କିଏ ଏହି ଲୋକଗାୟିକା ଯାହାଙ୍କ ବିରୋଧରେ ଲାଗିଛି ଦେଶଦ୍ରୋହ ମାମଲା, ପହଲଗାମ ଆତଙ୍କୀ ହମଲା ଉପରେ ଦେଇଥିଲେ ବୟାନ

ନୂଆଦିଲ୍ଲୀ: ରାଜନୈତିକ ଗୀତ ଓ ୟୁଟ୍ୟୁବ କଣ୍ଟେଣ୍ଟ ପାଇଁ ଜଣାଶୁଣା ଭୋଜପୁରୀ ଗାୟିକା ନେହା ସିଂ ରାଠୋର ଏକ ବଡ଼ ଆଇନଗତ ବିବାଦରେ ଫସିଛନ୍ତି। ପହଲଗାମ ଆତଙ୍କୀ ହମଲା ପରେ ସୋସିଆଲ ମିଡିଆରେ କଥିତ ‘ଆପତ୍ତିଜନକ’ ପୋଷ୍ଟ ଯୋଗୁ ଲକ୍ଷ୍ନୌ ହଜରତଗଞ୍ଜ ଥାନାରେ ତାଙ୍କ ବିରୋଧରେ ଦେଶଦ୍ରୋହ ମାମଲା ରୁଜୁ ହୋଇଛି। ଲକ୍ଷ୍ନୌର ଗୁଡ଼ମ୍ବା ଅଞ୍ଚଳର କବି ଅଭୟ ପ୍ରତାପ ସିଂଙ୍କ ଅଭିଯୋଗ ଆଧାରରେ ଏଫଆଇଆର ରୁଜୁ ହୋଇଛି। ପୁଲିସ ଅଧିକାରୀଙ୍କ କହିବା ଅନୁଯାୟୀ, ନେହାଙ୍କ ବିରୋଧରେ ବିଏନଏସର ୧୧ଟି ଧାରା ଅନୁଯାୟୀ ମାମଲା ରୁଜୁ ହୋଇଛି।

ଅଭିଯୋଗ କ’ଣ?
ଅଭୟ ପ୍ରତାପ ସିଂ ଅଭିଯୋଗ କରିଛନ୍ତି ଯେ ନେହାଙ୍କ ପୋଷ୍ଟ ରାଷ୍ଟ୍ରବିରୋଧୀ ଏବଂ ସାମ୍ପ୍ରଦାୟିକ ଉତ୍ତେଜନାକୁ ଉସୁକାଇଛି। ବିଶେଷ କରି ପହଲଗାମ ଦୁର୍ଘଟଣା ସମ୍ପର୍କିତ ତାଙ୍କ ପୋଷ୍ଟକୁ ‘ଉତ୍ତେଜକ’ ଏବଂ ରାଷ୍ଟ୍ରୀୟ ଏକତା ପାଇଁ କ୍ଷତିକାରକ ବୋଲି ଅଭିଯୋଗ କରାଯାଇଛି। ନେହାଙ୍କ ବିରୋଧରେ ଭାରତର ସାର୍ବଭୌମତ୍ୱ, ଏକତା ଓ ଅଖଣ୍ଡତାକୁ ବିପଦରେ ପକାଇବା ଅଭିଯୋଗ ମଧ୍ୟ ରହିଛି। ଏହା ସହ ସୂଚନା ପ୍ରଯୁକ୍ତି ଆଇନ ଅନୁଯାୟୀ ମଧ୍ୟ ଏଫଆଇଆର ରୁଜୁ ହୋଇଛି।

ଏଫଆଇଆରରେ ୪ ପୋଷ୍ଟର ଉଲ୍ଲେଖ
୨୭ ଏପ୍ରିଲରେ ଅଭୟ ପ୍ରତାପ ସିଂଙ୍କ ଦ୍ୱାରା ରୁଜୁ ଏଫଆଇଆରରେ ନେହାଙ୍କ ୪ଟି ସୋସିଆଲ ମିଡିଆ ପୋଷ୍ଟର ଉଲ୍ଲେଖ ରହିଛି। ତିନୋଟି ପୋଷ୍ଟରେ ନେହା ମୋଦି ସରକାରଙ୍କୁ ପ୍ରଶ୍ନ କରିଛନ୍ତି। ଚତୁର୍ଥ ପୋଷ୍ଟ ‘ପିଟିଆଇ ପ୍ରମୋସନ’ ନାମକ ଏକ X ହ୍ୟାଣ୍ଡେଲର, ଯେଉଁଥିରେ ନେହାଙ୍କ ଏକ ଭିଡିଓ ସେୟାର କରି ଲେଖାଯାଇଛି, “ଏହି ଦେଶଭକ୍ତ ଭାରତୀୟ ଝିଅ ପହଲଗାମ ହମଲା ଉପରେ ମୋଦିଜୀଙ୍କୁ ଦର୍ପଣ ଦେଖାଇଲେ, ତେବେ ଗୋଦି ମିଡିଆ ପାଗଳ ହୋଇଗଲା ଓ ଏହି ଝିଅକୁ ଦେଶଦ୍ରୋହୀ କହି ଜୀବନ ନେବାକୁ ଧମକ ଦେଉଛି। ଝିଅଟି କେବଳ ପ୍ରଶ୍ନ ପଚାରିଛି, ସାହସ ଅଛି ତା’ର ପ୍ରଶ୍ନର ଉତ୍ତର ଦିଅ।”

