ନୂଆଦିଲ୍ଲୀ: ତାଲାବନ୍ଦ ଯୋଗୁଁ ଦେଶର ବିଭିନ୍ନ ରାଜ୍ୟରେ ଫସି ରହିଥିବା ଶ୍ରମିକଙ୍କ ପାଇଁ ବଡ ଘୋଷଣା କରିଛନ୍ତି କେନ୍ଦ୍ର ସରକାର । ଗୃହମନ୍ତ୍ରାଳୟ ପକ୍ଷରୁ ଏସ୍ଓପି ଜାରି କରି କୁହାଯାଇଛି ଯେ, ରାଜ୍ୟ ଭିତରେ ଦାଦନ ଶ୍ରମିକ ଅନ୍ୟ ସ୍ଥାନକୁ ଚାହିଁଲେ ଯିବା ଆସିବା କରିପାରିବେ । ଶ୍ରମିକଙ୍କୁ ଶିଳ୍ପ, ନିର୍ମାଣ ଓ ଉତ୍ପାଦନ କ୍ଷେତ୍ରରେ ନିୟୋଜିତ କରାଯାଇପାରିବ । କୃଷି ଓ ନରେଗା କାମ ମଧ୍ୟ କରିପାରିବେ ।
ବସ୍ରେ ଯାତ୍ରା ବେଳେ ଶ୍ରମିକମାନେ ସାମାଜିକ ଦୂରତା ବଜାୟ ରଖିବେ । ପରେ ବ୍ୟବହାର ହୋଇଥିବା ବସ୍ଗୁଡିକୁ ବିଶୋଧନ କରାଯିବ। ଶ୍ରମିକମାନେ ଯେଉଁ ସଂସ୍ଥା ତଥା କମ୍ପାନୀ ପାଇଁ କାମ କରୁଛନ୍ତି ତାହାର କର୍ତ୍ତୃ ପକ୍ଷ ସେମାନଙ୍କ ଖାଇବା ପିଇବା ବ୍ୟବସ୍ଥା କରିବେ ।
ଏପ୍ରିଲ ୨୦ ଅର୍ଥାତ ଆସନ୍ତାକାଲି ଠାରୁ କେନ୍ଦ୍ର ଓ ଗୃହ ମନ୍ତ୍ରାଳୟର ଏହି ନିର୍ଦ୍ଦେଶ ଲାଗୁ ହେବ । ତେବେ ଅବରୋଧ ଅଂଚଳରେ ଥିବା ଶ୍ରମିକଙ୍କ ପାଇଁ ଏହା ଲାଗୁ ହେବ ନାହିଁ । ଏସ୍ଓପିରେ ଜାରି କରି ସ୍ପଷ୍ଟ କରାଯାଇଛି ଯେ, କରୋନା ଲକ୍ଷଣ ନଥିବା ଶ୍ରମିକମାନଙ୍କୁ ସ୍କ୍ରିନିଂ କରି କାମ ପାଇଁ ଅନୁମତି ଦିଆଯିବ । ତେବେ ବର୍ତ୍ତମାନ ସ୍ଥିତିରେ ଶ୍ରମିକମାନେ ଗୋଟିଏ ରାଜ୍ୟରୁ ଅନ୍ୟ ରାଜ୍ୟକୁ ଯାଇ ପାରିବେ ନାହିଁ ବୋଲି କେନ୍ଦ୍ର ସରକାର କହିଛନ୍ତି ।
Comments are closed.