ଭୁବନେଶ୍ୱର: ଗିରଫ ଆଇଏଫଏସ ଅଧିକାରୀ ଅଭୟ କାନ୍ତ ପଠକ ଏବଂ ତାଙ୍କ ପୁଅ ଆକାଶ ପଠକଙ୍କ ପାଇଁ ବଢ଼ିଲା ଅଡ଼ୁଆ। ପାଠକ ବାପପୁଅଙ୍କ ବିରୋଧରେ ରୁଜୁ ହୋଇଛି ଆଉ ଏକ ନୂଆ ଠକେଇ ମାମଲା । ଭୁବନେଶ୍ୱର ସ୍ଥିତ ଟ୍ରାଭେଲ ଏଜେନ୍ସି ‘ସ୍କାଏକିଙ୍ଗ’ର ପରିଚାଳନା ସହଯୋଗୀ ଅଭୟ ଏବଂ ଆକାଶଙ୍କ ବିରୋଧରେ ଖାରବେଳ ନାଗର ପୋଲିସ ଷ୍ଟେସନରେ ଅଭିଯୋଗ ଦାଖଲ କରିଛନ୍ତି।
ଅଭିଯୋଗ ଅନୁଯାୟୀ, ପାଠକ ବାପପୁଅ ଏହି କମ୍ପାନୀକୁ ୬୫ ଲକ୍ଷରୁ ଅଧିକ ଟଙ୍କା ଠକିଛନ୍ତି। ଟ୍ରାଭେଲ ଏଜେନ୍ସି ଅଭିଯୋଗ କରିଛି ଯେ, ଆକାଶ ନିଜକୁ ଟାଟା ମୋଟର୍ସ ଲିମିଟେଡ (ଟିଏମଏଲ) ର ପରିଚାଳନା ନିର୍ଦ୍ଦେଶକର ପରିଚୟ ଦେଇ ବିଭିନ୍ନ ସ୍ଥାନ ପାଇଁ ଚାର୍ଟାର୍ଡ ଫ୍ଲାଇଟ୍, ଏୟାର ଟିକେଟ୍ ଏବଂ ହୋଟେଲ ବୁକ୍ କରିଛନ୍ତି। ସେମାନଙ୍କର ମୋଟ ବିଲ୍ ପ୍ରାୟ ୨.୭୮ କୋଟି ଟଙ୍କା ଥିଲା। ମାତ୍ର ସେମାନେ ୨.୧୩ କୋଟି ଟଙ୍କା ଦେଇ ବାକି ୬୫,୧୬,୨୩୩ ଟଙ୍କା ଦେବାକୁ ମନା କରି ଦେଇଛନ୍ତି ବୋଲି ଅଭିଯୋଗକାରୀ କହିଛନ୍ତି।
ସେ ଆହୁରି ମଧ୍ୟ ଅଭିଯୋଗ କରିଛନ୍ତି ଯେ, ଏଜେନ୍ସି ବକେୟା ଦେୟ ପୈଠ କରେଇବାକୁ ପାଠକ ବାପପୁଅଙ୍କୁ ଅନୁରୋଧ କରିବାରୁ ଏହାର ଭୟାବହ ପରିଣାମ କର୍ମଚାରୀଙ୍କୁ ଭୋଗିବାକୁ ପଡିବ ବୋଲି ସେମାନେ ଧମକ ଦେଇଥିବା ଜଣାପଡିଛି। ଏହି ମାମଲା ଥାନାରେ ଦାୟର ହେବା ପରେ ବୁଧବାର ସକାଳେ କମିଶନରେଟ ପୋଲିସର ଏକ ଟିମ୍ ଟ୍ରାଭେଲ୍ ଏଜେନ୍ସି କାର୍ଯ୍ୟାଳୟକୁ ଯାଇ ବୁକିଂ ପାଇଁ ଆକାଶଙ୍କ ଦ୍ୱାରା ଦାଖଲ ହୋଇଥିବା କିଛି କାଗଜପତ୍ର ଜବତ କରିଥିବା ଜଣାପଡିଛି।
ସୂଚନାଯୋଗ୍ୟ, ଆୟବହିର୍ଭୁତ ସମ୍ପତ୍ତି ଠୁଳ ଅଭିଯୋଗରେ ଅଭୟ ପାଠକଙ୍କୁ ଭିଜିଲାନ୍ସ ଗିରଫ କରିଥିବାବେଳେ ଆକାଶ ପାଠକ ଠକେଇ ଅଭିଯୋଗର ସମ୍ମୁଖୀନ ହୋଇଛନ୍ତି।
Comments are closed.