ଝାଡଖଣ୍ଡର ରଘୁବର ଦାସଙ୍କୁ ରାଜ୍ୟପାଳ କରାଇ ନିଶ୍ବାସ ମାରିଲା କେନ୍ଦ୍ର ବିଜେପି?

ରାଞ୍ଚି: ଝାଡଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ରଘୁବର ଦାସଙ୍କୁ ବୁଧବାର ବିଳମ୍ବିତ ରାତିରେ ଓଡ଼ିଶାର ରାଜ୍ୟପାଳ ଭାବେ ନିଯୁକ୍ତି କରିଛନ୍ତି ରାଷ୍ଟ୍ରପତି। କେନ୍ଦ୍ର ସରକାର ତଥା ଶାସକ ଦଳ ବିଜେପିର ସୁପାରିଶ କ୍ରମେ ରାଷ୍ଟ୍ରପତି ରଘୁବରଙ୍କୁ ରାଜ୍ୟପାଳ ଭାବେ ନିଯୁକ୍ତ କରିଛନ୍ତି।

ଝାଡଖଣ୍ଡ ରାଜ୍ୟ ପ୍ରତିଷ୍ଠା ହେବା ପରେ ରଘୁବର ହେଉଛନ୍ତି ଝାଡଖଣ୍ଡର ଏକମାତ୍ର ମୁଖ୍ୟମନ୍ତ୍ରୀ ଯିଏକି ଶାସନ କାଳ ପୂର୍ଣ୍ଣ କରିଛନ୍ତି। ଆଦିବାସୀ ଅଧ୍ୟୁଷିତ ଏରିଆର ଏହି ଓବିସି ନେତାଙ୍କୁ ବିଜେପି ରାଜ୍ୟପାଳ କରିବା ପଛରେ କି କାରଣ ଥାଇପାରେ ତାହା ଏବେ ସମସ୍ତଙ୍କୁ ଆଶ୍ଚର୍ଯ୍ୟ କରିଛି। ଖାସ କରି ଦେଶରେ ବିରୋଧୀ ଯେତେବେଳେ ଓବିସିକୁ ନେଇ ରାଜନୀତି କରୁଛି ସେତେବେଳେ ବିଜେପି ଝାଡଖଣ୍ଡର ଏହି ଓବିସି ଚେହେରା ନେତାଙ୍କୁ ଝାଡଖଣ୍ଡ ରାଜନୀତିରୁ କାହିଁକି ଦୂରେଇ ଦେଲା ତାହା ଏବେ ବଡ଼ ପ୍ରଶ୍ନ।

ଝାଡଖଣ୍ଡ ଭାରତୀୟ ଜନତା ପାର୍ଟି (ବିଜେପି)ର ଏବେ ସଭାପତି ହୋଇଛନ୍ତି ବାବୁଲାଲ ମାରାଣ୍ଡି। ଯିଏକି ତାଙ୍କ ଦଳ ଝାଡଖଣ୍ଡ ବିକାଶ ମୋର୍ଚ୍ଚାକୁ ବିଜେପି ସହ ମିଶାଇ ଦେଇଛନ୍ତି। ବିରୋଧୀ ଦଳରେ ବିଜେପି ବସିବା ପରେ ରଘୁବର ଏବଂ ବାବୁଲାଲଙ୍କ ମଧ୍ୟରେ ଶୀତଳ ଯୁଦ୍ଧ ରହୁଥିଲା। ଯେଉଁଥିପାଇଁ ଝାଡଖଣ୍ଡ ବିଜେପି ପାଖରେ ମୁଦ୍ଦା ଥିଲେ ମଧ୍ୟ ସଂଗଠନ ଗୋଳିଆ ରହୁଥିବାରୁ ଶାସକ ଦଳକୁ ହମଲା କରିବାରେ ବିଫଳ ହେଉଛି ବୋଲି କେନ୍ଦ୍ରର ଶୀର୍ଷ ନେତୃତ୍ବ ହୃଦବୋଧ କରିଛି। ଏପରି ସ୍ଥିତିରେ ରାଜ୍ୟର ଶୀର୍ଷ ନେତାଙ୍କୁ ଅଣଦେଖା କରିବା ଅପେକ୍ଷା ବିକଳ୍ପ ରଣନୀତି ଭାବେ ରଘୁବରଙ୍କୁ ରାଜ୍ୟପାଳ କରାଯାଇଛି ବୋଲି ଜଣାପଡ଼ିଛି।

୨୬%ରୁ ଅଧିକ ଆଦିବାସୀ ଜନସଂଖ୍ଯା ଥିବା ରାଜ୍ୟରେ ଏକମାତ୍ର ଅଣ-ଆଦିବାସୀ ମୁଖ୍ୟମନ୍ତ୍ରୀ ରଘୁବାର ଦାସ ୨୦୧୪ରେ ରାଜ୍ୟର ଶୀର୍ଷ ପଦବୀ ପାଇଁ ଏକ ଆଶ୍ଚର୍ଯ୍ୟଜନକ ଭାବେ ଦଳ ଦ୍ବାରା ମନୋନୀତ ହୋଇଥିଲେ। ୨୦୧୯ ଝାଡ଼ଖଣ୍ଡ ନିର୍ବାଚନରେ ସେ ବିଜେପିର ନେତୃତ୍ୱ ନେଇଥିଲେ, କିନ୍ତୁ ଦଳକୁ ବହୁମତ ମିଳିନଥିଲା। ଝାଡ଼ଖଣ୍ଡ ମୁକ୍ତି ମୋର୍ଚ୍ଚାର ହେମନ୍ତ ସୋରେନ ରାଜ୍ୟର ମୁଖ୍ୟମନ୍ତ୍ରୀ ହେଲେ ଏବଂ ରଘୁବର ଦାସ ଯିଏକି ଜାମସେଦପୁର ପୂର୍ବ ବିଧାନସଭା ଆସନରୁ ହାରି ଯାଇଥିଲେ। ହେଲେ ୨୦୧୪ରେ ମୁଖ୍ୟମନ୍ତ୍ରୀ ଆସନରେ ବସିଥିଲେ। ମୋଟ୍ ୫ଥର ବିଧାୟକ ହୋଇଥିବା ଏହି ନେତା ଏବେ ଦଳର ରାଷ୍ଟ୍ରୀୟ ଉପାଧ୍ୟକ୍ଷ ହୋଇଥିଲେ।

କିନ୍ତୁ ଦଳର ରାଜ୍ୟ ମୁଖ୍ୟ ବାବୁଲାଲ ମାରାଣ୍ଡିଙ୍କ ଦ୍ୱାରା ଝାଡ଼ଖଣ୍ଡ ବିଜେପି ୟୁନିଟ୍ କିଭଳି ପରିଚାଳିତ ହେଉଥିଲା, ସେନେଇ ରଘୁବର ଦାସଙ୍କ ମତ ଜାରି ରହିଥିଲା। ରାଜ୍ୟ ରାଜନୀତିର ଆଉ ଜଣେ ପ୍ରମୁଖ ଖେଳାଳି ତଥା ପୂର୍ବତନ ମୁଖ୍ୟମନ୍ତ୍ରୀ ଅର୍ଜୁନ ମୁଣ୍ଡାଙ୍କୁ ୨୦୧୯ ମେ’ ମାସରେ ଆଦିବାସୀ ବ୍ୟାପାର ମନ୍ତ୍ରୀ ଭାବେ କେନ୍ଦ୍ର ମନ୍ତ୍ରିମଣ୍ଡଳରେ ସାମିଲ କରାଯାଇସାରିଛି।

୨୦୧୯ ନିର୍ବାଚନର ଠିକ୍ ପରେ ବାବୁଲାଲ ମାରାଣ୍ଡି ବିଜେପିକୁ ଫେରିବା ପରେ ଏହା ସ୍ପଷ୍ଟ ହୋଇଥିଲା ଯେ ରଘୁବରଙ୍କୁ ଦଳ ଆଉ ସେତେଟା ଗୁରୁତ୍ବ ଦେଇନପାରେ। ବାବୁଲାଲଙ୍କୁ ବିଧାୟକ ଦଳ ନେତା ଭାବେ ନିଯୁକ୍ତି ଦିଆଯାଇଛି ବୋଲି ବିଜେପି ବିଧାୟକ ଦଳ ନେତା କହିଛନ୍ତି। ଚଳିତ ବର୍ଷ ଜୁଲାଇ ମାସରେ ବିଜେପି ବାବୁଲାଲ ମାରାଣ୍ଡିଙ୍କ ନାଁ ନେଇ ରାଜ୍ୟ ୟୁନିଟର ନେତୃତ୍ୱ ନେବା ସହ ୨୦୨୪ରେ ରାଜ୍ୟରେ ବିଜେପି କ୍ଷମତାକୁ ଫେରିବା ପାଇଁ ରଣନୀତି ପ୍ରସ୍ତୁତ କରିଛି।