ପହଲଗାମ ବିଷୟରେ କ’ଣ କହିଥିଲେ?
୨୩ ଏପ୍ରିଲରେ ନେହା ଏକ X ପୋଷ୍ଟରେ ମୋଦି ସରକାରଙ୍କୁ ଜାତି ଓ ଧର୍ମ ଆଧାରିତ ରାଜନୀତି କରିବା ଅଭିଯୋଗ କରିଥିଲେ। ସେ ଦାବି କରିଥିଲେ ଯେ ପହଲଗାମରେ ହୋଇଥିବା ଆତଙ୍କୀ ହମଲାରେ ୨୬ ନାଗରିକଙ୍କ ମୃତ୍ୟୁ ଗୁଇନ୍ଦା ଓ ସୁରକ୍ଷା ବିଫଳତାର ଫଳ। ଏକ ଭିଡିଓ ବାର୍ତ୍ତାରେ ସେ କହିଥିଲେ, “ମୁଁ ସରକାରଙ୍କୁ କ’ଣ ପ୍ରଶ୍ନ ପଚାରିବି? ଶିକ୍ଷା ଓ ସ୍ୱାସ୍ଥ୍ୟ ଏବେ ପ୍ରାସଙ୍ଗିକ ନୁହେଁ। ରାଷ୍ଟ୍ରବାଦୀ ରାଜନୀତି ସତ୍ତ୍ୱେ ଲୋକେ ମରୁଛନ୍ତି, ହିନ୍ଦୁ-ମୁସଲମାନ ଉତ୍ତେଜନା ଚରମରେ।” ସେ ବିଜେପି ସରକାରଙ୍କୁ ପୁଲୱାମା ହମଲାର ନାଁରେ ଭୋଟ ସଂଗ୍ରହ କରିବା ଅଭିଯୋଗ କରିଥିଲେ ଏବଂ ଚେତାବନୀ ଦେଇଥିଲେ ଯେ ଆଗାମୀ ବିହାର ନିର୍ବାଚନରେ ପହଲଗାମ ହମଲାକୁ ମଧ୍ୟ ଏହିଭଳି ବ୍ୟବହାର କରାଯିବ। ୨୬ ଏପ୍ରିଲରେ ସେ ପୁନର୍ବାର ପୋଷ୍ଟ କରି କହିଥିଲେ, “ଯଦି ବିହାର ନିର୍ବାଚନ ପହଲଗାମ ମୁଦ୍ଦାରେ ଲଢ଼ାଯାଏ, ତେବେ ବିହାରର ନିଜସ୍ୱ ମୁଦ୍ଦା ପଛରେ ପଡ଼ିଯିବ।”

କିଏ ନେହା ସିଂ ରାଠୋର?
ନେହା ସିଂ ରାଠୋର ଜଣେ ରାଜନୈତିକ ବ୍ୟଙ୍ଗ୍ୟକାରୀ ଓ ଲୋକଗାୟିକା, ଯିଏ ଭୋଜପୁରୀରେ ଗୀତ ରଚନା ଓ ଗାୟନ ପାଇଁ ପ୍ରସିଦ୍ଧ। ୧୯୯୭ରେ ବିହାରର ଜନ୍ଦାହାରେ ଜନ୍ମିତ ନେହା ଗତ କିଛି ବର୍ଷରେ ସୋସିଆଲ ମିଡିଆରେ ବିପୁଳ ଫଲୋଅର୍ସ ସଂଗ୍ରହ କରିଛନ୍ତି। ୟୁଟ୍ୟୁବରେ ତାଙ୍କର ୧୪.୫ ଲକ୍ଷରୁ ଅଧିକ ସବସ୍କ୍ରାଇବର ରହିଛନ୍ତି। ଏନଡିଟିଭି ଅନୁଯାୟୀ, ୨୦୧୮ରେ କାନପୁର ବିଶ୍ୱବିଦ୍ୟାଳୟରୁ ବିଏସସି ଡିଗ୍ରୀ ହାସଲ ପରେ ନେହାଙ୍କ ସଙ୍ଗୀତ ଯାତ୍ରା ଆରମ୍ଭ ହୋଇଥିଲା। ମୋବାଇଲରେ ଭୋଜପୁରୀ ଲୋକଗୀତ ରଚନା ଓ ଗାୟନ କରି ସେ ଫେସବୁକରେ ଅପଲୋଡ଼ କରୁଥିଲେ, ଯାହା ଧୀରେ ଧୀରେ ଲୋକପ୍ରିୟ ହେଲା। ସେ ପ୍ରସିଦ୍ଧ ଭୋଜପୁରୀ କବି ଭିଖାରୀ ଠାକୁର ଓ ମହେନ୍ଦ୍ର ମିସିରଙ୍କୁ ନିଜର ପ୍ରେରଣା ବୋଲି କହିଛନ୍ତି।