ୱାଶିଂଟନ: ଇସ୍ରାଏଲ ଏବଂ ଇରାନ ମଧ୍ୟରେ ଘମାଘୋଟ ଯୁଦ୍ଧ ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇରାନର ରାଜଧାନୀ ତେହେରାନର ଲୋକମାନଙ୍କୁ ଚେତାବନୀ ଦେଇଛନ୍ତି।
ସୂଚନା ଅନୁଯାୟୀ, ଟ୍ରମ୍ପ ସମସ୍ତ ନାଗରିକଙ୍କୁ ତୁରନ୍ତ ତେହେରାନ ଛାଡିବାକୁ କହିଛନ୍ତି। ଏହା ସହିତ ଟ୍ରମ୍ପ ପୁଣି ଥରେ ପରମାଣୁ ଚୁକ୍ତି କଥା ଦୋହରାଇ କହିଛନ୍ତି ଯେ ଇରାନ ଆମେରିକା ସହିତ ଏକ ପରମାଣୁ ଚୁକ୍ତି ସ୍ୱାକ୍ଷର କରିବା ଉଚିତ ଥିଲା। ସୋସିଆଲ ମିଡିଆ ପ୍ଲାଟଫର୍ମ ଟ୍ରୁଥ୍ ସୋସିଆଲରେ ଟ୍ରମ୍ପ କହିଛନ୍ତି ଯେ ‘ଇରାନ ପରମାଣୁ ଅସ୍ତ୍ର ରଖିପାରିବ ନାହିଁ। ମୁଁ ଏହା ବାରମ୍ବାର କହିଛି। ସମସ୍ତେ ତୁରନ୍ତ ତେହେରାନ ଛାଡିବା ଉଚିତ।’
ଏହି ସମୟରେ ଜଣେ ଆମେରିକୀୟ ଅଧିକାରୀ କହିଛନ୍ତି ଯେ ଇସ୍ରାଏଲ-ଇରାନ ବିବାଦ ହ୍ରାସ କରିବା ପାଇଁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଜି-୭ ନେତାଙ୍କ ବିବୃତ୍ତିରେ ସ୍ୱାକ୍ଷର କରିବେ ନାହିଁ। ଅପରପକ୍ଷରେ କାନାଡିୟ ଏବଂ ୟୁରୋପୀୟ କୂଟନୀତିଜ୍ଞ କହିଛନ୍ତି ଯେ କାନାଡାରେ ଜି-୭ ଶିଖର ସମ୍ମିଳନୀରେ ଦେଶଗୁଡ଼ିକ ସଂଘର୍ଷ ଉପରେ ଆଲୋଚନା ଜାରି ରଖିଛନ୍ତି। ଜି-୭ ସମ୍ମିଳନୀ ଜୁନ୍ ୧୭ରେ ଶେଷ ହେଉଛି।
ତେବେ ତେହେରାନ ଛାଡିବା ପାଇଁ ଟ୍ରମ୍ପଙ୍କ ଚେତାବନୀ ପରେ ଇରାନର ରାଜଧାନୀରେ ଜୋରଦାର ବିସ୍ଫୋରଣ ଶୁଣାଯାଇଛି।
Comments are closed.