ହାଇଦ୍ରାବାଦ: ରାହୁଲ ଗାନ୍ଧୀଙ୍କୁ ଟାର୍ଗେଟ କଲେ ଭାରତ ରାଷ୍ଟ୍ର ସମିତି (BRS) ନେତ୍ରୀ କେ. କବିତା । ବୁଧବାର ଅଲ ଇଣ୍ଡିଆ କଂଗ୍ରେସ କମିଟି (ଏଆଇସିସି) ନେତା ରାହୁଲ ଗାନ୍ଧୀଙ୍କୁ ‘ନିର୍ବାଚନ ଗାନ୍ଧୀ’ ବୋଲି କହି ସେ ସମ୍ବୋଧିତ କରିଛନ୍ତି। ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓଙ୍କ ଝିଅ କେ. କବିତା କହିଛନ୍ତି ଯେ, ଗାନ୍ଧୀ ପର୍ଯ୍ୟଟକ ଭାବରେ ତେଲେଙ୍ଗାନାକୁ ଆସିପାରିବେ, ପ୍ରସିଦ୍ଧ ସୁସ୍ବାଦୁ ସ୍ଥାନୀୟ ଖାଦ୍ୟ ‘ଅଙ୍କାପୁର ଚିକେନ୍’ର ସ୍ୱାଦ ଚାଖି ପରେ ଫେରିଯାଇପାରିବେ।
ସୂଚନାମୁତାବକ, କେ. କବିତା କହିଛନ୍ତି ଯେ, ଆଜିଠାରୁ ଆରମ୍ଭ ହେଉଥିବା ୩ ଦିନିଆ ବସ୍ ଯାତ୍ରା ସମୟରେ ନିଜାମାବାଦ ଗସ୍ତରେ ଆସୁଛନ୍ତି ରାହୁଲ ଗାନ୍ଧି । ଏହି ସମୟରେ ରାହୁଲ ଗାନ୍ଧୀ ତାଙ୍କର ‘ବିଚିତ୍ର’ ମନ୍ତବ୍ୟ ଦେଇ ଲୋକଙ୍କ ମଧ୍ୟରେ ମତଭେଦ ସୃଷ୍ଟି ନକରିବାକୁ ସେ ତାଙ୍କୁ ଅନୁରୋଧ କରିଛନ୍ତି। କବିତା ଜାଣିବାକୁ ଚାହିଁଥିଲେ ଯେ ରାହୁଲ ଗାନ୍ଧୀ ତେଲେଙ୍ଗାନାକୁ କାହିଁକି ଆସୁଛନ୍ତି ଏବଂ ସେ ଅଭିଯୋଗ କରିଛନ୍ତି ଯେ, ସେ ରାଜ୍ୟ, ଏହାର କୃଷକ କିମ୍ବା ଛାତ୍ରଛାତ୍ରୀମାନଙ୍କ ପାଇଁ କିଛି କରିନାହାଁନ୍ତି ଏବଂ ତେଲେଙ୍ଗାନାର ‘ବିକାଶ କାହାଣୀ’ର ସେ ଅଂଶ ମଧ୍ୟ ନୁହଁନ୍ତି।
କଂଗ୍ରେସକୁ ଟାର୍ଗେଟ କରି ବିଆରଏସ ନେତ୍ରୀ କହିଛନ୍ତି ଯେ, ଅତୀତରେ ଯେବେବି ସବୁଠୁ ପୁରାତନ ଦଳ ମୁଖ୍ୟମନ୍ତ୍ରୀ ବଦଳାଇବାକୁ ଚେଷ୍ଟା କରିଛି ସେତେବେଳେ ରାଜ୍ୟରେ ସାମ୍ପ୍ରଦାୟିକ ଦଙ୍ଗା ଆରମ୍ଭ ହୋଇଯାଇଛି। ସେ ଆହୁରି କହିଛନ୍ତି, ‘ତୁମେ ଏଠାକୁ ଆସୁଛ ହିନ୍ଦୁ ଏବଂ ମୁସଲମାନମାନଙ୍କ ବିଷୟରେ ଅଜବ କଥା କହୁଛ। ଦୟାକରି ଏଠାକାର ପରିବେଶକୁ ନଷ୍ଟ କରନ୍ତୁ ନାହିଁ । ତେଲେଙ୍ଗାନାରେ ସୁଖ, ଶାନ୍ତି,ଏବଂ ସମୃଦ୍ଧତା ଅଛି, ଦୟାକରି ଏହି ପରିବେଶକୁ ନଷ୍ଟ କରନ୍ତୁ ନାହିଁ ଏହା ଆପଣଙ୍କୁ ମୋର ଅନୁରୋଧ’।
Comments are closed.