ବାଲେଶ୍ୱର: ବାଲେଶ୍ୱର ରେଲଓ୍ବେ ଷ୍ଟେସନ ରୋଡ ନିକଟରେ ଚଢାଉ କରି କୋଟିଏ ଟଙ୍କାର ବ୍ରାଉନସୁଗାର ଜବତ କରିବା ସହ ୪ ଜଣ ଗିରଫ। ରବିବାର ସନ୍ଧ୍ୟାରେ ସ୍ପେଶାଲ ଟାସ୍କ ଫୋର୍ସ (ଏସଟିଏଫ) ଏବଂ ବାଲେଶ୍ୱର ଜିଲ୍ଲା ପୋଲିସର ମିଳିତ ଉଦ୍ୟମରେ ୪ ଜଣ ବ୍ୟକ୍ତି ନିଶାଦ୍ରବ୍ୟ କାରବାରରେ ସମ୍ପୃକ୍ତ ଥିବା ନେଇ ଆଶଙ୍କା ପ୍ରକାଶ କରି ଚଢାଉ କରିଥିଲେ।
ଏହି ଚାରି ଜଣ ହେଲେ ବାଲେଶ୍ୱର ଜିଲ୍ଲା ବାଲୁବଜାର ନିବାସୀ ଏସକେ ଫୟାଜ, ଏସକେ ସମସେଦ, ଏସକେ ମୁରାଦ ଏବଂ ସନ୍ଦୀପ ନାୟକ। ଜବତ ହୋଇଥିବା ବ୍ରାଉନସୁଗାରର ଓଜନ ୧.୧ କିଲୋଗ୍ରାମ (୧୧୦୦ ଗ୍ରାମ) ରହିଛି। ଯାହାର ଆନୁମାନିକ ବଜାର ମୂଲ୍ୟ ଏକ କୋଟିରୁ ଅଧିକ। ଡ୍ରଗ୍ସ ସହ ବିଭିନ୍ନ ଆପତ୍ତିଜନକ ସାମଗ୍ରୀ ମଧ୍ୟ ଜବତ କରିଛି ପୋଲିସ। ଅଟକ ଥିବା ୪ ଅଭିଯୁକ୍ତ ଏହି ବେଆଇନ ନିଶାଦ୍ରବ୍ୟ କାରବାର ଦୀର୍ଘ ଦିନ ଧରି ଚଳାଇ ଆସୁଥିଲେ। ପୋଲିସ ଏବେ ଏ ସମସ୍ତଙ୍କୁ କୋର୍ଟରେ ହାଜର କରିବ ବୋଲି କହିଛି।
୨୦୨୦ ମସିହାରୁ ଏସଟିଏଫ୍ ୭୧ କିଲୋଗ୍ରାମ୍ ବ୍ରାଉନ୍ ସୁଗାର (ହିରୋଇନ୍), ୨୦୨ ଗ୍ରାମ୍ କୋକେନ୍, ୧୧୬ କ୍ୱିଣ୍ଟାଲରୁ ଅଧିକ ଗଞ୍ଜେଇ, ୭୫୦ ଗ୍ରାମ୍ ଅଫିମ ଜବତ କରିଛି।
Comments are closed.