ଭୁବନେଶ୍ୱର: କଳିଙ୍ଗ ଷ୍ଟାଡିୟମର ଟେନିସ ସେଂଟରରେ ଏମ୨୫ ଭୁବନେଶ୍ୱର ଆଇଟିଏଫ ୱାର୍ଲ୍ଡ ଟେନିସ ଟୁର ୨୦୨୪ ଆୟୋଜିତ ହେଉଛି । ଶୁକ୍ରବାର ଓଡିଶାର ଷ୍ଟାର ଖେଳାଳି କବୀର ହନ୍ସ ପୁରୁଷ ଡବଲ୍ସ ଫାଇନାଲରେ ପ୍ରବେଶ କରିଛନ୍ତି । କବୀର ଏବଂ ତାଙ୍କ ପାର୍ଟନର ରିଷଭ ଅଗ୍ରୱାଲ ସେମିଫାଇନାଲରେ ୩ ନମ୍ବର ମାନ୍ୟତାପ୍ରାପ୍ତ ଯୋଡି ସିଦ୍ଧାନ୍ତ ଭାଟିଆ ଓ ବିଷ୍ପୁ ବର୍ଦ୍ଧନଙ୍କୁ ୬-୨, ୭-୬(୭-୪) ସେଟରେ ପରାସ୍ତ କରିଥିଲେ । ପ୍ରଥମ ସେଟରେ କବୀର ଏବଂ ରିଷଭ ସହଜରେ ବିଜୟ ହାସଲ କରିଥିଲେ ମଧ୍ୟ ଦ୍ୱିତୀୟ ସେଟରେ କଡା ସଂଘର୍ଷ ଦେଖିବାକୁ ମିଳିଥିଲା ।
ଟପ ସିଡ ଇଗର ଆଗାଫୋନଭ ଓ ବୋଗଡାନ ବୋବରୋଭ ଦ୍ୱିତୀୟ ସେମିଫାଇନାଲରେ ଭାରତୀୟ ଯୋଡି ଇଶକ୍ୟୁ ଇକବଲ ଓ ଫୈଜଳ କମାରଙ୍କୁ ୩-୬, ୭-୬(୮-୬) ଓ ୧୦-୮ରେ ପରାସ୍ତ କରି ଫାଇନାଲରେ ପ୍ରବେଶ କରିଛନ୍ତି । ଶନିବାର ଡବଲ୍ସ ଫାଇନାଲ ଖେଳାଯିବ । ପୁରୁଷ ସିଙ୍ଗଲ୍ସରେ ଭାରତର ଆର୍ଯ୍ୟନ ଶାହ ଚେକ ରିପବ୍ଲିକର ଟପ ସିଡ ଡାଲିବର ଭର୍ସିନିଆଙ୍କୁ ଭେଟିବେ ।