ନୂଆଦିଲ୍ଲୀ: ଭାରତୀୟ ଖାଦ୍ୟ ସୁରକ୍ଷା ଏବଂ ମାନକ ପ୍ରାଧିକରଣ (FSSAI) ଚା’ କୁ ନେଇ ଏକ ସ୍ପଷ୍ଟ ମତ ଦେଇଛି। କେବଳ କାମେଲିଆ ସାଇନେସିସ୍ ଗଛରୁ ତିଆରି ଉତ୍ପାଦଗୁଡ଼ିକୁ ହିଁ “ଚା” କୁହାଯାଇପାରିବ ବୋଲି ସ୍ପଷ୍ଟ ଭାବରେ କୁହାଯାଉଛି।
ନିୟମ ଅନୁଯାୟୀ, କାଙ୍ଗରା ଚା, ସବୁଜ ଚା ଏବଂ ଇନଷ୍ଟାଣ୍ଟ ଚା ମଧ୍ୟ କାମେଲିଆ ସାଇନେସିସ୍ ଗଛରୁ ତିଆରି ହେବା ଆବଶ୍ୟକ ବୋଲି କୁହାଯାଇଛି। ତେବେ ହର୍ବାଲ୍ ଚା, ରୁଇବୋସ୍ ଚା ଏବଂ ଫୁଲ ଚା ଭଳି ଉତ୍ପାଦଗୁଡ଼ିକୁ “ଚା” କହିବା ଭୁଲ ଓ ଏହାକୁ ଭୁଲ ବ୍ରାଣ୍ଡିଂ ବୋଲି ବିବେଚନା କରାଯାଏ। ଏଥିସହିତ ଏପରି କରିବା ଦ୍ବାରା ଲୋକମାନେ ଭ୍ରମିତ ହେଉଛନ୍ତି ବୋଲି କୁହାଯାଇଛି। ଏପରି ପାନୀୟ ବର୍ତ୍ତମାନ ମାଲିକାନା କିମ୍ବା ଅଣ-ନିର୍ଦ୍ଦିଷ୍ଟ ଖାଦ୍ୟ ନିୟମ ଅଧୀନରେ ଆସିବ ବୋଲି fssai ତରଫରୁ କୁହାଯାଇଛି। ଏହି ନିର୍ଦ୍ଦେଶ ସମସ୍ତ ନିର୍ମାତା ଏବଂ ବିକ୍ରେତାଙ୍କ ପାଇଁ ବାଧ୍ୟତାମୂଳକ କରାଯାଇଛି। ଏଥିସହିତ ଖାଦ୍ୟ ସାମଗ୍ରୀର ପ୍ୟାକେଜରେ ସଠିକ୍ ଏବଂ ମୂଳ ନାମ ପ୍ରଦର୍ଶନ କରିବା ବାଧ୍ୟତାମୂଳକ ବୋଲି ମଧ୍ୟ କୁହାଯାଇଛି।
ତେବେ କାମେଲିଆ ସାଇନେସିସ୍ ରୁ ତିଆରି ହୋଇନଥିବା ଉତ୍ପାଦଗୁଡ଼ିକରେ “ଚା” ଶବ୍ଦ ବ୍ୟବହାର କଲେ ତାହା ଭୁଲ ବ୍ରାଣ୍ଡିଂ ଭାବରେ ବିବେଚନା କରାଯିବ। ସମସ୍ତ ନିର୍ମାତା, ବିକ୍ରେତା, ଆମଦାନୀକାରୀ ଏବଂ ଇ-କମର୍ସ ପ୍ଲାଟଫର୍ମଗୁଡ଼ିକୁ ଏଥିପ୍ରତି ଧ୍ୟାନ ଦେବାକୁ କୁହାଯାଇଛି। ଏଥିସହିତ ଔଷଧୀୟ କିମ୍ବା ଉଦ୍ଭିଦ-ଆଧାରିତ ପାନୀୟ ମାଲିକାନା ଖାଦ୍ୟ କିମ୍ବା ଅଣ-ନିର୍ଦ୍ଦିଷ୍ଟ ଖାଦ୍ୟ ନିୟମ,୨୦୧୭ ଅଧୀନରେ ଆସିବ।
ଏହି ନିୟମ ଉଲ୍ଲଂଘନ କଲେ ଖାଦ୍ୟ ସୁରକ୍ଷା ଏବଂ ମାନକ ଆଇନ ୨୦୦୬ ଅନୁଯାୟୀ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁହାଯାଇଛି।