ମୁମ୍ବାଇ: ନିକଟରେ ବଲିଉଡରେ ଏକ ହରର୍ କମେଡି ଫିଲ୍ମ ରିଲିଜ ହୋଇଥିଲା । ଯାହା ବକ୍ସ ଅଫିସରେ ଭଲ ଆୟ ମଧ୍ୟ କରିଥିଲା । ତେବେ ଏହି ଚଳଚ୍ଚିତ୍ରକୁ ଅନେକ ଲୋକ ଥିଏଟରରେ ଦେଖିପାରିନଥିଲେ । ସେହି ଲୋକମାନେ ଏବେ କେବେ ଏହି ଫିଲ୍ମ ଓଟିଟି ପ୍ଲାଟଫର୍ମରେ ରିଲିଜ ହେବ ସେନେଇ ଅପେକ୍ଷା କରି ବସିଛନ୍ତି ।
ସାଧାରଣତଃ ଥିଏଟରରେ ମୁକ୍ତିଲାଭ ହେବାର ୫୦ ରୁ ୬୦ ଦିନ ଭିତରେ ଯେ କୌଣସି ଚଳଚ୍ଚିତ୍ର ଓଟିଟିରେ ମୁକ୍ତିଲାଭ କରିଥାଏ । କିନ୍ତୁ ଏପର୍ଯ୍ୟନ୍ତ ଏହି ଫିଲ୍ମଟି ଓଟିଟିରେ ରିଲିଜ ହୋଇନାହିଁ । ଆଜ୍ଞା ହଁ ଆମେ କହୁଛୁ କାର୍ତ୍ତିକ ଅର୍ଯ୍ୟନଙ୍କ ଅଭିନୀତ ‘ଭୁଲ ଭୁଲେୟା ୩’ । ତେବେ ଏହି ଫିଲ୍ମକୁ ଦେଖିନଥିବା ପ୍ରଶଂସକଙ୍କ ପାଇଁ ଏବେ ଆସିଛି ଖୁସି ଖବର । ଖୁବ ଶୀଘ୍ର ଓଟିଟି ପ୍ଲାଟଫର୍ମରେ ରିଲିଜ ହେବାକୁ ଯାଉଛି ଭୁଲ ଭୁଲେୟା ୩ ।
ଆସନ୍ତା ୨୦୨୫ ଜାନୁୟାରୀ ମାସରେ ଓଟିଟି ପ୍ଲାଟଫର୍ମରେ ରିଲିଜ ହେବାକୁ ଯାଉଛି ‘ଭୁଲ ଭୁଲେୟା ୩’ । ସୂଚନା ଅନୁସାରେ, ଚଳିତ ବର୍ଷ ଦିପାବଳୀ ଅବସରରେ ବଲିଉଡର ଦୁଇଟି ବଡ ଚଳଚ୍ଚିତ୍ର ପ୍ରେକ୍ଷାଳୟରେ ମୁକ୍ତିଲାଭ କରିଥିଲା । ସିଙ୍ଘମ ଏଗେନ ଏବଂ ‘ଭୁଲ୍ ଭୁଲେୟା ୩’ । କାର୍ତ୍ତିକ ଆର୍ଯ୍ୟନ୍, ତୃପ୍ତି ଡିମିରି, ମାଧୁରୀ ଦୀକ୍ଷିତ ଏବଂ ବିଦ୍ୟା ବାଲାନ୍ ଅଭିନୀତ ହରର୍ କମେଡି ଚଳଚ୍ଚିତ୍ର ‘ଭୁଲ୍ ଭୁଲେୟା ୩’ ।
୨୦୨୨ରେ ରିଲିଜ ହୋଇଥିବା ‘ଭୁଲ ଭୁଲେୟା ୨’ ର ସିକ୍ୱେଲ ହେଉଛି ଏହି ଫିଲ୍ମ । ତେବେ ‘ଭୁଲ ଭୁଲେୟା’ ଫ୍ରାଞ୍ଚାଇଜ୍ ର ସମସ୍ତ ତିନୋଟି ଚଳଚ୍ଚିତ୍ର ବକ୍ସ ଅଫିସରେ ସୁପରହିଟ୍ ବୋଲି ପ୍ରମାଣିତ ହେବା ସହ ଭୟ ଆୟ ମଧ୍ୟ କରିଥିଲା । ୧୦୦ ରୁ ୧୫୦ କୋଟି ବଜେଟରେ ନିର୍ମିତ ଭୁଲ ଭୁଲେୟା ୩ ବକ୍ସ ଅଫିସରେ ୪୦୦ କୋଟି ଆୟ କରିଥିଲା । ଅନିସ୍ ବାଜମିଙ୍କ ନିର୍ଦ୍ଦେଶିତ ଏହି ଫିଲ୍ମ ଅଜୟ ଦେବଗନଙ୍କ ସିଙ୍ଘମ ଏଗେନକୁ କଡା ଟକ୍କର ଦେଇଥିଲା ।