ବେଙ୍ଗାଲୁରୁ: ମନ୍ଦିର ପ୍ରସାଦ ଖାଇବାକୁ କାହାକୁ ଅବା ଭଲ ନଲାଗେ। ପୂଜା ପର୍ବରେ ପ୍ରସାଦ ସେବନ ଏକ ପ୍ରକାର ରୀତିନୀତି କହିଲେ ଭୁଲ ହେବନି। ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଏପରି ଏକ ମନ୍ଦିର ଅଛି ଯେଉଁଠିକାର ପ୍ରସାଦ ବେଶ ପ୍ରସିଦ୍ଧ। ସବୁଠୁ ବେଶୀ ଆଶ୍ଚର୍ଯ୍ୟ କଥା ହେଉଛି ଏହି ମନ୍ଦିରରେ ଥାଳି କି ପତ୍ର ନୁହେଁ, ଚଟାଣରେ ପ୍ରସାଦ ସେବନ କରନ୍ତି ଭକ୍ତ।
ଏହି ପ୍ରାଚୀନ ମନ୍ଦିର ଦକ୍ଷିଣ ଭାରତର ପଶ୍ଚିମ ଉପକୂଳର ଉଡୁପିରେ ଅବସ୍ଥିତ। ଏହି ସ୍ଥାନକୁ ମନ୍ଦିର ଭୂମି କିମ୍ବା ପର୍ଶୁରାମ କ୍ଷେତ୍ର ମଧ୍ୟ କୁହାଯାଏ। ଭଗବାନ ଶ୍ରୀକୃଷ୍ଣଙ୍କ ଉଦ୍ଦେଶ୍ୟରେ ସମର୍ପିତ ଏହି ମନ୍ଦିରକୁ ଉଡୁପି କୃଷ୍ଣ ମନ୍ଦିର ଭାବରେ ମଧ୍ୟ ଜଣାଶୁଣା। ଉଡୁପି ଶ୍ରୀକୃଷ୍ଣ ମନ୍ଦିରର ଇତିହାସ ପ୍ରାୟ ୧୦୦୦ ବର୍ଷ ପୁରୁଣା ବୋଲି ବିଶ୍ୱାସ କରାଯାଏ। ଲୋକମାନେ ଏହା ମଧ୍ୟ କୁହନ୍ତି ଯେ ଏହି ଚମତ୍କାର ମନ୍ଦିରଟି ୧୩ଶହ ଶତାବ୍ଦୀରେ ବୈଷ୍ଣବ ସନ୍ଥ ଶ୍ରୀ ମାଧବାଚାର୍ଯ୍ୟଙ୍କ ଦ୍ୱାରା ପ୍ରତିଷ୍ଠିତ ହୋଇଥିଲା।
ଏହି ମନ୍ଦିର ବିଷୟରେ ଏକ ଲୋକପ୍ରିୟ କାହାଣୀ ଅଛି ଯେ ଭକ୍ତମାନଙ୍କୁ ମନ୍ଦିର ଚଟାଣରେ ପ୍ରସାଦ ପରିବେଷଣ କରାଯାଏ। ଏକ ବିଶ୍ୱାସ ଅଛି ଯେ ଭକ୍ତମାନେ ନିଜେ ଚଟାଣରେ ପ୍ରସାଦ ଖାଇବାକୁ ଦାବି କରନ୍ତି। କୁହାଯାଏ ଯେ ଯେଉଁ ଭକ୍ତଙ୍କ ମନସ୍କାମନା ପୂରଣ ହୁଏ, ସେମାନେ ମନ୍ଦିର ଚଟାଣରେ ପ୍ରସାଦ ଖାଇଥା’ନ୍ତି। ଏହି ପ୍ରସାଦକୁ ପ୍ରସାଦମ୍ କିମ୍ବା ନୈବେଦ୍ୟମ କୁହାଯାଏ। ଏହି ମନ୍ଦିରର ଚଟାଣ ପ୍ରସିଦ୍ଧ ବ୍ଲାକ୍ କାଡପ୍ପା ପଥରରେ ନିର୍ମିତ।
ଉଡୁପି ଶ୍ରୀକୃଷ୍ଣ ମନ୍ଦିରର ଆଉ ଏକ ବିଶେଷ କଥା ହେଉଛି ଯେ ଏହି ମନ୍ଦିରରେ ନଅଟି ଛିଦ୍ର ଥିବା ଝରକା ଦେଇ ଭଗବାନ ଶ୍ରୀକୃଷ୍ଣଙ୍କୁ ପୂଜା କରାଯାଏ। କୁହାଯାଏ ଯେ ଝରକାରେ ହୋଇଥିବା ଏହି ନଅଟି ଗାତ ନଅଟି ଗ୍ରହ ସହିତ ସଂଯୁକ୍ତ। ଏହା ମଧ୍ୟ ବିଶ୍ୱାସ କରାଯାଏ ଯେ ଏହି ଝରକା ଦେଇ ଭଗବାନ ଶ୍ରୀକୃଷ୍ଣଙ୍କ ପୂଜା କରିବା ପରେ ଲୋକମାନେ ସନ୍ତୋଷ ପାଆନ୍ତି ଏବଂ ସେମାନଙ୍କ ଜୀବନରେ ସୁଖ ଏବଂ ସମୃଦ୍ଧି ଆସିଥାଏ। ଏହି ମନ୍ଦିରର ଗୋଟିଏ ବିଶେଷତ୍ୱ ହେଉଛି ଏହାର ଚାରିପାଖରେ ୮ଟି ମଠ ଅଛି । ଏହି ମନ୍ଦିରଗୁଡିକରେ ପ୍ରବେଶ କରିବା ଓ ପୂଜା କରିବା ପାଇଁ ଅନେକ ନିୟମ ଅଛି।
ମନ୍ଦିରରେ ପ୍ରବେଶ କରିବା ପୂର୍ବରୁ, ଆପଣ ଏକ ବିଶାଳ ଗୋପୁରାମ ଝରକା ଦେଖିବେ, ଯାହାକି ଦ୍ରାବିଡ଼ ସ୍ଥାପତ୍ୟ ଶୈଳୀରେ ନିର୍ମିତ। ଏହି ଝରକାରୁ ଆପଣ ସିଧାସଳଖ ଭଗବାନଙ୍କୁ ଦେଖିପାରିବେ। କିମ୍ବଦନ୍ତୀ ଅନୁଯାୟୀ ଶ୍ରୀକୃଷ୍ଣଙ୍କ ପ୍ରକୃତ ଭକ୍ତ କନକଦାସ ଏହି ମନ୍ଦିର ପରିଦର୍ଶନ କରିଥିଲେ କିନ୍ତୁ ତାଙ୍କୁ ପୂଜା କରିବାକୁ ଦିଆଯାଇନଥିଲା । ତେଣୁ ସେ ଝରକା ବାଟେ ଶ୍ରୀକୃଷ୍ଣଙ୍କ ଦେଖି ସେଠାରେ ହିଁ ପ୍ରାର୍ଥନା କରିଥିଲେ। ତେବେ ଆଜି ବି ଲୋକମାନେ ପ୍ରଥମେ ଭଗବାନଙ୍କୁ ଝରକା ଦେଇ ଦେଖନ୍ତି ଏବଂ ତା’ପରେ ଆଗକୁ ବଢ଼ନ୍ତି।
Comments are closed.