ମାଟ୍ରିକ ପରୀକ୍ଷା: କେଉଁଠି କପି ଅଭିଯୋଗ, ତ ଆଉ କେଉଁଠି ପରିଚାଳନରେ ତ୍ରୁଟି

ଭୁବନେଶ୍ୱର: ମାଧ୍ୟମିକ ଶିକ୍ଷା ପରିଷଦ (ବୋର୍ଡ) ଦ୍ୱାରା ପରିଚାଳିତ ମାଟ୍ରିକ୍ ପରୀକ୍ଷା-୨୦୨୩ରେ ବ୍ୟାପକ ଅନିୟମିତତା, କପି ଓ ଡ୍ରପ୍ ଆଉଟ୍ ଅଭିଯୋଗରେ ମାର୍ଚ୍ଚ ୧୦ ତାରିଖ ପ୍ରଥମ ଦିନରୁ ହିଁ ମାଟ୍ରିକ୍ ପରୀକ୍ଷା ବିଭ୍ରାଟ ଦେଖାଦେଇଛି। ସ୍କୁଲ ଓ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶଙ୍କ ନିଜ ଜିଲ୍ଲା ପୁରୀରେ ଏଭଳି ତ୍ରୁଟି ଦେଖିବାକୁ ମିଳିଛି।

ଗଣଶିକ୍ଷା ମନ୍ତ୍ରୀ ସମୀର ଦାଶଙ୍କ ନିର୍ବାଚନ ମଣ୍ଡଳୀ ନିମାପଡ଼ା ଅନ୍ତର୍ଗତ ହରିପୁର ଆଦର୍ଶ ଉଚ୍ଚ ବିଦ୍ୟାଳୟର କେନ୍ଦ୍ର ସୁପରିଟେଣ୍ଡେଣ୍ଟ ଓ ସମସ୍ତ ଇନଭିଜିଲେଟରଙ୍କୁ ମାଟ୍ରିକ ପରୀକ୍ଷା ଡ୍ୟୁଟିରୁ ବିରତି ଦେଇଛନ୍ତି ପୁରୀ ଡିଇଓ। ମାଟ୍ରିକ ପରୀକ୍ଷା ସମୟରେ ପରୀକ୍ଷାର୍ଥୀଙ୍କୁ କପିରେ ସହାୟତା କରିବା ପାଇଁ ଜଣେ ଅଭିଭାବକ ଏବଂ ଜଣେ ଶିକ୍ଷକଙ୍କ ମଧ୍ୟରେ ହୋଇଥିବା ଡିଲର କଥିତ ଅଡିଓ ମାର୍ଚ୍ଚ ୧୧ରେ ଭାଇରାଲ ହେବା ପରେ ଏହି ପଦକ୍ଷେପ ନିଆଯାଇଛି।

ବ୍ରହ୍ମଗିରି ବ୍ଲକର ଜଣେ ମହିଳା ଶିକ୍ଷୟିତ୍ରୀ ମଧ୍ୟ ପରୀକ୍ଷାରେ ତ୍ରୁଟି ପାଇଁ ପ୍ରଥମ ଦିନରେ ନିଲମ୍ବିତ ହୋଇଛନ୍ତି। ଛାତ୍ରଛାତ୍ରୀଙ୍କୁ ଆଦର୍ଶ ପରୀକ୍ଷା ପରିବେଶ ଯୋଗାଇବା ପାଇଁ ପୁରୀ ଜିଲ୍ଲା ସଙ୍ଘର୍ଷ କରୁଥିବା ବେଳେ ପରୀକ୍ଷାରେ ବହୁ ସଂଖ୍ୟାରେ ଅନୁପସ୍ଥିତ ରହିବା ପରୀକ୍ଷା ପରିଚାଳନା ଉପରେ ପ୍ରଶ୍ନବାଚୀ ସୃଷ୍ଟି କରିଛି।

