ମୁମ୍ବାଇ: ମୁମ୍ବାଇରେ ହାଉସଫୁଲ-୫ ପାଇଁ ସୁଟିଂ କରୁଥିବା ବେଳେ ବଲିଉଡ ଖିଲାଡି ଷ୍ଟାର ଅକ୍ଷୟ କୁମାର ଏକ ଦୁର୍ଘଟଣାର ଶିକାର ହୋଇଛନ୍ତି । ଶୁଟିଂ ସମୟରେ ସେ ଷ୍ଟଣ୍ଟ କରୁଥିବାବେଳେ ସେହିସମୟରେ ତାଙ୍କ ଆଖିରେ ଆଘାତ ଲାଗିଛି । ତେବେ ତାଙ୍କ ସ୍ୱାସ୍ଥ୍ୟ ସମ୍ବନ୍ଧୀୟ ସୂଚନା ସାମ୍ନାକୁ ଆସିଛି ବର୍ତ୍ତମାନ ଅଭିନେତା ଭଲ ଅଛନ୍ତି ।
ଖବର ଅନୁଯାୟୀ, ଅକ୍ଷୟ କୁମାର ହାଉସଫୁଲ-୫ର ସେଟରେ ଥିଲେ ଏବଂ ଷ୍ଟଣ୍ଟ କରିବା ସମୟରେ ଅକ୍ଷୟଙ୍କ ଆଖିରେ କିଛି ଉଡିକି ପଡିଯାଇଥିଲା । ଏହା ପରେ ଅକ୍ଷୟଙ୍କ ଚିକିତ୍ସା ପାଇଁ ଡାକ୍ତରଙ୍କୁ ତୁରନ୍ତ ଫିଲ୍ମର ସେଟକୁ ଡକାଯାଇଥିଲା । ଡାକ୍ତର ଅକ୍ଷୟଙ୍କ ଆଖିରେ ପଟି ବାନ୍ଧି କିଛି ସମୟ ବିଶ୍ରାମ ନେବାକୁ କହିଥିଲେ । ଅକ୍ଷୟ ସେଠାରେ ସୁଟିଂ ବନ୍ଦ କରିଥିଲେ କିନ୍ତୁ ବାକି କଳାକାରଙ୍କ ସହ ସୁଟିଂ ଜାରି ରହିଥିଲା । ତେବେ ଅକ୍ଷୟ ଶୀଘ୍ର ସେଟକୁ ଫେରିବାକୁ ଚାହୁଁଛନ୍ତି, କାରଣ ଫିଲ୍ମର ସୁଟିଂ ଶେଷ ପର୍ଯ୍ୟାୟରେ ଅଛି । ଆଉ ଅକ୍ଷୟ କୁମାର ତାଙ୍କ ସମୟକୁ ନେଇ କେତେ ପକ୍କା ତାହାତ ଆପଣମାନେ ଜାଣିଥିବେ ନିଶ୍ଚୟ ।
କେବେ ରିଲିଜ ହେବ ଫିଲ୍ମ..
ଖବର ଅନୁଯାୟୀ, ହାଉସଫୁଲ୍-୫ର ଶେଷ କାର୍ଯ୍ୟସୂଚୀ ମୁମ୍ବାଇରେ ସୁଟିଂ କରାଯାଉଛି । ଏହା ପରେ ଏହି ଟିମ୍ ଚିତ୍ରାକୋଟ ଗ୍ରାଉଣ୍ଡକୁ ଏହାର କ୍ଲାଇମାକ୍ସ ଏବଂ ଗୀତ ପାଇଁ ଯିବ । ତେବେ ହାଉସଫୁଲ୍-୫ ହେଉଛି ଏକ ମଲ୍ଟି ଷ୍ଟାରର ଫିଲ୍ମ ଯେଉଁଥିରେ ଅନେକ ପ୍ରସିଦ୍ଧ ଅଭିନେତା ସ୍କ୍ରିନ୍ ସେୟାର କରୁଥିବା ଦେଖିବାକୁ ମିଳିବ । ଏଥିମଧ୍ୟରେ ଅକ୍ଷୟ କୁମାର, ରିତିଶ ଦେଶମୁଖ, ଅଭିଷେକ ବଚ୍ଚନ, କିର୍ତ୍ତୀ ଖରବନ୍ଦା, ଫରଦୀନ ଖାନ, ସଞ୍ଜୟ ଦତ୍ତ, ଜ୍ୟାକଲିନ ଫର୍ଣ୍ଣାଣ୍ଡିଜ, ଚଙ୍କି ପାଣ୍ଡେ, ମିଥୁନ ଚକ୍ରବର୍ତ୍ତୀ, ଅର୍ଜୁନ ରାମପାଲ, ମଲାଇକା ଅରୋରା, ଜ୍ୟାକି ଶ୍ରଫ, ବବି ଦେଓଲ , ବମନ ଇରାନୀ, ରାଜପାଲ ଯାଦବଙ୍କ ଭଳି କଳାକାର ସାମିଲ ଅଛନ୍ତି ।