ରଣପୁର: ରଣପୁର ବ୍ଲକ ଅନ୍ତର୍ଗତ ଲୋଧାଚୁଆ ଛକଠାରେ ଏକ ମର୍ମନ୍ତୁତ ସଡ଼କ ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ଦୁଇ ଜଣ ବାଇକ ଆରୋହୀଙ୍କ ମୃତ୍ୟୁ ଘଟିଥିବା ବେଳେ ଜଣେ ଗୁରୁତର ଆହତ ହୋଇଛନ୍ତି।
ସୂଚନା ଅନୁସାରେ, ରଣପୁର ଏନଏସି ୯ ନମ୍ବର ମଣିନାଗ ସାହିର ବାସୁଦେବ ମହାପାତ୍ରଙ୍କ ପୁଅ କାଳିଆ ମହାପାତ୍ର (୩୦) ଓ ୧୨ନମ୍ବର ୱାର୍ଡ ନୂଆଗାଁର ସୁଶାନ୍ତ ରଣା (୩୫) ମିଶି ସଂନ୍ଧ୍ୟା ସମୟରେ ଏକ ବାଇକ ଯୋଗେ ରଣପୁରରୁ କୋଟଗଡ ଅଭିମୁଖେ ଯାଉଥିଲେ। ରଣପୁର ବ୍ଲକ ଅନ୍ତର୍ଗତ ଲୋଧାଚୁଆ ଛକଠାରେ ଏକ ଘରୋଇ ଯାତ୍ରୀବାହୀ ବସକୁ ଅତିକ୍ରମ କରୁଥିବାବେଳେ ସମ୍ମୁଖ ପଟୁ ଚାନ୍ଦପୁର ଗାଁର ଅନ୍ତର୍ଯ୍ୟାମୀ ସାହୁଙ୍କ ପୁଅ ବିଜୟ ସାହୁ (୩୭) ଏକ ବାଇକ ଯୋଗେ ହଠାତ ପଶି ଆସିବାରୁ ଉଭୟ ବାଇକ ମଧ୍ୟରେ ମୁଁହାମୁହିଁ ଧକ୍କା ହୋଇଥିଲା।
ଫଳରେ କାଳିଆ ଓ ବିଜୟଙ୍କ ମୃତ୍ୟୁ ଘଟିଥିବାବେଳେ ସୁଶାନ୍ତ ଗୁରୁତର ଆହତ ହୋଇଥିବା ଜାଣିବାକୁ ମିଳିଛି। ଆହତ ସୁଶାନ୍ତଙ୍କୁ ଅତି ସଂକଟାପନ୍ନ ଅବସ୍ଥାରେ ପ୍ରାଥମିକ ଚିକିତ୍ସା ନିମନ୍ତେ ପ୍ରଥମେ ରଣପୁର ଏବଂ ପରେ ଭୁବନେଶ୍ୱର ସ୍ଥାନାନ୍ତର କରାଯାଇଥିବା ସୂଚନା ମିଳିଛି।