ମେଲବୋର୍ଣ୍ଣ: ଅଷ୍ଟ୍ରେଲିଆ ବିପକ୍ଷ ବକ୍ସିଂ ଡେ ଟେଷ୍ଟରେ ଟିମ ଇଣ୍ଡିଆ ଅଧିନାୟକ ରୋହିତ ଶର୍ମା ଓପନିଂ କରିପାରନ୍ତି ବୋଲି ରିପୋର୍ଟ ପ୍ରକାଶ ପାଇଛି । ବର୍ଡର-ଗାଭାସ୍କର ଟ୍ରଫିର ୪ର୍ଥ ମ୍ୟାଚ ଏମସିଜିରେ ଡିସେମ୍ବର ୨୬ରେ ଖେଳାଯିବ । ଭାରତ ୨ ସ୍ପିନର ରଣନୀତିରେ ଓହ୍ଲାଇପାରେ । ପ୍ରଥମ ଟେଷ୍ଟରେ ରୋହିତ ଖେଳି ନ ଥିବା ବେଳେ ଦ୍ୱିତୀୟ ଟେଷ୍ଟରେ ସେ ଓପିନଂ କରି ନ ଥିଲେ । ସେ ମାତ୍ର ୧୯ ରନ କରିବାକୁ ସକ୍ଷମ ହୋଇଥିଲେ । ବ୍ୟାଟିଂ ଅର୍ଡର ପରିବର୍ତନ ହେବା ପରେ କେଏଲ ରାହୁଲ ଓ ରୋହିତ ଭଲ ବ୍ୟାଟିଂ ପ୍ରଦର୍ଶନ କରିପାରି ନାହାନ୍ତି । କ୍ରିକେଟ ଅଷ୍ଟ୍ରେଲିଆ ବୁଧବାର ମେଲବୋର୍ଣ୍ଣ ଟେଷ୍ଟ ପାଇଁ ଚୂଡାନ୍ତ ଏକାଦଶର ଘୋଷଣା କରିଛି । ଟ୍ରେଭିସ ହେଡ ଫିଟ ହୋଇଥିବା ବେଳେ ଜୋଶ ହାଜେଲଉଡଙ୍କ ସ୍ଥାନରେ ସ୍କଟ ବୋଲାଣ୍ଡଙ୍କୁ ସାମିଲ କରାଯାଇଛି । ସ୍ୟାମ କୋଷ୍ଟାସ ପଦାର୍ପଣ କରିବେ ।
୫ ମ୍ୟାଚ ବିଶିଷ୍ଟ ସିରିଜରେ ଉଭୟ ଟିମ ଗୋଟିଏ ଲେଖାଏଁ ମ୍ୟାଚରେ ବିଜୟ ହାସଲ କରିଛନ୍ତି । ୱାର୍ଲ୍ଡ ଟେଷ୍ଟ ସିରିଜ ଫାଇନାଲରେ ପ୍ରବେଶ ପାଇଁ ଭାରତକୁ ବାକି ଥିବା ୨ଟି ଟେଷ୍ଟରେ ବିଜୟ ଜରୁରୀ ହୋଇପଡିଛି । ରୋହିତ ଏବଂ ବିରାଟ କୋହଲିଙ୍କ ଫର୍ମ ଏବେ ବି ଦଳ ପାଇଁ ଚିନ୍ତାର କାରଣ ସାଜିଛି । ମେଲବୋର୍ଣ୍ଣରେ କୋହଲିଙ୍କ ଭଲ ରେକର୍ଡ ଥିବାରୁ ତାଙ୍କଠାରୁ ପ୍ରଶଂସକ ଏକ ବଡ ଇନିଂସ ଆଶା କରିଛନ୍ତି ।