କେନ୍ଦ୍ର ଶିକ୍ଷାମନ୍ତ୍ରୀଙ୍କୁ ବିଜେଡି ସାଂସଦଙ୍କ ନିବେଦନ, ଦିଲ୍ଲୀ ବିଶ୍ବବିଦ୍ୟାଳୟରେ ଖୋଲାଯାଉ ଓଡ଼ିଆ ବିଭାଗ

ଭୁବନେଶ୍ୱର: ଦିଲ୍ଲୀ ବିଶ୍ବବିଦ୍ୟାଳୟରେ ଓଡ଼ିଆ ଭାଷା ପାଇଁ ଏକ ବିଭାଗ ପ୍ରତିଷ୍ଠା କରିବାକୁ ବିଜେଡି ରାଜ୍ୟସଭା ସାଂସଦ ଅମର ପଟ୍ଟନାୟକ କେନ୍ଦ୍ର ଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ନିବେଦନ କରିଛନ୍ତି। ଧର୍ମେନ୍ଦ୍ର ପ୍ରଧାନଙ୍କୁ ଚିଠି ଲେଖି ଅମର ପଟ୍ଟନାୟକ ଓଡ଼ିଆ ଭାଷାର ଗୁରୁତ୍ୱ ଓ ଓଡ଼ିଶାର ଅସ୍ମିତା ଓ ସ୍ୱାଭିମାନ ପ୍ରତି ଏହାର ଗୁରୁତ୍ୱ ଉପରେ ଗୁରୁତ୍ୱାରୋପ କରିଛନ୍ତି।

ଅମର ପଟ୍ଟନାୟକ କହିଛନ୍ତି ଯେ ଦିଲ୍ଲୀ ବିଶ୍ୱବିଦ୍ୟାଳୟରେ ଏବେ ବଙ୍ଗଳା ଭାଷା ପାଇଁ ସ୍ୱତନ୍ତ୍ର ବିଭାଗ ରହିଛି। ପଞ୍ଜାବୀ, ସଂସ୍କୃତ, ତାମିଲ, ତେଲୁଗୁ, ଏବଂ ଉର୍ଦ୍ଦୁ, ଉପରୋକ୍ତ ଭାଷା ଉପରେ ବିଏ ଏବଂ ଅନ୍ୟାନ୍ୟ ପାଠ୍ୟକ୍ରମ ପ୍ରଦାନ କରଯାଉଛି। ଯେଉଁ ଛାତ୍ରଛାତ୍ରୀମାନେ ଆନୁଷ୍ଠାନିକ ଶିକ୍ଷା ମାଧ୍ୟମରେ ନିଜ ସଂସ୍କୃତି ଓ ଭାଷାର ପରିସରକୁ ଶିଖିବା ଓ ବ୍ୟାପକ କରିବାକୁ ଆଗ୍ରହୀ, ସେମାନଙ୍କୁ ସହଯୋଗ ଓ ସଶକ୍ତ କରିବା ପାଇଁ ଓଡ଼ିଆ ଭାଷା ମଧ୍ୟ ଏକ ଉତ୍ସର୍ଗୀକୃତ ବିଭାଗ ପାଇଁ ଯୋଗ୍ୟ ବୋଲି ଅମର ପଟ୍ଟନାୟକ ଦୃଢ଼ୋକ୍ତି ପ୍ରକାଶ କରିଥିଲେ।

୨୦୧୪ ମସିହାରେ କେନ୍ଦ୍ର ସରକାର ଓଡ଼ିଆ ଭାଷାକୁ ଶାସ୍ତ୍ରୀୟ ଭାଷାର ମାନ୍ୟତା ପ୍ରଦାନ କରି ଏହାକୁ ଷଷ୍ଠ ଭାଷା ଏବଂ ଇଣ୍ଡୋ-ଆର୍ଯ୍ୟ ବର୍ଗର ପ୍ରଥମ ଭାଷା ଭାବେ ସମ୍ମାନଜନକ ମାନ୍ୟତା ପ୍ରଦାନ କରିଥିଲେ। ଅମର ପଟ୍ଟନାୟକ ଓଡ଼ିଆ ଭାଷାର ଅନନ୍ୟତାକୁ ଦୋହରାଇ ଦିଲ୍ଲୀ ବିଶ୍ୱବିଦ୍ୟାଳୟରେ ଓଡ଼ିଆ ଭାଷା ବିଭାଗ ପ୍ରତିଷ୍ଠା ଦିଗରେ ତୁରନ୍ତ ପଦକ୍ଷେପ ନେବାକୁ ଧର୍ମେନ୍ଦ୍ର ପ୍ରଧାନଙ୍କୁ ଅନୁରୋଧ କରିଥିଲେ, ଯାହା ଓଡ଼ିଶା ପାଇଁ ଗୌରବର ବିଷୟ ହେବ।

ଦିଲ୍ଲୀ ଓଡ଼ିଆ ଛାତ୍ର ସଙ୍ଘ ପକ୍ଷରୁ କରାଯାଇଥିବା ଗବେଷଣାରୁ ଜଣାପଡ଼ିଛି ଯେ, ଦିଲ୍ଲୀ ବିଶ୍ୱବିଦ୍ୟାଳୟର ଅନ୍ୟୂନ ୨୦୦ ଛାତ୍ରଛାତ୍ରୀ ଓଡ଼ିଆ ଭାଷାରେ ପାଠ୍ୟକ୍ରମ କରିବାକୁ ଆଗ୍ରହୀ ବୋଲି ବିଜେଡି ସାଂସଦ ଦାବି କରିଛନ୍ତି। ଅମର ପଟ୍ଟନାୟକ ଆହୁରି କହିଥିଲେ ଯେ ଦିଲ୍ଲୀ ବିଶ୍ୱବିଦ୍ୟାଳୟରେ ଅନ୍ୟୁନ ୬୧ ଜଣ ଓଡ଼ିଶାରୁ ଆସିଥିବା ଶିକ୍ଷକ ଅଛନ୍ତି, ଯେଉଁମାନେ ବିଶ୍ୱବିଦ୍ୟାଳୟରେ ଓଡ଼ିଆ ଭାଷା ବିଭାଗ ପ୍ରତିଷ୍ଠାକୁ ପ୍ରଶଂସା କରିବେ।