ଭୁବନେଶ୍ୱର: ରାଷ୍ଟ୍ରୀୟ ବାଲ ସ୍ୱାସ୍ଥ୍ୟ କାର୍ଯ୍ୟକ୍ରମ (ଆରବିଏସକେ) ଯୋଜନାରେ ୨୦୧୩ରେ ନିଯୁକ୍ତି ପାଇଥିବା ଆୟୁଷ ଡାକ୍ତରମାନେ ୨୦୨୪ ଜାନୁଆରୀ ୧୬ ତାରିଖ ସୁଦ୍ଧା ସେମାନଙ୍କ ଚାକିରିକୁ ନିୟମିତ କରିବାକୁ ସରକାର ଦାବି କରି ଶନିବାର ବିକ୍ଷୋଭ ପ୍ରଦର୍ଶନ କରିଥିଲେ। ଦାବି ପୂରଣ ନହେଲେ ସାମୂହିକ ଛୁଟିରେ ଯିବେ ବୋଲି ଚେତାବନୀ ଦେଇଛନ୍ତି।
ଡାକ୍ତରମାନେ ଅଭିଯୋଗ କରିଛନ୍ତି ଯେ, ନିୟମିତ ଡାକ୍ତରଙ୍କ ଭଳି ସମାନ କାମ କରିବା ସତ୍ତ୍ୱେ ସରକାର ସେମାନଙ୍କୁ ଅଣଦେଖା କରୁଛନ୍ତି। ସେମାନେ ବର୍ଷ ବର୍ଷ ଧରି ସର୍ବନିମ୍ନ ଦରମାରେ କାମ କରୁଥିବା ବେଳେ ସରକାରଙ୍କ ଚୁକ୍ତିଭିତ୍ତିକ କର୍ମଚାରୀ ଉଚ୍ଛେଦ ନୀତିରୁ ବାଦ୍ ପଡ଼ିଛନ୍ତି, ଯାହାକୁ ସେମାନେ ବିଶ୍ୱାସଘାତକତା ବୋଲି ଭାବୁଛନ୍ତି।
ଆୟୁଷ ଡାକ୍ତର ସଙ୍ଘର ସଭାପତି ପ୍ରଭାତ ମହାନ୍ତି କହିଛନ୍ତି, ଆମେ ଚାହୁଁଛୁ ସରକାର ଆରବିଏସକେ ଆୟୁଷ ଡାକ୍ତରଙ୍କୁ ନିୟମିତ କରନ୍ତୁ। ସ୍ୱାସ୍ଥ୍ୟ ସଚିବଙ୍କ ଜରିଆରେ ଆନ୍ତଃମନ୍ତ୍ରଣାଳୟ କମିଟିକୁ ଆମର ଦାବି ଜଣାଇଛୁ। ଏନ୍ଏଚ୍ଏମ୍ ର ମିଶନ୍ ନିର୍ଦ୍ଦେଶକ ମଧ୍ୟ ଆମ ସ୍ଥିତି ଓ ଦାବି ସମ୍ପର୍କରେ ଅବଗତ ଅଛନ୍ତି।
ଆସନ୍ତା ୧୬ ତାରିଖ ସୁଦ୍ଧା ଦାବି ପୂରଣ ନହେଲେ ଡାକ୍ତରମାନେ କାର୍ଯ୍ୟବନ୍ଦ ଆନ୍ଦୋଳନ କରିବେ ବୋଲି ପ୍ରଭାତ ମହାନ୍ତି ଚେତାବନୀ ଦେଇଛନ୍ତି। ଏପରିକି ଏସମା ଲାଗୁ କରିବା ପାଇଁ ସରକାରଙ୍କ ଧମକ ସେମାନଙ୍କ ବିରୋଧକୁ ରୋକି ପାରିବ ନାହିଁ ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି।
ଏବେ ଚୁକ୍ତିଭିତ୍ତିକ କାର୍ଯ୍ୟ କରୁଥିବା ଡାକ୍ତରମାନେ ନିୟମିତ ଡାକ୍ତରଙ୍କଠାରୁ ଅଧାରୁ କମ୍ ଦରମା ପାଉଛନ୍ତି। ରାଜ୍ୟରେ ଥିବା ୪ ହଜାର ୯୫ଟି ଆୟୂଷ ଡାକ୍ତର ପଦବୀ ମଧ୍ୟରୁ ମାତ୍ର ୧୨୭୦ ଜଣ ଦ୍ୱିତୀୟ ଶ୍ରେଣୀ କର୍ମଚାରୀ ନିୟମିତ ଅଛନ୍ତି। ଏନ୍ଏଚ୍ଏମ୍ ଓ ଆରବିଏସକେ ଯୋଜନାରେ ନିଯୁକ୍ତି ପାଇଥିବା ଆୟୁର୍ବେଦ ଓ ହୋମିଓପାଥିର ଠିକା ଡାକ୍ତରମାନେ ଅଧିକ ପ୍ରଭାବିତ ହୋଇଛନ୍ତି।
Comments are closed.