ବ୍ରହ୍ମପୁର: ଗଞ୍ଜାମ ଜିଲା ସାନଖେମୁଣ୍ଡି ବ୍ଲକ ଖଲିଙ୍ଗୀ ହାଇସ୍କୁଲର କମ୍ପୁଟର୍ ଶିକ୍ଷକ ନଳିନୀକାନ୍ତ ସାହୁ ଗୋବରରେ ଦୀପ ପ୍ରସ୍ତୁତ କରୁଛନ୍ତି। ଏଥି ସହିତ ପ୍ରଦୁଷଣ ମୁକ୍ତ ଦୀପାବଳି ନେଇ ବାର୍ତ୍ତା ଦେଉଛନ୍ତି। ତାଙ୍କର ଏଭଳି କାର୍ଯ୍ୟକୁ ନେଇ ଅଞ୍ଚଳରେ ଚର୍ଚ୍ଚା ଲାଗି ରହିଥିବା ସହ ଅନେକ ପ୍ରଶଂସା କରୁଛନ୍ତି।
ଶିକ୍ଷକ ନଳିନୀକାନ୍ତଙ୍କ କହିବାନୁଯାୟୀ, ଗୋବରରେ ଦୀପ ସହିତ ଧୂପ, ଷ୍ଟାଣ୍ଡ, ହ୍ୟାଙ୍ଗିଙ୍ଗ ଗଣେଶ ଏବଂ ବିଭିନ୍ନ ଦେବାଦେବୀଙ୍କ ମୂର୍ତ୍ତି ପ୍ରସ୍ତୁତ କରୁଛନ୍ତି। ଦୀପାବଳି ଆଉ ଅଳ୍ପ ଦିନ ରହିଥିବା ବେଳେ ବଜାରର ଚାହିଦାକୁ ଦେଖି ଦୀପ ପ୍ରସ୍ତୁତିରେ ବ୍ୟସ୍ତ ରହୁଛନ୍ତି। ତେବେ ଏଥିପାଇଁ ସେ କୌଣସି ପ୍ରକାର ବିଧିବଦ୍ଧ ପ୍ରଶିକ୍ଷଣ ନେଇନାହାନ୍ତି। ବରଂ ୟୁଟ୍ୟୁବ୍ରୁ ଦେଖି ଶିଖିଛନ୍ତି। ସମାଜକୁ କିଛି ନୁଆଁ ବାର୍ତା ଦେବା ଲକ୍ଷ୍ୟରେ ଏଭଳି ପଦକ୍ଷେପ ନେଇଥିବା ପ୍ରକାଶ କରିଛନ୍ତି। ଗୋବରକୁ ଘଷିରେ ପରିଣତ କରିବା ପରେ ତାହାକୁ ଗୁଣ୍ଡ କରାଯାଉଛି। ଏକ ସ୍ବତନ୍ତ୍ର ପ୍ରକାର ଅଠା ଲଗାଇ ଛାଞ୍ଚରେ ପକାଇ ଦୀପ ସହ ଅନ୍ୟାନ୍ୟ ସାମଗ୍ରୀ ଓ ମୂର୍ତ୍ତି ପ୍ରସ୍ତୁତ ହେଉଛି। ବିଭିନ୍ନ ଆକାରର ଦୀପ ତିଆରି କରାଯାଉଛି। ଏହାକୁ ଅନଲାଇନରେ ବିକ୍ରି କରାଯାଉଛି। ରବିବାର ଛୁଟି ଦିନରେ ବ୍ରହ୍ମପୁର ସହରକୁ ଆସି କେତେକ ଦୋକାନକୁ ସାମଗ୍ରୀ ଯୋଗାଣ ହେଉଛି। ବିଦ୍ୟାଳୟରେ ପାଠପଢ଼ା ପରେ ବଳକା ସମୟକୁ ନଷ୍ଟ କରି ରୋଜଗାର ମାଧ୍ୟରେ ଆତ୍ମ ସନ୍ତୋଷ ମିଳୁଥିବା କହିଛନ୍ତି ଶିକ୍ଷକ ନଳିନୀକାନ୍ତ। ଗୋବର ଦୀପ ଜଳିଲେ ଘରେ ଅମ୍ଳଜାନ ସହ ଘରର ନେଗେଟିଭ ଏନର୍ଜୀ ମଧ୍ୟ ହ୍ରାସ ପାଇଥାଏ। ଫିଙ୍ଗା ଯାଉଥିବା ଗୋବର ଯଦି କାମରେ ଆସି ଏଭଳି ମୂଲ୍ୟବାନ ହୋଇପାରୁଛି, ତେବେ ଅନ୍ୟମାନେ ମଧ୍ୟ ଏହାର ସଠିକ ବ୍ୟବହାର କରିବା ଆବଶ୍ୟକ ବୋଲି ସେ ପ୍ରକାଶ କରିଛନ୍ତି। ପତ୍ନୀ ଦୀପ୍ତିମୟୀଙ୍କ କହିବାନୁଯାୟୀ, ସବୁଦିନ ବିଦ୍ୟାଳୟରୁ ଫେରି ନିଜ ମୋବାଇଲରେ ୟୁଟ୍ୟୁବ୍ ଦେଖୁଥିଲେ। ପିଲାମାନଙ୍କୁ ଭିନ୍ନ ଧରଣରେ କେମିତି ପାଠପଢ଼ା ହୋଇପାରିବ, ତାହା ଶିଖୁଥିଲେ। ହଠାତ ଦିନେ ଗୋବରରେ ଦୀପ ପ୍ରସ୍ତୁତି ବିଷୟେର ଭିଡ଼ିଓ ଦେଖିଲେ। ମୋତେ ଦେଖାଇବା ସହିତ ଦୀପ ପ୍ରସ୍ତୁତ କରିବାକୁ ଆଗଭର ହେଲେ। ଏଥିରେ ମୁଁ ମଧ୍ୟ ସହଯୋଗ କରିଥିଲି। ମସିନ କିଣିବା ପରେ ଘରେ ଦୀପ ତିଆରି ଆରମ୍ଭ କରିଥିଲୁ। ବର୍ତ୍ତମାନ ଏହାର ଚାହିଦା ବୃଦ୍ଧି ପାଉଥିବା ପତ୍ନୀ ଦୀପ୍ତିମୟୀ ପ୍ରକାଶ କରିଛନ୍ତି। ବିଦ୍ୟାଳୟର ପ୍ରଧାନ ଶିକ୍ଷୟିତ୍ରୀ ପ୍ରତିମା ରଇତ କୁହନ୍ତି, ପାଠପଢ଼ିଲେ କେବଳ ଚାକିରି ନୁହଁ, ଭିନ୍ନ କିଛି କରି ଆତ୍ମନିର୍ଭର ମଧ୍ୟ ହୋଇପାରିବ। ନଳିନୀକାନ୍ତ ଏହାର ବାର୍ତ୍ତା ଦେଉଛନ୍ତି। ଏଥି ସହିତ ପରିବେଶ ସୁରକ୍ଷା ପାଇଁ ସେ ଗୋବରରେ ଦୀପ ପ୍ରସ୍ତୁତି ନେଇ ଯେଉଁ ଅଭିଯାନ ଆରମ୍ଭ କରିଛନ୍ତି, ତାହା ପ୍ରଶଂସାଯୋଗ୍ୟ ବୋଲି ସେ କହିଛନ୍ତି।
BREAKING NEWS
- ବିଜେପି କେନ୍ଦ୍ରୀୟ ନେତାଙ୍କୁ ପଲିଟିକାଲ ଟୁରିଷ୍ଟ କହିଲେ ନବୀନ, କଡା ଜବାବ ଦେଲା ବିଜେପି
- ‘ହାରିବା ଭୟରେ ହିଂସାକୁ ଆପଣାଇଛି ବିଜେଡି’
- ଜଟଣୀରେ ଶ୍ରୀ କାର୍ତ୍ତିକ ପାଣ୍ଡିଆନଙ୍କ ପ୍ରଚାର
- ବଦଳିଲା ଟୁଇଟରର ଡୋମେନ ନେମ
- ‘ଓଡ଼ିଶାରେ ଚାଷୀଙ୍କ ଆୟ ଦେଶରେ ସର୍ବନିମ୍ନ ରହିଛି, ବିଜେପି ସରକାର ଆସିଲେ ଉପଯୁକ୍ତ ପ୍ରାପ୍ୟ ମିଳିବ’
- ଆଗ ନିଷ୍ପତ୍ତି ନିଅନ୍ତୁ, ତା’ପରେ କେଉଁ ରାଜ୍ୟକୁ ଏକ ନମ୍ୱର କରିବେ କହିବେ: ପାଣ୍ଡିଆନ
- କଣ୍ଟାବାଞ୍ଜିରେ `ନବୀନ’ କାର୍ଡ
- ସୁନ୍ଦରଗଡରେ ଜୁଏଲ୍ ନା ଦିଲ୍ଲୀପ ?
- ବାଜିବ ଶଙ୍ଖ ନା ଫୁଟିବ ପଦ୍ମ !
- ଗଙ୍ଗାଧର ମେହେରଙ୍କୁ ସନ୍ଥ କବି, ଭୀମ ଭୋଇଙ୍କୁ କେବଳ କବି କହି ସମ୍ବୋଧନ କଲେ ପାଣ୍ଡିଆନ