ଭୁବନେଶ୍ୱର: ରବିବାର ବିଜେଡି ପକ୍ଷରୁ ଭୁବନେଶ୍ୱର ମୁଖ୍ୟ ନିର୍ବାଚନ ଅଧିକାରୀଙ୍କ ନିକଟରେ ଅଭିଯୋଗ କରାଯାଇଛି। ଖୋର୍ଦ୍ଧା ଜିଲ୍ଲା ଟାଙ୍ଗୀ ବ୍ଲକ ଅନ୍ତର୍ଗତ ବୋଡାପୋଖରିଆ ଗାଁରେ ବିଜେପି ବୈଠକରେ ଯୋଗଦେଇ ଆଦର୍ଶ ଆଚରଣ ବିଧି ଉଲ୍ଲଂଘନ କରିଥିବା ଅଭିଯୋଗରେ ଭାରତୀୟ ରେଳବାଇର ୩ ଜଣ କର୍ମଚାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବିଜେଡି ଦାବି କରିଛି।
ଲିଖିତ ଅଭିଯୋଗରେ ଖୋର୍ଦ୍ଧା ଡିଭିଜନର କର୍ମଚାରୀମାନେ ହେଲେ ପୂର୍ତ୍ତ ନିରୀକ୍ଷକ ବିବି ମହାନ୍ତି ଓ ଯାତ୍ରା ଟିକେଟ ନିରୀକ୍ଷକ ଏସ୍ ଆର୍ ପଟ୍ଟନାୟକ ଓ ପ୍ରଭାକର ବରାଳ। ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀ ଓ ଚିଲିକା ବିଧାୟକ ପ୍ରଶାନ୍ତ ଜଗଦେବଙ୍କ ଦ୍ୱାରା ମାର୍ଚ୍ଚ ୨୯ ତାରିଖରେ ଆୟୋଜିତ ଏକ ବୈଠକରେ ଏହି ବ୍ୟକ୍ତିମାନେ ଯୋଗ ଦେଇଥିଲେ ବୋଲି ବିଜେଡି ନେତା ଦାବି କରିଛନ୍ତି।
ଏହି ବୈଠକରେ ଥିବା ଅଧିକାରୀଙ୍କ ଫଟୋକୁ ପ୍ରମାଣ ଭାବେ ପ୍ରଦାନ କରି ବିଜେଡି ଦାବି କରିଛି ଯେ ସେମାନଙ୍କ ଅଂଶଗ୍ରହଣ ଭାରତୀୟ ନିର୍ବାଚନ ଆୟୋଗ (ଇସିଆଇ) ଦ୍ୱାରା ସ୍ଥାପିତ ଏମସିସିର ଖୋଲାଉଲ୍ଲଂଘନ। ଏମସିସି ସ୍ପଷ୍ଟ ଭାବରେ ସରକାରୀ କର୍ମଚାରୀମାନଙ୍କୁ କୌଣସି ରାଜନୈତିକ ଦଳକୁ ସମର୍ଥନ କରିବା କିମ୍ବା କୌଣସି ରାଜନୈତିକ କାର୍ଯ୍ୟକଳାପରେ ଲିପ୍ତ ହେବା ଉପରେ ପ୍ରତିବନ୍ଧକ ଲଗାଇଛି ।
Comments are closed.