ବୌଦ୍ଧ:ବୌଦ୍ଧରେ ଭୟଙ୍କର ଦୁର୍ଘଟଣା । ରାସ୍ତାରେ ଛିଡା ହୋଇଥିବା ଏକ ଟ୍ରକକୁ ପିଟିଲା ପୋଲିସ ଭ୍ୟାନ । ଦୁର୍ଘଟଣା ଏତେ ଭୟଙ୍କର ଥିଲା ଯେ, ପୋଲିସ ଗାଡିର ସାମ୍ନା ପଟ ଭାଙ୍ଗି ଚୁନା ହୋଇ ଯାଇଛି। ଦୁର୍ଘଟଣାରେ ଏଏସଆଇଙ୍କ ସମେତ ୪ ଗୁରୁତର ହୋଇଛନ୍ତି । ତାଙ୍କୁ ସଙ୍କଟାପନ୍ନ ଅବସ୍ଥାରେ କଟକ ସ୍ଥାନାନ୍ତର କରାଯାଇଛି ।
ବୌଦ୍ଧ ଜିଲ୍ଲା ମନମୁଣ୍ଡା ଥାନା ପୋଲିସ ଗତକାଲି ରାତିରେ ବାଉଁଶୁଣିଠାରେ ଏକ ଦୁର୍ଘଟଣା ଘଟିଥିବା ଖବର ପାଇଥିଲା । ଏକ ପିସିଆର ଗାଡି (ନମ୍ବର-OD 05 BE 4920 )ରେ ଏକ ଟିମ ଦୁର୍ଘଟଣାସ୍ଥଳକୁ ଯାଉଥିଲେ । ସେଠାରୁ କାମ ସାରି ମନମୁଣ୍ଡା ଫେରିବା ବାଟରେ ଘଟିଥିଲା ଦୁର୍ଘଟଣା ।
ଜାତୀୟ ରାଜପଥ ୫୭ରେ ହୋଟେଲ ତୃପ୍ତି ସାମ୍ନାରେ ଏକ ଟ୍ରକ ପୂର୍ବରୁ ଛିଡା ହୋଇଥିଲା । ଦ୍ରୁତ ଗତିରେ ଆସୁଥିବା ପିସିଆର ଏହି ଟ୍ରକକୁ ପଛପଟୁ ଧକ୍କା ଦେଇଥିଲା । ଫଳରେ ପୋଲିସ ଭ୍ୟାନଟି ପୁରା ଚୁରମାର ହୋଇ ଯାଇଛି ।
ଗାଡିରେ ଥିବା ଏଏସଆଇ ହେମଲତା ସାମଲଙ୍କ ସମେତ ୪ ଜଣ ପୋଲିସ କର୍ମଚାରୀ ଗୁରୁତର ହୋଇଥିଲେ । ସେମାନଙ୍କ ମଧ୍ୟରୁ ଏଏସଆଇ ହେମଲତାଙ୍କ ଅବସ୍ଥା ସଙ୍କଟାପନ୍ନ ଥିବାରୁ ତାଙ୍କୁ କଟକ ସ୍ଥାନାନ୍ତର କରାଯାଇଛି । ଅନ୍ୟମାନଙ୍କୁ ସୁବର୍ଣ୍ଣପୁର ଜିଲ୍ଲା ମୁଖ୍ୟ ଡାକ୍ତରଖାନାରେ ଚିକିତ୍ସା କରାଯାଉଛି ।
Comments are closed.