ରାଜସ୍ଥାନ ମୁଖ୍ୟମନ୍ତ୍ରୀଙ୍କ ପୁଅ ବୈଭବଙ୍କୁ ଇଡି ସମନ୍ ଘଟଣାରେ କେନ୍ଦ୍ର ସରକାରଙ୍କୁ ଗେହଲଟଙ୍କ ଟାର୍ଗେଟ୍

ଜୟପୁର: ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କ ପୁଅ ବୈଭବ ଗେହଲଟଙ୍କୁ ଇଡି ସମନ୍ ହେବା ପରେ ଅଶୋକ ଗେହଲଟ କେନ୍ଦ୍ର ସରକାରଙ୍କୁ ଆକ୍ରମଣ କରିଛନ୍ତି। ସେ କହିଛନ୍ତି, ‘ଆମେ ଦେଶର ରାସ୍ତାରେ କୁକୁର ଅପେକ୍ଷା ଇଡି ଲୋକ ଅଧିକ ବୁଲୁଛନ୍ତି।’ ସୂଚନା ଥାଉକି ଶୁକ୍ରବାର ପଚରାଉଚରା ପାଇଁ ବୈଭବଙ୍କୁ ଡାକିଛି ପ୍ରବର୍ତ୍ତନ ନିର୍ଦ୍ଦେଶାଳୟ। ବୈଦେଶିକ ମୁଦ୍ରା ପ୍ରବନ୍ଧନ ଅଧିନିୟମ ଉଲ୍ଲଂଘନ ଅଭିଯୋଗରେ ବୈଭବଙ୍କୁ ସମନ କରିଛି ଇଡି।

ମୁଖ୍ୟମନ୍ତ୍ରୀ ଅଶୋକ ଗେହଲୋଟ୍ କହିଛନ୍ତି, ଦୁର୍ଭାଗ୍ୟଜନକ ଯେ ଏକ ନିର୍ବାଚନ ରାଜ୍ୟର ମୁଖ୍ୟମନ୍ତ୍ରୀ କହିବାକୁ ପଡୁଛି ଯେ, ଇଡି ଏହି ଦେଶରେ କୁକୁରମାନଙ୍କ ଅପେକ୍ଷା ଅଧିକ ବୁଲୁଛି | କୌଣସି ଦେଶ ପାଇଁ ଏହାଠାରୁ ବଡ ଦୁର୍ଭାଗ୍ୟ କ’ଣ ହୋଇପାରେ ? ମୁଁ କ୍ରୋଧିତ ଯେ କଂଗ୍ରେସ ୭୬ ବର୍ଷ ପର୍ଯ୍ୟନ୍ତ ଯେଉଁ ଦେଶକୁ ଏକ କରି ରଖିଥିଲେ ସେହି ଦେଶ ପାଇଁ ଇନ୍ଦିରା ଗାନ୍ଧୀ ଏବଂ ରାଜୀବ ଗାନ୍ଧୀ ସହିଦ ହୋଇଛନ୍ତି। “ବାଂଲାଦେଶ ଗଠନ ହେଲା। ପାକିସ୍ତାନକୁ ଦୁଇ ଖଣ୍ଡ ହେଲା। ଏହି ଲୋକମାନେ (ବିଜେପି) ଆଜି ଇନ୍ଦିରା ଗାନ୍ଧୀଙ୍କ ନାମ ମଧ୍ୟ ନେଉନାହାଁନ୍ତି। ଯେଉଁମାନେ ଇତିହାସରୁ ଦେଶ ପାଇଁ ବଳିଦାନ ଦେଇଛନ୍ତି ସେମାନଙ୍କ ନାମ ଆପଣ ଲିଭାଉଛନ୍ତି, କିନ୍ତୁ ଏପରି ହେବ ନାହିଁ।”

ଆସନ୍ତା ୨୩ ନଭେମ୍ବରରେ ରାଜସ୍ଥାନରେ ଭୋଟ ହେବାକୁ ଥିବାବେଳେ ଜାଣିଶୁଣି କେନ୍ଦ୍ରୀୟ ତଦନ୍ତକାରୀ ସଂସ୍ଥାର ଅପବ୍ୟବହାର କରୁଥିବା କହିଛନ୍ତି ମୁଖ୍ୟମନ୍ତ୍ରୀ ଅଶୋକ ଗେହଲଟ। ପୂର୍ବରୁ ମଧ୍ୟ ଦିଲ୍ଲୀରେ ଇଡି ପକ୍ଷରୁ ବଡ଼ ବଡ଼ ନେତାଙ୍କୁ ନୋଟିସ ମଧ୍ୟ ପଠାଯାଇଛି। ତେବେ ରାଜସ୍ଥାନରେ ମୁଖ୍ୟମନ୍ତ୍ରୀଙ୍କ ପୁଅଙ୍କୁ ଇଡିର ନୋଟିସ ହେବା ପରେ ରାଜ୍ୟ ରାଜନୀତିରେ ଚର୍ଚ୍ଚା ଆରମ୍ଭ ହୋଇଛି। ଅନ୍ୟପଟେ ନିର୍ବାଚନ ପାଖେଇ ଆସୁଥିବାରୁ ବିଜେପି ଜାଣିଶୁଣି କଂଗ୍ରେସ ନେତାଙ୍କ ଉପରେ ଚଢାଉ କରୁଛି ବୋଲି ଅଭିଯୋଗ କରିଛନ୍ତି କଂଗ୍ରେସ ସମର୍ଥକ। ଦେଶର ଜନତାଙ୍କ ପାଖରେ ବିଜେପି ବିଶ୍ବାସ ହରାଉଥିବାରୁ ଇଡି, ସିବିଆଇ ଏବଂ ଆଇଟି ଭଳି କେନ୍ଦ୍ରୀୟ ସଂସ୍ଥାର ଅପବ୍ୟବହାର କରୁଛି ବୋଲି ଅଭିଯୋଗ କରିଛନ୍ତି କଂଗ୍ରେସ ନେତା।