କେଜ୍ରିଓ୍ବାଲଙ୍କ ବାସଭବନ ସୌନ୍ଦର୍ଯ୍ୟକରଣ ନାଁରେ ଅନିୟମିତତା ଅଭିଯୋଗ, ତଦନ୍ତ କରିବ ସିବିଆଇ

ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ୱାଲଙ୍କ ସରକାରୀ ବାସଭବନର ନବୀକରଣରେ ଅନିୟମିତତା ଅଭିଯୋଗର ତଦନ୍ତ ପାଇଁ କେନ୍ଦ୍ର ଗୃହ ମନ୍ତ୍ରାଳୟ ପକ୍ଷରୁ ସିବିଆଇକୁ ନିର୍ଦ୍ଦେଶ ଦିଆଯାଇଛି। ଦିଲ୍ଲୀ ସରକାରଙ୍କ ଅଜ୍ଞାତ ସରକାରୀ କର୍ମଚାରୀଙ୍କ ବିରୋଧରେ ଅନିୟମିତତା ଓ ଅସଦାଚରଣ ଅଭିଯୋଗରେ ସିବିଆଇ ପ୍ରାଥମିକ ତଦନ୍ତ ଆରମ୍ଭ କରିଛି। ଏହି ଅନିୟମିତତା ସମ୍ପର୍କିତ ସମସ୍ତ ଦସ୍ତାବିଜ ଅକ୍ଟୋବର ୩ ତାରିଖ ସୁଦ୍ଧା ସିବିଆଇକୁ ହସ୍ତାନ୍ତର କରିବାକୁ ଦିଲ୍ଲୀ ସରକାରଙ୍କ ପୂର୍ତ ବିଭାଗକୁ ନିର୍ଦ୍ଦେଶ ଦିଆଯାଇଛି।

ଅଭିଯୋଗଗୁଡ଼ିକର ନିୟମିତ ଏଫ୍ଆଇଆର୍ ସହିତ ଆଗକୁ ବଢ଼ିବାର ଯୋଗ୍ୟତା ଅଛି କି ନାହିଁ ତାହା ପ୍ରାଥମିକ ତଦନ୍ତରୁ ଜଣାପଡ଼ିବ। ଦିଲ୍ଲୀ ମୁଖ୍ୟ ଶାସନ ସଚିବଙ୍କ ତଦନ୍ତ ପରେ ସାମ୍ନାକୁ ଆସିଥିବା ଏହି ଅଭିଯୋଗର ସମସ୍ତ ଦିଗକୁ ସିବିଆଇ ଅନୁଧ୍ୟାନ କରିବ।

ଦିଲ୍ଲୀର ଉପରାଜ୍ୟପାଳ ଭି. କେ. ସକ୍ସେନା ଗତ ମେ ମାସରେ ସିବିଆଇ ନିର୍ଦ୍ଦେଶକଙ୍କୁ ଲେଖିଥିବା ଚିଠି ଆଧାରରେ ଏହି ତଦନ୍ତ ନିର୍ଦ୍ଦେଶ ଦିଆଯାଇଛି। କେନ୍ଦ୍ର ଗୃହ ମନ୍ତ୍ରାଳୟ ମଧ୍ୟ ଏହି ମାମଲାରେ କମ୍ପଟ୍ରୋଲର ଆଣ୍ଡ ଅଡିଟର ଜେନେରାଲ (ସିଏଜି)ଙ୍କ ଦ୍ୱାରା ଏକ ସ୍ୱତନ୍ତ୍ର ଅଡିଟ୍ କରିବାକୁ ନିର୍ଦ୍ଦେଶ ଦେଇଛନ୍ତି।

ସମସ୍ତ ତଦନ୍ତକାରୀ ସଂସ୍ଥାକୁ ନିୟୋଜିତ କରି ବିଜେପି କେଜ୍ରିଓ୍ୱାଲଙ୍କୁ ଘେରିବାକୁ ଚେଷ୍ଟା କରୁଛି ବୋଲି ଆମ୍ ଆଦମୀ ପାର୍ଟି କହିଛି। ସେମାନେ କେଜ୍ରିଓ୍ୱାଲଙ୍କ ବିରୋଧରେ ୫୦ରୁ ଅଧିକ ମାମଲା ରୁଜୁ କରିଛନ୍ତି ଏବଂ ତଦନ୍ତ କରିଛନ୍ତି, କିନ୍ତୁ ସେଥିରୁ କିଛି ବାହାରି ପାରିନାହିଁ। ସିବିଆଇ ତଦନ୍ତରୁ ମଧ୍ୟ କିଛି ମିଳିବ ନାହିଁ ବୋଲି ଦିଲ୍ଲୀର ଶାସକ ଦଳ କହିଛି।

