ନୋଏଡା: ଫିଲ୍ମ ଦେଖି ପାଇଲେ ଆଇଡ଼ିଆ l ଘର ଭିତରେ କଲେ ଗଞ୍ଜେଇ ଚାଷ l ସେ ବି ପୁଣି ଏମିତି ସେମିତି ଗଞ୍ଜେଇ ନୁହେଁ, ପ୍ରିମିୟମ ଗଞ୍ଜେଇ l ଉତ୍ତରପ୍ରଦେଶର ଗ୍ରେଟର ନୋଏଡାରେ ଜଣେ 46 ବର୍ଷୀୟ ବ୍ୟକ୍ତି ତାଙ୍କ ଘର ଭିତରେ ଏହି ଗଞ୍ଜେଇ ଚାଷ କରିଛନ୍ତି l ଆପାର୍ଟମେଣ୍ଟର ଦଶମ ମହଲାରେ ରହୁଥିବା ଏହି ବ୍ୟକ୍ତି ଜଣଙ୍କ ଫିଲ୍ମ ଦେଖି ସେଥିରୁ ଆଇଡ଼ିଆ ନେଇ ନିଜ ଫ୍ଲାଟ ଭିତରେ ହିଁ ପ୍ରିମିୟମ ଗଞ୍ଜେଇ ଚାଷ କରିଛନ୍ତି l ଏନେଇ ବିଶେଷ ସୂତ୍ରରୁ ଖବର ପାଇ ପୋଲିସ ଏବଂ ଅବକାରୀ ବିଭାଗ ଚଢ଼ାଉ କରିଥିଲେ l ଯେତେବେଳେ ପୋଲିସ ଫ୍ଲାଟ ଉପରେ ଚଢ଼ାଉ କରିଥିଲା ସେତେବେଳେ ସେମାନେ ଏକ ଇନଡୋର ନର୍ସରୀ ଦେଖି ଆଶ୍ଚର୍ଯ୍ୟ ହୋଇଗଲେ l କିନ୍ତୁ ବଗିଚାରେ ଫୁଲ ନଥିଲା ବରଂ ଗଞ୍ଜେଇ ଗଛ ଏବଂ ଚାଷ ବୃଦ୍ଧି ପାଇଁ ଆବଶ୍ୟକୀୟ ସାମଗ୍ରୀ ଦେଖିଥିଲା l ଶେଷରେ ଅଭିଯୁକ୍ତ ରାହୁଲ ଚୌଧୁରୀକୁ ଗିରଫ କରିଛି ପୋଲିସ l
ପୋଲିସ ସୂଚନା ଅନୁସାରେ, ଅତ୍ୟାଧୁନିକ ଜ୍ଞାନ କୌଶଳ ବ୍ୟବହାର କରି ଆପାର୍ଟମେଣ୍ଟରେ ପ୍ରିମିୟମ ଗଞ୍ଜେଇ ଚାଷ କରି ନିଶା କରାବାର କରୁଥିଲା ଅଭିଯୁକ୍ତ ଜଣଙ୍କ l ସେହି ଗଞ୍ଜେଇକୁ ଡାର୍କ ୱେବ ମାଧ୍ୟମରେ ସପ୍ଲାଇ ବାହାରକୁ କରୁଥିଲା l ସେ ପ୍ରାୟ ୬ ମାସ ଧରି ଗଞ୍ଜେଇ ଚାଷ କରୁଥିଲେ । ୱେବ୍ ସିରିଜ୍ ଏବଂ କ୍ରାଇମ ଡ୍ରାମା ଦେଖି ଏହି ଆଇଡ଼ିଆ ପାଇଥିଲା ଅଭିଯୁକ୍ତ l ଅନ୍ତର୍ଜାତୀୟ ୱେବସାଇଟରୁ ମଞ୍ଜି ଅର୍ଡର କରୁଥିଲା ଅଭିଯୁକ୍ତ ରାହୁଲ l ଧରାନପଡ଼ିବା ପାଇଁ ସେ କ୍ରେତାମାନଙ୍କ ସହ ଏନକ୍ରିପ୍ଟ ହୋଇଥିବା ମେସେଜିଂ ପ୍ଲାଟଫର୍ମର ମଧ୍ୟ ବ୍ୟବହାର କରୁଥିଲେ ।
ପୋଲିସର କହିବା ଅନୁସାରେ ଅଭିଯୁକ୍ତ ଜଣଙ୍କ ଉଚ୍ଚ ଶିକ୍ଷିତ l ଇଂରାଜୀରେ ସେ ସ୍ନାତକ କରିଛନ୍ତି l ଚଢ଼ାଉ ପରେ ଅଭିଯୁକ୍ତକୁ ଗିରଫ କରିବା ସହ ବାସଭବନରୁ ୮୦ କିଲୋଗ୍ରାମର ଗଞ୍ଜେଇ ଗଛ ସହ ୨ କେଜି ଗଞ୍ଜେଇ ଜବତ କରାଯାଇଛି । ଏଥିସହ ଅନେକ ସାର, କୀଟନାଶକ, ପ୍ୟାକେଜିଂ ସାମଗ୍ରୀ ଏବଂ ଡିଜିଟାଲ ସ୍କେଲ୍ ଜବତ କରିଛି ପୋଲିସ ।