ମୁମ୍ବାଇ: ଆଜିକାଲି ଅଧିକାଂଶ ଲୋକ ଘରେ କୁକୁର ରଖିବାକୁ ଭଲ ପାଆନ୍ତି । ସେମାନେ ତାଙ୍କ କୁକୁରକୁ ଘରର ସଦସ୍ୟ ଭାବେ ଯତ୍ନ ନେଇଥାନ୍ତି । ଆଉ ବାହାରକୁ ଯୁଆଡ଼େ ଗଲେ ବି ସାଙ୍ଗରେ ତାଙ୍କ ପୋଷା କୁକୁରକୁ ନେଇକି ମଧ୍ୟ ଯାଇଥାନ୍ତି । ଏବେ ମୁମ୍ବାଇର ଜଣେ ସୁରକ୍ଷାକର୍ମୀ ତାଙ୍କ ପୋଷା କୁକୁରକୁ ସାଇକେଲ ଆଗରେ ଝୁଲାଇ ପ୍ରତ୍ୟେକ ଦିନ କାମକୁ ଯାଇଥାନ୍ତି । ଏହାର ଏକ ଭିଡ଼ିଓ ଏବେ ସୋସିଆଲ ମିଡ଼ିଆରେ ଖୁବ୍ ଭାଇରାଲ ହେବାରେ ଲାଗିଛ । ଯାହାକୁ ଦେଖି ସୁରକ୍ଷାକର୍ମୀଙ୍କ କୁକୁର ପ୍ରତି ଭଲ ପାଇବାକୁ ଢେର ପ୍ରଶଂସା କରିଛନ୍ତି ।
ମୁମ୍ବାଇର ବୋରିଭିଲିରୁ ଏହି ଘଟଣା ସାମ୍ନାକୁ ଆସିଛି । ଏଠାରେ ଥିବା ଏକ ବିଳାସପୂର୍ଣ୍ଣ ହାଉସିଂ ସୋସାଇଟି ‘କ୍ୱିନ୍ ଲନ୍’ରେ ଜଣେ ୭୦ବର୍ଷୀୟ ସୁରକ୍ଷାକର୍ମୀ କାମ କରନ୍ତି । ତାଙ୍କ ନାମ ହେଉଛି ଗୁପ୍ତାଜୀ । ଗୁପ୍ତାଜୀ ପ୍ରତିଦିନ ଡିୟୁଟିକୁ ଆସିବା ସମୟରେ ତାଙ୍କ ପୋଷାକୁକୁରକୁ ସାଥୀରେ ନେଇ ଆସିଥାଆନ୍ତି । ଡିୟୁଟି କରିବା ସମୟରେ ଉକ୍ତ ପୋଷାକୁକୁର ଗୁପ୍ତାଙ୍କ ପାଖରେ ଥାଏ । ଡିୟୁଟି ଶେଷ ହେବା ପରେ ଦୁହେଁ ସାଇକେଲରେ ପୁଣି ଘରକୁ ଚାଲି ଯାଇଥାଆନ୍ତି ।
ଏ ନେଇ ଗୁପ୍ତାଜୀ କହିଛନ୍ତି, ମୁଁ ମୋର ପୋଷାକୁକୁର ଟାଇଗରକୁ ଧରି ପ୍ରତିଦିନ ଡିୟୁଟି ପାଇଁ ୨୦କିମି ବାଟ ସାଇକେଲ ଚଲାଇ ଯାଇଥାଏ । ଏହି ସମୟରେ ଟାଇଗରକୁ ଏକ ବ୍ୟାଗରେ ପୁରାଇ ସାଇକେଲରେ ଟାଙ୍ଗି ଦେଇଥାଏ । ସେ ବି ବିଚଳିତ ନହୋଇ ସ୍ଥିର ହୋଇ ବସିଥାଏ । ତା’ବିନା ମୋତେ ଗୋଟିଏ ବି ମୁହୂର୍ତ୍ତ ଭଲ ଲାଗେ ନାହିଁ । ସେ ମୋ ସାଥୀରେ ଥିଲେ ମୁଁ ଶାନ୍ତିରେ ଡିୟୁଟି ସାରି ତାକୁ ନେଇ ଘରକୁ ଫେରିଥାଏ । ଘରେ ପହଁଞ୍ଚିବା ପରେ ଆମେ ଖିଆପିଆ ସାରି ଶୋଇପଡ଼ିଥାଉ । ପୁଣି ତା’ପରଦିନ ନିତ୍ୟକର୍ମ ସାରି ଡିୟୁଟିରେ ବାହାରି ଯାଇଥାଉ ।
Comments are closed.