ଦଳକୁ “ଜନତାଙ୍କ ପାଇଁ କାମ କରିବା”ରୁ ରୋକିବା ପାଇଁ ବିଜେପି ପକ୍ଷରୁ ଏହି ପଦକ୍ଷେପ ନିଆଯାଇଥିବା ଅଭିଯୋଗ ହୋଇଛି। ଆପ୍ ଅଭିଯୋଗ କରିଛି ଯେ ଆପ୍କୁ ଶେଷ କରିବା ପାଇଁ ଗେରୁଆ ଦଳ ନିଜର ସମସ୍ତ ଶକ୍ତି ବ୍ୟବହାର କରୁଛି।

ଚଳିତ ବର୍ଷ ପ୍ରାରମ୍ଭରେ, ଦିଲ୍ଲୀର ସିଭିଲ୍ ଲାଇନ୍ସରେ ଥିବା କେଜ୍ରିଓ୍ୱାଲଙ୍କ ସରକାରୀ ବାସଭବନକୁ ନବୀକରଣକୁ ନେଇ ଗଣମାଧ୍ୟମରେ ଖବର ପ୍ରକାଶ ପାଇଥିଲା। ସୌନ୍ଦର୍ଯ୍ୟକରଣ ବାବଦରେ ପ୍ରାୟ ୪୫ କୋଟି ଟଙ୍କା ଖର୍ଚ୍ଚ ହୋଇଥିବା ଆପ୍ ସୁପ୍ରିମୋ ଅଭିଯୋଗ ଆଣିବା ପରେ ବିଜେପି ଜୋରଦାର ସମାଲୋଚନା କରିଛି।

ଅଭିଯୋଗ ଅନୁସାରେ ଆଭ୍ୟନ୍ତରୀଣ ସାଜସଜ୍ଜା ପାଇଁ ୧୧.୩୦ କୋଟି ଟଙ୍କା ଖର୍ଚ୍ଚ ହୋଇଛି, ପଥର ଓ ମାର୍ବଲ ଚଟାଣ ପାଇଁ ୬.୦୨ କୋଟି ଟଙ୍କା, ଇଣ୍ଟେରିୟର କନସଲଟାନ୍ସି ପାଇଁ ୧ କୋଟି ଟଙ୍କା, ଇଲେକ୍ଟ୍ରିକ୍ ଫିଟିଂ ଓ ଆପ୍ଲାଏନ୍ସ ପାଇଁ ୨.୫୮ କୋଟି ଟଙ୍କା, ଅଗ୍ନି ନିର୍ବାପକ ବ୍ୟବସ୍ଥା ପାଇଁ ୨ କୋଟି ୮୫ ଲକ୍ଷ ଟଙ୍କା, ଓ୍ୱାର୍ଡରୋବ ଓ ଆକ୍ସେସୋରିଜ୍ ଫିଟିଂ ବାବଦରେ ୧ କୋଟି ୪୧ ଲକ୍ଷ ଟଙ୍କା, ଏବଂ କିଚେନ୍ ଆପ୍ଲାଏନ୍ସ ଉପରେ ୧.୧ କୋଟି ଟଙ୍କା। ସେହିପରି ମୁଖ୍ୟମନ୍ତ୍ରୀ କେଜ୍ରିଓ୍ୱାଲଙ୍କ କ୍ୟାମ୍ପ ଅଫିସ ପାଇଁ ଆଉ ୮.୧୧ କୋଟି ଟଙ୍କା ଖର୍ଚ୍ଚ ହୋଇଛି।

କେଜ୍ରିଓ୍ୱାଲ ଓ ଆପ୍ ସରକାରଙ୍କ ବିରୋଧରେ ଚାଲିଥିବା ଅଭିଯୋଗର ସିବିଆଇ ତଦନ୍ତ ହେଉଛି ସଦ୍ୟତମ ଘଟଣା। ସିବିଆଇର ଏହି ତଥ୍ୟ କ’ଣ ଏବଂ ଏହା ଆଗକୁ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିବ କି ନାହିଁ, ତାହା ଦେଖିବାକୁ ବାକି ରହିଲା।