ଭୁବନେଶ୍ୱରକୁ ଇନ୍ଦୋର ସହ ତୁଳନା, ସଚେତନ ନ ହେଲେ ରୋକି ହେବନି କରୋନା ସଂକ୍ରମଣ

ଭୁବନେଶ୍ୱର: ଜନସାଧାରଣ ସଚେତନ ନହେଲେ କରୋନା ସଂକ୍ରମଣକୁ ରୋକି ହେବ ନାହିଁ । ସାମାଜିକ ଦୂରତା ବଜାୟ ରଖିବା ନିହାତି ଜରୁରୀ । କୋଭିଡ୍‌- ୧୯ର ସଂକ୍ରମଣକୁ ରୋକିବା ପାଇଁ ରାଜ୍ୟର ଗ୍ରାମାଞ୍ଚଳମାନଙ୍କର ଜନ ସାଧାରଣ ଯେତେଟା ସଚେତନ ଓ ସକ୍ରିୟ ସହରାଞ୍ଚଳର ଜନସାଧାରଣ ସେତେଟା ସଚେତନ ଓ ସକ୍ରିୟ ନୁହନ୍ତି ବୋଲି କହିଛନ୍ତି ରାଜ୍ୟ କୋଭିଡ୍‌-୧୯ ମୁଖପାତ୍ର ସୁବ୍ରତ ବାଗଚି। କରୋନା ସଂକ୍ରମଣକୁ ରୋକିବା ପାଇଁ ଗ୍ରାମାଞ୍ଚଳବାସୀ ପ୍ରତ୍ୟେକଟି ନିର୍ଦ୍ଦେଶକୁ ପାଳନ କରୁଛନ୍ତି । ହେଲେ ସହରାଞ୍ଚଳବାସୀ ଏହାକୁ ଅଣଦେଖା କରୁଥିବାରୁ କ୍ଷୋଭ ପ୍ରକାଶ କରିଛନ୍ତି ବାଗଚୀ।
ରାଜ୍ୟ ସରକାରଙ୍କ ପକ୍ଷରୁ ଆୟୋଜିତ ସାମ୍ବାଦିକ ସମ୍ମିଳନୀରେ ବାଗଚୀ ଆଜି ଇନ୍ଦୋର ସହ ଭୁବନେଶ୍ୱରର ତୁଳନା କରିଛନ୍ତି । ସେ କହିଛନ୍ତି, ଇନ୍ଦୋର ହେଉଛି ଦେଶର ଏକ ନମ୍ବର ସ୍ୱଚ୍ଛ ନଗରୀ। ସେହିପରି ଭୁବନେଶ୍ୱର ହେଉଛି ଦେଶର ଏକ ନମ୍ବର ସ୍ମାର୍ଟ ସିଟି। ଇନ୍ଦୋରର ଜନସଂଖ୍ୟା ୨୦ ଲକ୍ଷ ରହିଥିବା ବେଳେ ଭୁବନେଶ୍ୱରର ଜନସଂଖ୍ୟା ହେଉଛି ୧୦ ଲକ୍ଷ ।
ସେହିପରି ସମଗ୍ର ଦେଶରେ ଚିହ୍ନଟ ହୋଇଥିବା ୧୭୦ଟି କରୋନା ହଟସ୍ପଟ ମଧ୍ୟରେ ଉଭୟ ଇନ୍ଦୋର ଓ ଭୁବନେଶ୍ୱର ରହିଛନ୍ତି। ଭୁବନେଶ୍ୱରରେ ପ୍ରଥମ କରୋନା ରୋଗୀ ୧୬ ମାର୍ଚ୍ଚରେ ଚିହ୍ନଟ ହୋଇଥିବା ବେଳେ ଇନ୍ଦୋରରେ ପ୍ରଥମ କରୋନା ରୋଗୀ ଚିହ୍ନଟ ହୋଇଥିଲେ ୨୫ ମାର୍ଚ୍ଚରେ।
ସେହିପରି ୨୦ ଅପ୍ରେଲ ସୁଦ୍ଧା ଇନ୍ଦୋରରେ ୮୯୨ ଜଣ କରୋନା ଆକ୍ରାନ୍ତଙ୍କୁ ଚିହ୍ନଟ କରାଯାଇଥିବା ବେଳେ ଭୁବନେଶ୍ୱରରେ ୪୬ ଜଣଙ୍କୁ ଚିହ୍ନଟ କରାଯାଇଛି । ଇନ୍ଦୋରରେ ୪୯ ଜଣ କରୋନା ଆକ୍ରାନ୍ତଙ୍କର ମୃତ୍ୟୁ ଘଟିଥିବା ବେଳେ ଭୁବନେଶ୍ୱରରେ ମାତ୍ର ଜଣଙ୍କର ମୃତ୍ୟୁ ଘଟିଛି ବୋଲି ବାଗଚୀ କହିଛନ୍ତ ।