ଭୁବନେଶ୍ୱର: ଇଣ୍ଡିଆ ଟିଭି ସିଏନ୍ଏକ୍ସ ଜନମତ ସର୍ଭେରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱାଧୀନ ଏନଡିଏକୁ ସ୍ପଷ୍ଟ ଜନାଦେଶ ମିଳିବା ପରେ ଓଡ଼ିଶାର ରାଜନୀତି ସରଗରମ ହୋଇଛି। ୫୪୩ ଲୋକସଭା ଆସନରୁ ଏନଡିଏ ୩୧୮ଟି ଆସନ ସହ ନିର୍ଣ୍ଣାୟକ ସଂଖ୍ୟା ଗରିଷ୍ଠତା ହାସଲ କରିବ ବୋଲି ସର୍ଭେରେ କୁହାଯାଇଛି। ଓଡ଼ିଶାରେ ବିଜୁ ଜନତା ଦଳ ୧୩ଟି ଆସନରେ ବିଜୟୀ ହେବ। ସେହିପରି ଭାରତୀୟ ଜନତା ପାର୍ଟି ୮ଟି ଆସନରେ ବିଜୟୀ ହେବ।
ନିର୍ବାଚନ ଫଳାଫଳ ଉପରେ ପ୍ରତିକ୍ରିୟା ରଖି ବିଜେଡି ସାଂସଦ ମୁନ୍ନା ଖାନ୍ ନିଜ ଦଳର ପ୍ରଦର୍ଶନ ଉପରେ ବିଶ୍ୱାସ ପ୍ରକଟ କରି କହିଛନ୍ତି ଯେ ୨୦୨୪ ଲୋକସଭା ନିର୍ବାଚନ ଫଳାଫଳ ୨୦୧୪ ଫଳାଫଳ ସହ ସମାନ ହେବ। ବିଜେଡି ୨୦ଟି ଲୋକସଭା ଆସନ ଜିତିବ ଏବଂ ବାକି ଆସନ ବିଜେପି ଓ କଂଗ୍ରେସ ମଧ୍ୟରେ ପ୍ରତିଦ୍ୱନ୍ଦ୍ୱିତା ହେବ ବୋଲି ସେ କହିଛନ୍ତି।
ଏହି ଅବସରରେ ଓଡ଼ିଶା ବିଜେପି ସଭାପତି ମନମୋହନ ସାମଲ ଏହି ସର୍ଭେକୁ ସ୍ୱାଗତ କରିବା ସହ ଆଗାମୀ ମାସରେ ସେମାନଙ୍କ ଆଧାରକୁ ସୁଦୃଢ଼ କରିବା ପାଇଁ ନିଷ୍ଠାର ସହ କାମ କରିବାକୁ ପ୍ରତିଶ୍ରୁତି ଦେଇଛନ୍ତି। ମନମୋହନ ସାମଲ ଗୁରୁତ୍ୱାରୋପ କରି କହିଥିଲେ ଯେ ମତଦାନର ସକରାତ୍ମକ ଫଳାଫଳ ଦଳକୁ ଏକାଗ୍ର ଓ ସମର୍ପିତ ରହିବାକୁ ପ୍ରେରଣା ଦେଇଛି।
ଅପରପକ୍ଷରେ ପିସିସି ସଭାପତି ଶରତ ପଟ୍ଟନାୟକ କହିଛନ୍ତି, ୧୯୯୫ର ଦୃଶ୍ୟପଟ ଏବେର ସ୍ଥିତି ସହ ସମାନ, ଯେଉଁଠି ବିଜୁ ପଟ୍ଟନାୟକ ସରକାର ଗଢ଼ିବେ ବୋଲି ଅନୁମାନ କରାଯାଉଥିଲା କିନ୍ତୁ କଂଗ୍ରେସ ପୁଣି କ୍ଷମତାକୁ ଫେରିଲା। ୨୦୨୪ ନିର୍ବାଚନରେ କଂଗ୍ରେସକୁ ୧୦ରୁ ୧୨ଟି ଲୋକସଭା ଆସନ ମିଳିପାରେ ବୋଲି କହିଛନ୍ତି।
ଭବିଷ୍ୟତର ନିର୍ବାଚନ ଲଢ଼େଇ ପାଇଁ ରାଜ୍ୟ ପ୍ରସ୍ତୁତ ହେଉଥିବା ବେଳେ, ରାଜନୈତିକ ନେତାଙ୍କ ଦ୍ୱାରା ପ୍ରକାଶ ପାଇଥିବା ମତାମତ ଆଗକୁ ଏକ ଉତ୍ସାହପୂର୍ଣ୍ଣ ପ୍ରତିଦ୍ୱନ୍ଦ୍ୱିତାର ସଙ୍କେତ ଦେଉଛି, ଯେଉଁଥିରେ ପ୍ରତ୍ୟେକ ଦଳ ନିଜର ସମ୍ଭାବନାକୁ ନେଇ ଆଶାବାଦୀ ଅଛନ୍ତି।
Comments are closed.