ଚେନ୍ନାଇ: ମଙ୍ଗଳବାର ସନ୍ଧ୍ୟାରେ ରୋୟାପୁରମ ଅଞ୍ଚଳରେ ଏକ ବୁଲା କୁକୁର ଆତଙ୍କ ଖେଳାଇଥିଲା। ବ୍ୟସ୍ତବହୁଳ ଜିଏ ରୋଡରେ ଏକ ଘଣ୍ଟାରୁ କମ୍ ସମୟ ମଧ୍ୟରେ ୨୯ ଜଣଙ୍କୁ କାମୁଡି ଲହୁ ଲୁହାଣ କରାଇଛି ଗୋଟିଏ ବୁଲା କୁକୁର।
କୁକୁରଟି ପଥଚାରୀଙ୍କ ଗୋଡ଼ ଓ ଆଣ୍ଠୁକୁ କାମୁଡିବା ସହ ସେମାନଙ୍କ ଉପରେ ଅତର୍କିତ ଭାବେ ଆକ୍ରମଣ କରିଥିଲା। ଏପରିକି କୁକୁରଟି କାମୁଡିବା ପରେ ଘଉଡାଇବାକୁ ଉଦ୍ୟମ କରାଯାଇଥିଲେ ମଧ୍ୟ ଛାଡ଼ିନଥିଲା ବୋଲି କିଛି ପୀଡ଼ିତ କହିଛନ୍ତି। ଗ୍ରେଟର ଚେନ୍ନାଇ କର୍ପୋରେସନ୍ ମୃତ କୁକୁରକୁ ପୋଷ୍ଟମର୍ଟମ ପାଇଁ ମାଡ୍ରାସ ଭେଟେରିନାରୀ କଲେଜକୁ ପଠାଇଛି।
ଚବିଶ ଜଣ ପୀଡ଼ିତଙ୍କ ମଧ୍ୟରୁ ତିନି ଜଣଙ୍କ ଅତି ଜୋରରେ କାମୁଡିଛି। ଏହାର ଅର୍ଥ କୁକୁର ମଣିଷ ଶରୀରରେ ତାର ସମ୍ଭାବ୍ୟ ଲାଳ ପ୍ରବେଶ କରାଇଛି। ଗଭୀର କଟା ଦାଗ ଏବଂ ରକ୍ତସ୍ରାବ ସ୍ଥାନକୁ ଦେଖିଲା ପରେ ଏହା ଜଣାପଡିଛି। ଆହତଙ୍କ ମଧ୍ୟରେ ଦଶ ଜଣ ସ୍କୁଲ ପିଲା ଅଛନ୍ତି। କିଛି ବରିଷ୍ଠ ନାଗରିକ ତଳେ ପଡ଼ିଯାଇଥିଲେ ଏବଂ ସେମାନଙ୍କ ମୁଣ୍ଡରେ ମଧ୍ୟ ଆଘାତ ଲାଗିଥିଲା। ସମସ୍ତ ଆହତଙ୍କୁ ନିକଟସ୍ଥ ସରକାରୀ ଷ୍ଟାନଲି ମେଡିକାଲ କଲେଜ ଓ ହସ୍ପିଟାଲରେ ଭର୍ତ୍ତି କରାଯାଇଛି।
ହସ୍ପିଟାଲରେ ଡାକ୍ତରମାନେ ପୀଡ଼ିତଙ୍କ କ୍ଷତର ଚିକିତ୍ସା କରିବା ସହ ମସ୍ତିଷ୍କରେ ସଂକ୍ରମଣକୁ ରୋକିବା ପାଇଁ ସେମାନଙ୍କୁ ଆଣ୍ଟି-ରେବିଜ୍ ଇମ୍ୟୁନୋଗ୍ଲୋବୁଲିନ ଔଷଧ ଦେଇଛନ୍ତି। ଏହି ଘଟଣା ପରେ ଗ୍ରେଟର ଚେନ୍ନାଇ କର୍ପୋରେସନ୍ ଉକ୍ତ ଅଞ୍ଚଳରୁ ୬ଟି କୁକୁର ଛୁଆଙ୍କ ସମେତ ୩୨ଟି କୁକୁରଙ୍କୁ ନେଇଯାଇ ସେମାନଙ୍କୁ ରେବିଜ୍ ପାଇଁ ଅବଜରଭେସନରେ ରଖିଛନ୍ତି।
ବିଶେଷଜ୍ଞଙ୍କ ମତରେ ବିନା ପ୍ରରୋଚନାରେ କୁକୁର କାମୁଡ଼ାର ଶିକାର ହୋଇଥିବା ବ୍ୟକ୍ତି ୧୨ ଘଣ୍ଟା ମଧ୍ୟରେ ଆଣ୍ଟି-ରେବିଜ୍ ଇମ୍ୟୁନୋଗ୍ଲୋବୁଲିନ ସିରମ୍ ଓ ଟିକା ନେବା ଉଚିତ। ସେମାନେ ଏହା ମଧ୍ୟ କହିଛନ୍ତି ଯେ ରାସ୍ତାରେ ବୁଲୁଥିବା କୁକୁରମାନେ ସାଧାରଣତଃ ପ୍ୟାକରେ ଥାନ୍ତି ଏବଂ ଯଦି ସେମାନେ ଅନ୍ୟ କୁକୁରମାନଙ୍କର ଗନ୍ଧ ପାଆନ୍ତି କିମ୍ବା ପୂର୍ବର କ୍ଷତିର ସ୍ମୃତି ଥାଏ ତେବେ ସେମାନେ କେବଳ ଦଳବଦ୍ଧ ଭାବରେ ଗାଡ଼ିଗୁଡ଼ିକୁ ପିଛା କରନ୍ତି। ଯଦି ସେମାନେ ଏକୁଟିଆ ରୁହନ୍ତି ଏବଂ କାହାକୁ ଆକ୍ରମଣ କରନ୍ତି, ତେବେ ସେମାନେ ରେବିଜ୍ ପଜିଟିଭ୍ ହେବାର ସମ୍ଭାବନା ଅଧିକ ଥାଏ।
ରେବିଜ୍ ଏକ ମାରାତ୍ମକ ଭାଇରସ୍ ଯାହା ଜୀବଜନ୍ତୁଙ୍କ ଶରୀରରୁ ମଣିଷଙ୍କ ଶରୀରକୁ ସଂକ୍ରମିତ ହୋଇଥାଏ। କୁକୁର କାମୁଡିଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ଜରୁରୀ। ବିଶେଷ କରି କୁକୁରକୁ ରେବିଜ୍ ପ୍ରତିଷେଧକ ଟୀକା ଦିଆଯାଇଛି କି ନାହିଁ ତାହା ଅଜଣା।
ଏହି ଘଟଣା ବୁଲା କୁକୁରଙ୍କୁ ଟିକା ଦେବା ଏବଂ କୁକୁର କାମୁଡ଼ାରୁ ରକ୍ଷା ପାଇବା ପାଇଁ ସତର୍କତା ଅବଲମ୍ବନ କରିବା ପାଇଁ ମନେପକାଇ ଦେଉଛି।
Comments are closed.