ନୂଆଦିଲ୍ଲୀ: ଆଜିକାଲି ସୈଫ ଅଲୀ ଖାନଙ୍କ ଅଭିନୀତ ଫିଲ୍ମ ‘ଆଦିପୁରୁଷ’ର ରାବଣକୁ ନେଇ ବିବାଦ ଲାଗି ରହିଛି। କୁହାଯାଉଛି ଯେ ହିନ୍ଦୁ ଭାବନାରେ ଆଘାତ ଲାଗିଛି। ଏହି ସମୟରେ ଆଦିପୁରୁଷ ନିର୍ଦ୍ଦେଶକ ଓମ ରାଉତଙ୍କ କୋଟି କୋଟି ଟଙ୍କାର ଉପହାର ବିଷୟରେ ଚର୍ଚ୍ଚା କରାଯାଉଛି। ଆଦିପୁରୁଷର ନିର୍ଦ୍ଦେଶକ କୋଟି ଟଙ୍କାରୁ ଉର୍ଦ୍ଧ୍ୱ ମୂଲ୍ୟର ଏକ କାର ଉପହାର ପାଇଛନ୍ତି। ଟି-ସିରିଜ୍ ମାଲିକ ତଥା ଆଦିପୁରୁଷର ପ୍ରଡ୍ୟୁସର ଭୂଷଣ କୁମାର ତାଙ୍କୁ ଏହି ବଡ ଉପହାର ଦେଇଛନ୍ତି। ସେ କିଛି ଦିନ ପୂର୍ବରୁ କାର୍ତ୍ତିକ ଆର୍ଯ୍ୟନଙ୍କୁ ମଧ୍ୟ ସମାନ ଏକ ମୂଲ୍ୟବାନ ଉପହାର ଦେଇଥିଲେ। ଓମ ରାଉତଙ୍କ ବିଳାସପୂର୍ଣ୍ଣ କାରର ଫଟୋ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ଏବଂ ପ୍ରଶଂସକମାନେ ତାଙ୍କ କାରକୁ ବହୁତ ପସନ୍ଦ କରୁଛନ୍ତି।
ଏହି ଯାନର ନାମ ହେଉଛି ଫରାରୀ F8 ଟ୍ରିବୁଟୋ, ଯାହାର ମୂଲ୍ୟ ୪.୮ କୋଟି ଟଙ୍କାରୁ ଅଧିକ। ଏହି ନାଲି ରଙ୍ଗର କାର୍ ଦେଖିବାକୁ ବହୁତ ସୁନ୍ଦର ଏବଂ ଷ୍ଟାଇଲିସ୍। ଆଦିପୁରୁଷରେ ଶ୍ରୀ ରାମଙ୍କ ଭୂମିକାରେ ପ୍ରଭାସ ଅଛନ୍ତି ଏବଂ ସୈଫ୍ ଅଲୀ ଖାନ ରାବଣ ଭୂମିକାରେ ଅଛନ୍ତି। ଏହି ଚଳଚ୍ଚିତ୍ର ଆସନ୍ତା ବର୍ଷ ଜାନୁଆରୀ ୨୦୨୩ ରେ ମୁକ୍ତିଲାଭ କରିବ। ଏହା ଭୂଷଣ କୁମାରଙ୍କ ଟି-ସିରିଜ୍ ଦ୍ୱାରା ପ୍ରସ୍ତୁତ କରାଯାଉଛି। ଏହି ଚଳଚ୍ଚିତ୍ରରେ ମୁଖ୍ୟ ଭୂମିକାରେ କ୍ରିତି ସାନନ୍ ଏବଂ ସନ୍ନି ସିଂ ମଧ୍ୟ ଅଭିନୟ କରିଛନ୍ତି।
୪୫୦ କୋଟି ଟଙ୍କା ବ୍ୟୟରେ ନିର୍ମିତ ଫିଲ୍ମ ଆଦିପୁରୁଷ ର ବିବାଦ ଏହାର ଟିଜର ରିଲିଜ୍ ପରେ ଆରମ୍ଭ ହୋଇଛି। ଏହାକୁ ନେଇ ସୋସିଆଲ ମିଡିଆରେ ତୀବ୍ର ସମାଲୋଚନା କରାଯାଇଛି। ସୈଫ ଅଲି ଖାନଙ୍କ ଲଙ୍କେଶ ଲୁକକୁ ନେଇ ଲୋକମାନେ ବହୁତ ରାଗିଛନ୍ତି। ଏହି ଲୁକକୁ ଆଲାଉଦ୍ଦିନ ଖିଲଜୀ ସହିତ ତୁଳନା କରାଯାଉଛି।