ନବରାତ୍ରୀ ୨୦୨୪: ନବରାତ୍ରୀର ଦ୍ୱିତୀୟ ଦିନରେ ପୂଜା ପାଇଥାନ୍ତି ମାତା ବ୍ରହ୍ମଚାରିଣୀ
ଭୁବନେଶ୍ଵର: ଆରମ୍ଭ ହୋଇଯାଇଛି ମା’ ଦୁର୍ଗାଙ୍କ ନବରାତ୍ରୀ ପୂଜା, ଆଉ ଦିନ କେଇଟା ପରେ ଦଶହରା, ଏନେଇ ଚଳଚଞ୍ଚଳ ହୋଇ ଉଠିଛି ଶକ୍ତିପୀଠ ସହ ପୂଜା ମଣ୍ଡପ । ନବରାତ୍ରୀରେ ମା’ ଦୁର୍ଗା ନଅଟି ରୂପରେ ପୂଜା ପାଇଥାନ୍ତି । ଏହି ନଅଦିନ ମା’ ଦୁର୍ଗା ଶୈଳପୁତ୍ରୀ, ବ୍ରହ୍ମଚାରିଣୀ, ଚନ୍ଦ୍ରଘଣ୍ଟା, କୁଷ୍ମାଣ୍ଡା, ସ୍କନ୍ଦମାତା, କାତ୍ୟୟନୀ, କାଳରାତ୍ରୀ, ମହାଗୌରୀ ଓ ସିଦ୍ଧିଦାତ୍ରୀ ରୂପରେ ମଣ୍ଡପରେ ପୂଜା କରାଯାଏ । ଆଜି ନବରାତ୍ରୀର ଦ୍ଵିତୀୟ ଦିନରେ ଦେବୀ ବ୍ରହ୍ମଚାରିଣୀ ରୁପରେ ଭକ୍ତଙ୍କୁ ଦର୍ଶନ ଦେଉଛନ୍ତି ମା’ ।
ମା ବ୍ରହ୍ମଚାରିଣୀ ସରଳ, ଭଦ୍ର ଏବଂ ଶାନ୍ତ ବୋଲି ବିବେଚନା କରାଯାଏ। ସେ ନିଜର ଦୃଢ଼ତା, ବଳିଦାନ, ଦୃଢ ଇଚ୍ଛାଶକ୍ତି ପାଇଁ ଜଣାଶୁଣା। ଯଦି ତାଙ୍କର ରୂପ ବିଷୟରେ କହିବା, ତେବେ ସେ ଧଳା ପୋଷାକ ପିନ୍ଧି, ହାତରେ ଜପାମାଳି ଏବଂ କଳସ ଧରିଥାନ୍ତି। ଶାସ୍ତ୍ରରେ ମା’ ବ୍ରହ୍ମଚାରିଣୀଙ୍କୁ ମା’ ଦୁର୍ଗାଙ୍କ ବିଶେଷ ସ୍ୱରୂପ ବୋଲି କୁହାଯାଇଛି। ମା’ଙ୍କ ଆରାଧନାରେ ତପ, ଶକ୍ତି, ତ୍ୟାଗ, ସଦାଚାର, ସଂଯମ ଓ ବୈଭବ ବୃଦ୍ଧି ହୋଇଥାଏ ଓ ଶତ୍ରୁଙ୍କୁ ପରାଜିତ କରି ମା’ ବିଜୟ ପ୍ରଦାନ କରିଥାନ୍ତି। ମା’ଙ୍କୁ ବିଧି ପୂର୍ବକ ପୂଜା କଲେ ମା’ ସବୁ ମନସ୍କାମନା ପୂରଣ କରିଥାନ୍ତି ଓ ସବୁ ସମସ୍ୟା ଦୂର କରିଥାନ୍ତି। ମା’ ବ୍ରହ୍ମଚାରିଣୀଙ୍କ ପୂଜା ମଙ୍ଗଳ ଗ୍ରହର ଖରାପ ପ୍ରଭାବକୁ କମ୍ କରିଥାଏ।
ମା’ ବ୍ରହ୍ମଚାରିଣୀଙ୍କୁ ଜ୍ଞାନ, ତପସ୍ୟା ଏବଂ ବୈରାଗ୍ୟର ଦେବୀ ବୋଲି କୁହାଯାଏ। କଠୋର ସାଧନା ଏବଂ ବ୍ରହ୍ମରେ ଲୀନ ହେବା କାରଣରୁ ତାଙ୍କର ନାମ ବ୍ରହ୍ମଚାରିଣୀ। ବିଦ୍ୟାର୍ଥୀ ଏବଂ ତପସ୍ୱୀଙ୍କ ପାଇଁ ମା’ଙ୍କ ପୂଜା କରିବା ଶୁଭଫଳ ଦେଇଥାଏ। ଯେଉଁ ଲୋକଙ୍କର ସ୍ୱାଧିଷ୍ଠାନ ଚକ୍ର ଦୁର୍ବଳ ରହିଥାଏ ସେମାନେ ମା’ ବ୍ରହ୍ମଚାରିଣୀଙ୍କୁ ଉପସନା କରିବା ଦ୍ୱାରା ଅନେକ ଲାଭ ମିଳିଥାଏ।
ପୁରାଣ ଅନୁଯାୟୀ, ସତୀ ଆତ୍ମହତ୍ୟା କରିବା ପରେ ମାତା ପାର୍ବତୀ ଜନ୍ମ ହୋଇଥିଲେ। ଶିବଙ୍କୁ ବିବାହ କରିବା ପାଇଁ ମାତା ପାର୍ବତୀ ହଜାର ହଜାର ବର୍ଷ ଧରି କଠୋର ତପସ୍ୟା କରିଥିଲେ। ସେହି ସମୟ ମଧ୍ୟରେ ସେ ଅବିବାହିତତା, ତ୍ୟାଗ, ଅନୁତାପ ଏବଂ ନିଷ୍ଠାର ଦେବୀ ଥିଲେ। ତାଙ୍କର ସେହି ରୂପ ମା ବ୍ରହ୍ମଚାରିଣୀ ନାମରେ ଜଣାଶୁଣା। ତାଙ୍କୁ ତାପଶାହାରିନୀ ମଧ୍ୟ କୁହାଯାଏ।