ନୂଆଦିଲ୍ଲୀ: ଆଜି ପିଙ୍କ ସିଟି ଜୟପୁର ଚଳଚଞ୍ଚଳ ହୋଇପଡିଛି। ଭାରତୀୟ ସେନାର ୭୮ତମ ସେନା ଦିବସ ପାଳନ ପାଇଁ ଗୁରୁବାର ସକାଳ ୧୦:୦୦ ଟାରେ ଜୟପୁରର ଜଗତପୁରାର ମହଲ ରୋଡରେ ଏକ ଭବ୍ୟ ଏବଂ ଐତିହାସିକ ସେନା ଦିବସ ପରେଡ୍ ଅନୁଷ୍ଠିତ ହେଉଛି।
ଏହି କାର୍ଯ୍ୟକ୍ରମ କେବଳ ରାଜସ୍ଥାନ ପାଇଁ ନୁହେଁ ବରଂ ସମଗ୍ର ଦେଶ ପାଇଁ ଐତିହାସିକ। କାରଣ ପ୍ରଥମ ଥର ପାଇଁ ସେନା ଏହାର ବାର୍ଷିକ ପରେଡକୁ ଏକ ସାମରିକ ଛାଉଣୀର ଘେରାବନ୍ଦୀରୁ ବାହାର କରି ଜନସାଧାରଣଙ୍କ ନିକଟରେ ପହଞ୍ଚାଇବାକୁ ନିଷ୍ପତ୍ତି ନେଇଥିଲା।
ତେବେ ପ୍ରତିବର୍ଷ ଜାନୁଆରୀ ୧୫ ତାରିଖରେ ସେନା ଦିବସ ପାଳନ କରାଯାଏ। ୧୯୪୯ ମସିହାରେ ଏହି ଦିନରେ ଫିଲ୍ଡ ମାର୍ଶାଲ କେ.ଏମ୍. କାରିଆପ୍ପା ଶେଷ ବ୍ରିଟିଶ କମାଣ୍ଡର-ଇନ୍-ଚିଫ୍ ଜେନେରାଲ ଫ୍ରାନ୍ସିସ୍ ବୁଚରଙ୍କଠାରୁ ଭାରତୀୟ ସେନାର କମାଣ୍ଡ ଗ୍ରହଣ କରିଥିଲେ। ଜୟପୁରରେ ଆୟୋଜିତ ଆଜିର କାର୍ଯ୍ୟକ୍ରମ ସେହି ଗୌରବମୟ ଐତିହ୍ୟ ଏବଂ ଆଧୁନିକ ଭବିଷ୍ୟତର ଏକ ସଙ୍ଗମ ପାଲଟିଛି।
ଆଜିର ପରେଡରେ ସମଗ୍ର ବିଶ୍ୱର ନଜର “ଭୈରବ ବାଟାଲିଅନ୍” ଉପରେ ରହିଥିଲା। ଯାହାକୁ ପ୍ରଥମ ଥର ପାଇଁ ସାର୍ବଜନୀନ ଭାବରେ ଉନ୍ମୋଚିତ କରାଯାଇଥିଲା। ଏହା ପାରା ସ୍ପେଶାଲ୍ ଫୋର୍ସ ଏବଂ ନିୟମିତ ପଦାତିକ ବାହିନୀ ମଧ୍ୟରେ ଏକ ସେତୁ ଭାବରେ କାର୍ଯ୍ୟ କରେ। ଏହି ବାଟାଲିୟନକୁ ଡ୍ରୋନ୍-ଆଧାରିତ ଯୁଦ୍ଧ ଏବଂ ବହୁ-ଡୋମେନ୍ ଅପରେସନ୍ ପାଇଁ ସ୍ୱତନ୍ତ୍ର ଭାବରେ ତାଲିମ ଦିଆଯାଇଛି। ଅପରେସନ୍ ସିନ୍ଦୂରର ଅଭିଜ୍ଞତା ଏହି ବାଟାଲିୟନକୁ ପ୍ରତିଷ୍ଠା କରିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା। କଷ୍ଟକର ଏବଂ ଦୁର୍ଗମ ଅଞ୍ଚଳରେ ଶତ୍ରୁ ସ୍ଥିତି ବିରୁଦ୍ଧରେ ସଠିକ୍ ଏବଂ ଦ୍ରୁତ ଆକ୍ରମଣ କରିବାର କ୍ଷମତା ଏହାକୁ ଭିନ୍ନ କରିଥାଏ।