ନୂଆଦିଲ୍ଲୀ:ଆତଙ୍କୀ ସଂଗଠନ ଖଲିସ୍ଥାନ ଲିବରେଶନ ଫୋର୍ସ (କେଏଲଏଫ)ର ପ୍ରମୁଖ ଅବତାର ସିଂହ ଖାଣ୍ଡାର ବର୍ମିଂହୋମର ସେଣ୍ଡବଲ ଡାକ୍ତରଖାନାରେ ମୃତ୍ୟୁ ଘଟିଛି । ଅବତାର ସିଂ ଖାଣ୍ଡା ଖଲିସ୍ତାନୀ ସମର୍ଥକ ଅମୃତପାଲ ସିଂଙ୍କ ଘନିଷ୍ଠ ସହଯୋଗୀ ଥିଲା । ମୃତ୍ୟୁର ପ୍ରକୃତ କାରଣ ଜଣା ପଡି ନ ଥିଲେ ହେଁ ରକ୍ତ କର୍କଟ କାରଣ ଯୋଗୁ ମୃତ୍ୟୁ ଘଟିଥିବା ଅନୁମାନ କରାଯାଉଛି । ଜାତୀୟ ଗଣମାଧ୍ୟମ ସୂଚନା ଅନୁଯାୟୀ, ୧୯ ମାର୍ଚ୍ଚରେ ଲଣ୍ଡନରେ ଥିବା ଭାରତୀୟ ଦୂତାବାସ ଆକ୍ରମଣର ସେ ଥିଲା ମାଷ୍ଟରମାଇଣ୍ଡ ।
ବ୍ରିଟେନରୁ ମିଳିଥିବା ସୂଚନା ଅନୁସାରେ, ଖାଣ୍ଡାଙ୍କ ସମର୍ଥକମାନେ ଚାହୁଁଛନ୍ତି ଯେ, ତାଙ୍କ ଖାଦ୍ୟରେ ବିଷ ଦିଆ ଯାଇଥିବା ପ୍ରମାଣ ମିଳୁ । କାରଣ ବିଷ ପ୍ରମାଣ ମିଳିଲେ ସେମାନେ ଭାରତୀୟ ସୁରକ୍ଷା ଏଜେନ୍ସି ବିରୋଧରେ ହତ୍ୟା ଅଭିଯୋଗ ଲଗାଇ ପାରିବେ ଏବଂ ତାଙ୍କୁ ସହିଦ ଘୋଷଣା କରିପାରିବେ ।
ଖାଣ୍ଡା ରଣଜୋଧ ସିଂହ ନାମରେ ବେଶି ପରିଚିତ ଥିଲେ । ସେ ବ୍ରିଟେନରେ ରାଜନୈତିକ ଶରଣ ଚାହୁଁଥିଲେ । ସେ ଖଲିସ୍ଥାନ ଗଠନ ପାଇଁ ବିଚ୍ଛିନ୍ନତାବାଦୀ ଆନ୍ଦୋଳନରେ ଶିଖ ଯୁବକମାନଙ୍କୁ ସାମିଲ କରାଇବା ପାଇଁ ପ୍ରୋତ୍ସାହନ ଦେଉଥିଲେ । ତାଙ୍କର ବାପା ମଧ୍ୟ କେଏଲଏଫ ଆତଙ୍କବାଦୀ ଥିଲେ । ୧୯୯୧ରେ ତାଙ୍କର ସୁରକ୍ଷା କର୍ମୀଙ୍କ ଗୁଳିରେ ମୃତ୍ୟୁ ଘଟିଥିଲା ।
ଅବତାର ହିଁ ଅମୃତପାଲଙ୍କୁ ସାମ୍ନାକୁ ଆଣିଥିଲା । ଏହାପୂର୍ବରୁ ଲଣ୍ଡନରେ ଥିବା ଭାରତୀୟ ଦୂତାବାସରୁ ଜାତୀୟ ପତାକା ତଳକୁ ଟାଣିବା ଅଭିଯୋଗରେ ଖାଣ୍ଡାଙ୍କୁ ଗିରଫ କରାଯାଇଥିଲା ।
Comments are closed.