ଭୁବନେଶ୍ୱର: ଦିନ ଦ୍ବିପ୍ରହରେ ଏକାକୀ ଘରର ସ୍ଥାନକୁ ଟାର୍ଗେଟ କରୁଥିଲେ ଚୋର ଗ୍ୟାଙ୍ଗ୍। ଲୋକଙ୍କ ଘରେ ପ୍ରବେଶ କରି ଚତୁରତାର ସହ ଲ୍ୟାପଟପ୍, ମୋବାଇଲ୍ ଫୋନ୍, ଟ୍ୟାବ୍ ଏବଂ ସୁନା ଅଳଙ୍କାର ଚୋରି କରିବା ପରେ ଖସିଯାଉଥିଲେ। ଏହି ଗ୍ୟାଙ୍ଗକୁ ଧରିବାରେ ସଫଳ ହୋଇଛି ଭରତପୁର ଥାନା ପୋଲିସ।
ସୂଚନା ଅନୁସାରେ ଗତକାଲି ଅଭିଯୋଗକାରିଣୀ ତାଙ୍କର ଡ୍ରଇଁ ରୁମରେ ବସିଥିବା ସମୟରେ 4 ଜଣ ଅଭିଯୁକ୍ତ ତାଙ୍କର ଘରେ ଚୋରି କରିବା ଉଦ୍ଦେଶ୍ୟରେ ପ୍ରବେଶ କରିଥିଲେ। ଅଭିଯୁକ୍ତମାନେ ମହିଳାଙ୍କ ସାମନାରେ ଗୋଟିଏ ପରେ ଗୋଟିଏ ଲ୍ଯାପଟପ୍ ଚୋରି କରି ନେଇ ଯାଉଥିଲେ। ଅଭିଯୋଗକାରିଣୀ ସେମାନଙ୍କୁ ଅଟକାଇବାକୁ ଚେଷ୍ଠା କରିବା ସମୟରେ ସେମାନେ କୌଶଳ କ୍ରମେ ଘଟଣାସ୍ଥଳରୁ ଖସି ପଳାଇଥିଲେ। ଏନେଇ ଭରତପୁର ଥାନାରେ ମହିଳା ଅଭିଯୋଗ କରିବା ପରେ ପୋଲିସ ତଦନ୍ତ କରି ବିଶେଷ ସୂତ୍ରରୁ ଖବର ପାଇ 4 ଅଭିଯୁକ୍ତଙ୍କୁ କାବୁ କରିବାରେ ସକ୍ଷମ ହୋଇଥିଲା।
ପୋଲିସ ତଦନ୍ତ ବେଳେ ଜାଣିବାକୁ ପାଇଥିଲା ଯେ, ଅଭିଯୁକ୍ତମାନେ ବିଶେଷକରି ଦିନରେ ଏକାକୀ ଘରର ସ୍ଥାନକୁ ଟାର୍ଗେଟ କରୁଥିଲେ ଓ ସେମାନେ ସ୍ଥାନୀୟ ଲୋକଙ୍କ ଘରେ ପ୍ରବେଶ କରି ଚତୁରତାର ସହ ଲ୍ୟାପଟପ୍, ମୋବାଇଲ୍ ଫୋନ୍, ଟ୍ୟାବ୍ ଏବଂ ସୁନା ଅଳଙ୍କାର ଚୋରି କରିବା ପରେ ଖସିଯାଉଥିଲେ। ପଚରା ଉଚରା ବେଳେ ଅଭିଯୁକ୍ତମାନେ ସେମାନଙ୍କର ଅପରାଧ ସ୍ଵୀକାର କରିଥିଲେ। ପୋଲିସ ଅଭିଯୁକ୍ତ ମାନଙ୍କର ହେପାଜତରୁ ୫ଟି ଲ୍ୟାପଟପ, ୬ଟି ମୋବାଇଲ ଫୋନ, ୨ଟି ଆଇ ପ୍ୟାଡ଼, ୧୦୦ ଗ୍ରାମର ସୁନା ଅଲଙ୍କାର ଓ ୧୫୦ ଗ୍ରାମର ରୂପା ଅଳଙ୍କାର ଜବତ କରିଛି। ଏହି ମାମଲାର ଅଧିକ ତଦନ୍ତ ଚାଲୁ ରହିଥିବା ବେଳେ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ।
Comments are closed.