ବିଜେପି ନେତା କହିଛନ୍ତି ଯେ ରଘୁବର ଦାସ କିନ୍ତୁ ବାବୁଲାଲଙ୍କୁ ଆଗକୁ ବଢିବାକୁ ସୁଯୋଦ ଦେବା ମୋଡରେ ନଥିଲେ। ବିଜେପିର ଜଣେ ବରିଷ୍ଠ ନେତା କହିଛନ୍ତି, ଏହି ନୂଆ ନିଯୁକ୍ତି ଦ୍ୱାରା କେନ୍ଦ୍ରୀୟ ନେତୃତ୍ୱ ଏବେ ପାଇଁ ରାଜ୍ୟରେ ନେତୃତ୍ୱ ସମସ୍ୟାର ସମାଧାନ କରିଦେଇଛନ୍ତି।

ବିଜେପିର ଜଣେ ଦ୍ୱିତୀୟ ନେତା କହିଛନ୍ତି ଯେ ପୂର୍ବତନ ମନ୍ତ୍ରୀ ଅମର ବାଉରୀ, ଯିଏକି ରାଜ୍ୟରେ ବିଜେପିର ଅନୁସୂଚିତ ଜାତି ଶାଖାର ନେତୃତ୍ୱ ନେଇଥିଲେ, ତାଙ୍କୁ ଏହି ସପ୍ତାହ ପୂର୍ବରୁ ବିଜେପି ବିଧାୟକ ଦଳର ନେତା ଭାବରେ ନିଯୁକ୍ତ କରିବାରେ ରଘୁବର ଦାସ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।

ପୂର୍ବତନ ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ ଯୋଗୁଁ ହିଁ ଗତ ଜୁଲାଇ ମାସରେ କେନ୍ଦ୍ରୀୟ ପର୍ଯ୍ୟବେକ୍ଷକ ଅଶ୍ୱିନୀ ଚୌବେଙ୍କ ପରାମର୍ଶ ସମୟରେ ବହୁ ସଂଖ୍ୟାରେ ଦଳୀୟ ବିଧାୟକ ଅମର ବାଉରୀଙ୍କୁ ସମର୍ଥନ କରିଥିଲେ। ସେ କହିଛନ୍ତି, ୨୦୧୪ରେ ଝାଡ଼ଖଣ୍ଡ ବିକାଶ ମୋର୍ଚ୍ଚାରୁ ବାଉରୀଙ୍କୁ ବିଜେପିକୁ ଆଣି ରଘୁବର ତାଙ୍କ ମନ୍ତ୍ରୀମଣ୍ଡଳରେ ସାମିଲ କରିଥିଲେ। ତାଙ୍କୁ ତାଙ୍କର ଅନ୍ୟତମ ଅନୁଗତ ବୋଲି ବିବେଚନା କରାଯାଏ।

ଝାଡଖଣ୍ଡ କଂଗ୍ରେସ ମୁଖପାତ୍ର ରାଜୀବ ରଞ୍ଜନ ପ୍ରସାଦ କହିଛନ୍ତି ଯେ ଏହା ବିଡମ୍ବନାର ବିଷୟ ଯେ ଏକଦା ରଘୁବର ଦାସଙ୍କ ମୁଖ୍ୟମନ୍ତ୍ରୀତ୍ୱ କାଳକୁ ବିଜେପି ପ୍ରଶଂସା କରିଥିଲା। ଏହା ବିଜେପିର ଆଭ୍ୟନ୍ତରୀଣ ମାମଲା। କିନ୍ତୁ ଯେଉଁ ବିଜେପି ସେମାନଙ୍କ ଡବଲ ଇଞ୍ଜିନ ସରକାରର ତଥାକଥିତ ସଫଳତାକୁ ନେଇ ଦମ୍ଭ ଦେଖାଇ ଚାଲିଥିଲା, ସେହି ବିଜେପି ଏବେ ଶେଷରେ ସତ୍ୟ ଉପଲବ୍ଧି କରିଥିବା ମନେ ହେଉଛି।

ଜେଏମଏମର ବରିଷ୍ଠ ନେତା ତଥା ପାନୀୟ ଜଳ ଓ ପରିମଳ ମନ୍ତ୍ରୀ ମିଥିଲେଶ ଠାକୁର ପ୍ରଶ୍ନ କରିଛନ୍ତି ଯେ ରଘୁବର ଦାସଙ୍କୁ ପଦୋନ୍ନତି ଦିଆଯାଇଛି ନା ତାଙ୍କୁ ଦୂରେଇ ଦିଆଯାଇଛି। ଓବିସି ବର୍ଗର ଏକମାତ୍ର ଗ୍ରହଣୀୟ ଚେହେରାଙ୍କ ରାଜନୈତିକ ଯାତ୍ରାରେ ପୂର୍ଣ୍ଣଚ୍ଛେଦ ପଡ଼ିଛି ବୋଲି ସେ ଦାବି କରିଛନ୍ତି।