ମୁମ୍ବାଇ: ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ମଙ୍ଗଳବାର ଟିମ୍ ଇଣ୍ଡିଆର ପୂର୍ବତନ ପେସ ବୋଲର ଅଜିତ ଅଗରକରଙ୍କୁ ପୁରୁଷ ଜାତୀୟ ଦଳର ଚୟନ କମିଟିର ଅଧ୍ୟକ୍ଷ ଭାବେ ନିଯୁକ୍ତି ଦେଇଛି। ଏହା ପୂର୍ବରୁ ଚେତନ ଶର୍ମା ମୁଖ୍ୟ ଚୟନକର୍ତ୍ତା ଥିଲେ।
ସୁଲକ୍ଷଣା ନାଏକ, ଅଶୋକ ମାଲହୋତ୍ରା ଏବଂ ଜତିନ ପରଞ୍ଜପେଙ୍କୁ ନେଇ ଗଠିତ କ୍ରିକେଟ୍ ପରାମର୍ଶଦାତା କମିଟି (ସିଏସି) ପୁରୁଷ ଚୟନ କମିଟିରେ ଜଣେ ଚୟନକର୍ତ୍ତା ପଦ ପାଇଁ ଆବେଦନକାରୀଙ୍କ ସାକ୍ଷାତକାର ନେଇଥିଲେ। ତିନି ଜଣିଆ ସିଏସି ସର୍ବସମ୍ମତି କ୍ରମେ ଅଜିତ ଅଗରକରଙ୍କୁ ଏହି ପଦବୀ ପାଇଁ ସୁପାରିସ କରିଛି।
ଏହି ପୂର୍ବତନ ଭାରତୀୟ ଅଲରାଉଣ୍ଡର ୨୬ଟି ଟେଷ୍ଟ, ୧୯୧ଟି ଦିନିକିଆ ଏବଂ ଚାରିଟି ଟି-୨୦ ମ୍ୟାଚ୍ ଖେଳିବା ସହିତ ୧୧୦ଟି ପ୍ରଥମ ଶ୍ରେଣୀ, ୨୭୦ ଲିଷ୍ଟ ଏ ଏବଂ ୬୨ ଟି-୨୦ ମ୍ୟାଚ୍ ଖେଳିଛନ୍ତି।
ଜଣେ ପୂର୍ବତନ ପେସ ବୋଲର ଭାବେ ସେ ୨୦୦୭ରେ ଦକ୍ଷିଣ ଆଫ୍ରିକାରେ ଅନୁଷ୍ଠିତ ପ୍ରଥମ ଟି-୨୦ ବିଶ୍ୱକପରେ ଭାରତର ବିଜୟୀ ଦଳର ସଦସ୍ୟ ଥିଲେ। ଦିନିକିଆରେ ଭାରତୀୟ ବ୍ୟାଟ୍ସମ୍ୟାନଙ୍କ ଦ୍ୱାରା ଦ୍ରୁତତମ ଅର୍ଦ୍ଧଶତକ ହାସଲ କରିବାର ରେକର୍ଡ ଏବେ ବି ତାଙ୍କ ନାଁରେ ରହିଛି, ଯାହା ୨୦୦୦ରେ ଜିମ୍ବାଓ୍ବେ ବିପକ୍ଷରେ ୨୧ ବଲରେ ଅର୍ଦ୍ଧଶତକ ହାସଲ କରିଥିଲେ। ପ୍ରାୟ ଏକ ଦଶନ୍ଧି ଧରି ସେ ଦ୍ରୁତତମ ୫୦ ଦିନିକିଆ ଓ୍ୱିକେଟ ହାସଲ କରିବାର ରେକର୍ଡ ମଧ୍ୟ ନିଜ ନାଁରେ କରିଥିଲେ, ମାତ୍ର ୨୩ଟି ମ୍ୟାଚରେ ଏହି ମାଇଲଖୁଣ୍ଟ ହାସଲ କରିଛନ୍ତି। ତାଙ୍କ ଅଭିଜ୍ଞତାକୁ ଅନୁସରଣ କରି, ସେ ମୁମ୍ବାଇ ଦଳର ମୁଖ୍ୟ ଚୟନକର୍ତ୍ତା ଭାବେ ନିୟୁକ୍ତ ହେବା ସହ ଦିଲ୍ଲୀ କ୍ୟାପିଟାଲ୍ସର କୋଚିଂ ଦାୟିତ୍ୱ ତୁଲାଇଥିଲେ।
ବିସିସିଆଇ ପକ୍ଷରୁ ଜାରି ଏକ ବିଜ୍ଞପ୍ତିରେ କୁହାଯାଇଛି ଯେ, କମିଟି ଅଗରକରଙ୍କୁ ବରିଷ୍ଠତା ଆଧାରରେ ପୁରୁଷ ଚୟନ କମିଟିର ଅଧ୍ୟକ୍ଷ ଭାବେ ନିଯୁକ୍ତି ଦେବାକୁ ସୁପାରିସ କରିଛି।
ପୁରୁଷ ଚୟନ କମିଟି: ଅଜିତ୍ ଅଗରକର (ଅଧ୍ୟକ୍ଷ), ଶିବ ସୁନ୍ଦର ଦାସ, ସୁବ୍ରତୋ ବାନାର୍ଜୀ, ସଲିଲ ଅଙ୍କୋଲା, ଶ୍ରୀଧରନ୍ ଶରତ।
Comments are closed.