏ ଅର୍ଥାଭାବ ସମୟରେ କିଭଳି ହତାଶ ହେଉଥାଏ । ବ୍ୟାଙ୍କ୍ରୁ ଋଣ ନ ପାଇ ବିିକଳ ହେଉଥାଏ । ସେତେବେଳେ କର୍ମଚାରୀ ସମର୍ଥନରେ ସମିତି ଦୃଢ଼ ଭାବରେ ଛିଡ଼ା ହୋଇଥିଲା । ୨୦ ହଜାର ଟଙ୍କାରୁ ଆରମ୍ଭ ହୋଇଥିବା ଋଣର ପରିମାଣ ଏବେ ୫ଲକ୍ଷରେ ପହଂଚିଲାଣି । ଆମେ ପୂର୍ବରୁ ଖୋର୍ଦ୍ଧା ସମବାୟ ବ୍ୟାଙ୍କ୍ରୁ ଋଣ ଆଣି କର୍ମଚାରୀଙ୍କୁପ୍ରଦାନ କରୁଥିଲୁ । ଆମେ ଆପଣମାନଙ୍କ ଅକୁଣ୍ଠ ସହଯୋଗ ବଳରେ ଆଜି ସ୍ୱାବଲମ୍ବୀ ହେଇଛୁ । ସମିତି ନିଜସ୍ୱ ବଳରେ ଏହି ଋଣ ପ୍ରଦାନ କରିପାରୁଛି । ଏହି ୫ ଲକ୍ଷ ଋଣର ପରିମାଣକୁ ଆମେ ଆଗକୁ ୭ଲକ୍ଷ କରିବାକୁ ଚିନ୍ତା କରିଛୁ ।
ଅର୍ଥ ସଦସ୍ୟ ରୁଦ୍ରନାରାୟଣ ଆଚାର୍ଯ୍ୟ ପେନ୍ସନ୍ କିଭଳି ହୋଇପାରିବ ସେ ନେଇ ଆମର ମାନସମନ୍ଥନ ଜାରି ରହିଛି । ଏ ନେଇ ଆମେ ସମିତିକୁ ସମସ୍ତ ପ୍ରକାରର ସହଯୋଗ କରିବୁ । ସମ୍ପାଦକ କୁଳମଣୀ ଦାସ ବାର୍ଷିକ ବିବରଣୀ ପାଠ କରିଥିଲା ବେଳେ ଉପସଭାପତି ସୁବାସିନୀ ପରିଡ଼ା ଧନ୍ୟବାଦ ଦେଇଥିଲେ। ଅବସର ନେଇଥିବା କର୍ମଚାରୀଙ୍କୁ ଉପହାର ପ୍ରଦାନ କରାଯିବା ସହ ସମ୍ବର୍ଦ୍ଧିତ କରାଯାଇଥିଲା। ବୋର୍ଡ ଅଫ୍ ଡାଇରେକ୍ଟରର୍ସ ପ୍ରମୋଦ କୁମାର ମିଶ୍ର, କୃଷ୍ଣଚନ୍ଦ୍ର ମିଶ୍ର, କେଦାର କୁମାର ଭୋଳ, କେଦାର ପୃଷ୍ଟି, ଚରଣ ଭୋଇ ସହଯୋଗ କରିଥିଲା ବେଳେ ମଞ୍ଚ ପରିଚାଳନା କରିଥିଲେ ବିରଜା ରଥ।
Comments are closed.