ଶ୍ରୀନଗର: ବଢିଲା ସହିଦଙ୍କ ସଂଖ୍ୟା । ଗତକାଲି ଜମ୍ମୁ କଶ୍ମୀରର ବାନ୍ଦିପୋରାଠାରେ ଘଟିଥିବା ସେନା ଗାଡି ଦୁର୍ଘଟଣାରେ ବଢିଛି ଯବାନଙ୍କ ସହିଦ ସଂଖ୍ୟା । ଗତକାଲି ୨ଜଣ ଯବାନ ସହିଦ ହୋଇଥିବା ବେଳେ ଚିକିତ୍ସିତ ଅବସ୍ଥାରେ ଆଜି ଆଉ ୨ଜଣ ଯବାନ ସହିଦ ହୋଇଛନ୍ତି । ଏହାକୁ ମିଶାଇ ସହିଦଙ୍କ ସଂଖ୍ୟା ୪ରେ ପହଞ୍ଚିଛି । ବର୍ତ୍ତମାନ ହସ୍ପିଟାଲରେ ଆଉ ୨ଜଣ ଯବାନ ଚିକିତ୍ସିତ ହେଉଛନ୍ତି ।
ସୂଚନା ଅନୁସାରେ, ଉତ୍ତର କଶ୍ମୀର ଜିଲ୍ଲାର ପାୟନ ନିକଟରେ ଗତକାଲି ଏକ ସେନା ଗାଡି ରାସ୍ତାରୁ ଖସି ଖାଇକୁ ଖସିପଡିଥିଲା । ଦୁର୍ଘଟଣା ପରେ ପୋଲିସ ଏବଂ ସେନା ଯବାନଙ୍କ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଥିଲା । ତେବେ ଦୁର୍ଘଟଣାର କାରଣ ଜଣାପଡିନଥିବା ବେଳେ ଘଟଣାସ୍ଥଳରେ ୨ ଜଣ ଯବାନ ସହିଦ ହୋଇଥିଲେ । ବାକି ୪ଜଣଙ୍କୁ ଶ୍ରୀନଗର ସ୍ଥାନାନ୍ତର କରାଯାଇଥିଲା । ସେଠାରେ ଆଜି ଆଉ ୨ଜଣ ଯବାନ ସହିଦ ହୋଇଛନ୍ତି ।
କେଉଁ କାରଣରୁ ଗାଡି ଘାଟିକୁ ଖସିଲା ତାର କାରଣ ଏବେସୁଦ୍ଧା ଅସ୍ପଷ୍ଟ ରହିଥିବା ବେଳେ ଘଟଣାସ୍ଥଳରେ ପୋଲିସ ପକ୍ଷରୁ ତଦନ୍ତ ଜାରି ରହିଛି । ତେବେ ବର୍ତ୍ତମାନ କାଶ୍ମୀରରେ ଶୀତର ପ୍ରବାହ ଜାରିି ରହିଥିବା ବେଳେ ଘନ କୁହୁଡିର ଆସ୍ତରଣ ରହିଛି । ରାଜପଥରେ ଅନେକ ସ୍ଥାନରେ ବରଫ ମଧ୍ୟ ଜମା ହୋଇରହିଥିବାରୁ ରାସ୍ତା ଦୃଶ୍ୟମାନ ହେଉନାହିଁ । ଯେଉଁଥିପାଇଁ ଏହି ଦୁର୍ଘଟଣା ଘଟିଥାଇପାରେ ବୋଲି ଅନୁମାନ କରାଯାଉଛି ।
ସୂଚନାଯୋଗ୍ୟ, ଅନ୍ୟପଟେ ଗତ ମାସରେ ମଧ୍ୟ ପୁଞ୍ଛ ଜିଲ୍ଲାରେ ଏହିଭଳି ସେନା ଦୁର୍ଘଟଣା ଘଟିଥିଲା । ଯେଉଁଥିରେ ୫ ସେନାଙ୍କ ମୃତ୍ୟୁ ହୋଇଥିବା ବେଳେ ୫ ଜଣ ଆହତ ହୋଇଥିଲେ ।