କେବଳ ଏତିକି ନୁହେଁ, ସୋମବାର କାକଟପୁର ବାଳିକା ଉଚ୍ଚ ବିଦ୍ୟାଳୟର ପରୀକ୍ଷା କେନ୍ଦ୍ରରେ କିରାଣୀ ମାନସ ପରିଡାଙ୍କୁ ବିଭାଗୀୟ ବାରଣ ସତ୍ୱେ ସେ ପରୀକ୍ଷା ସମୟରେ ମୋବାଇଲ ବ୍ୟବହାର କରୁଥିବା ବେଳେ ଧରାପଡିବା ପରେ ଜିଲ୍ଲା ଶିକ୍ଷାଧିକାରୀ ତାଙ୍କୁ ନିଲମ୍ବନ କରିଛନ୍ତି। ସେହିପରି କାକଟପୁର ନିକଟସ୍ଥ ନୟାହାଟା ପରୀକ୍ଷା କେନ୍ଦ୍ରର ସୁପରିଟେଣ୍ଡେଣ୍ଟ ମଧ୍ୟ ଛାତ୍ରଛାତ୍ରୀଙ୍କ ଦୁର୍ବ୍ୟବହାର ଅଭିଯୋଗ ଆସିବା ପରେ ତାଙ୍କୁ କାର୍ଯ୍ୟରୁ ଅବ୍ୟାହତି ଦିଆଯାଇଛି।

ମିଳିଥିବା ସୂଚନା ଅନୁଯାୟୀ, ଆଡମିଟ୍ କାର୍ଡ ଜାରି ସତ୍ତ୍ୱେ ଓଡ଼ିଶାରେ ଏଯାଏ ମାଟ୍ରିକ୍ ପରୀକ୍ଷାରେ ଅତିକମରେ ୧୫ ହଜାର ଛାତ୍ରଛାତ୍ରୀ ଅନୁପସ୍ଥିତ ଥିବା ଦର୍ଶାଯାଇଥିଲା। ବାସ୍ତବରେ ଶନିବାର ପ୍ରଥମ ଦିନରେ କେବଳ ନବରଙ୍ଗପୁର ଜିଲ୍ଲାରୁ ୯୭୩ ଜଣ ଛାତ୍ରଛାତ୍ରୀ ଅନୁପସ୍ଥିତ ରହିଥିଲେ।

ଅନୁପସ୍ଥିତ ଥିବା ଛାତ୍ରଛାତ୍ରୀଙ୍କ ସମ୍ପର୍କରେ ମନ୍ତ୍ରୀ ସମୀର ଦାଶଙ୍କୁ ପଚାରିବାରୁ ସେ କହିଥିଲେ, ସରକାର ସବୁ ପରୀକ୍ଷା ଫର୍ମ ପୂରଣ କରି ଫି’ ଭରି ଦେଇଥିବାରୁ କିଛି ଛାତ୍ରଛାତ୍ରୀ ରହିଗଲେ। ଯଦି ସେମାନଙ୍କୁ ପୂର୍ବ ଭଳି ନିଜେ ଫି’ ଭରିବାକୁ ପଡ଼ନ୍ତା, ତେବେ ସେମାନେ ହୁଏତ ପ୍ରଥମ ସ୍ଥାନରେ ଫର୍ମ ପୂରଣ କରିନଥାନ୍ତେ।

ତେବେ ବିଭାଗ ଏ ଦିଗରେ ନିଶ୍ଚିତ ଦୃଷ୍ଟି ଦେବା ସହ ଏଥିରେ କିଭଳି ଉନ୍ନତି ଅଣାଯାଇ ପାରିବ ସେ ଦିଗରେ ପଦକ୍ଷେପ ନିଆଯିବ ବୋଲି ସମୀର ଦାଶ କହିଛନ୍ତି। ଅପରପକ୍ଷରେ ସମସ୍ତ ହାଇସ୍କୁଲର ପ୍ରଧାନ ଶିକ୍ଷକଙ୍କ ଓରିଏଣ୍ଟେସନ୍ କାର୍ଯ୍ୟକ୍ରମ କରାଯିବା ସହ ସମ୍ପୃକ୍ତ ଛାତ୍ରଛାତ୍ରୀଙ୍କ ଘରକୁ ଯାଇ ଡ୍ରପ୍ ଆଉଟର କାରଣ ଆକଳନ କରାଯିବ ବୋଲି ଗଣଶିକ୍ଷା ବିଭାଗ ସଚିବ କହିଛନ୍ତି।