ଭୁବନେଶ୍ୱର: ପୁରୀ ଶ୍ରୀଜଗନ୍ନାଥ ମନ୍ଦିରର ରତ୍ନଭଣ୍ଡାରର ଚାବି ହଜିବା ଘଟଣାର ତଦନ୍ତ କମିସନଙ୍କ ରିପୋର୍ଟକୁ ଓଡ଼ିଶା ସରକାର ସାର୍ବଜନୀନ କରନ୍ତୁ ବୋଲି ବିଜେପି ବିଧାୟକ ଗଣେଶ ରାମ ସିଂହ ଖୁଣ୍ଟିଆ ସୋମବାର ଦାବି କରିଛନ୍ତି।
ଚଳିତ ମୌସୁମୀ ଅଧିବେଶନରେ ଓଡ଼ିଶା ବିଧାନସଭାରେ ଏହି ପ୍ରସଙ୍ଗ ଉଠାଇ ମୟୂରଭଞ୍ଜ ଯଶୀପୁର ବିଧାୟକ ଗଣେଶରାମ ସିଂହ ଖୁଣ୍ଟିଆ ପ୍ରଶ୍ନ କରିଥିଲେ ଯେ, ରିପୋର୍ଟ ସାର୍ବଜନୀନ କରିବା ପାଇଁ ସରକାର କାହିଁକି ସମୟ ମାଗୁଛନ୍ତି। ଏଯାଏଁ କେତେ କମିସନ ଗଠନ ହୋଇଛି, କେତେ ରିପୋର୍ଟ ଆସିଛି, ସେଗୁଡ଼ିକୁ ସାର୍ବଜନୀନ କରିବା ପାଇଁ ସରକାର କି ପଦକ୍ଷେପ ନେଇଛନ୍ତି, ସେ ସମ୍ପର୍କରେ ମଧ୍ୟ ସେ ଜାଣିବାକୁ ଚାହିଁଥିଲେ।
ଏହାର ଉତ୍ତରରେ ରାଜ୍ୟର ଗୃହ ରାଷ୍ଟ୍ରମନ୍ତ୍ରୀ ତୁଷାରକାନ୍ତି ବେହେରା କହିଥିଲେ ଯେ, ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିବା ନେଇ କମିସନ ରିପୋର୍ଟ ସରକାର ପାଇଛନ୍ତି ଏବଂ ଏହାର ସମୀକ୍ଷା କରାଯାଉଛି। ସେ ଆହୁରି ମଧ୍ୟ କହିଛନ୍ତି ଯେ ସରକାର 24ଟି ମାମଲାରେ କମିସନ ଗଠନ କରିଥିଲେ, ସେଥିମଧ୍ୟରୁ 20ଟି ଚୂଡାନ୍ତ ରିପୋର୍ଟ ଓ ଗୋଟିଏ ଅନ୍ତରୀଣ ରିପୋର୍ଟ ମିଳିଛି। ସେଥିମଧ୍ୟରୁ 13ଟି ରିପୋର୍ଟ ଗୃହରେ ଆଗତ ହୋଇସାରିଛି।
ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିବା ନେଇ ଯେଉଁ କମିସନ ଯେଉଁ ରିପୋର୍ଟ ଦେଇଥିଲେ, ତାହାକୁ ସରକାର ସାର୍ବଜନୀନ କରନ୍ତୁ ବୋଲି ବିଜେପି ଦାବି କରିଆସୁଛି। ରିପୋର୍ଟ ପ୍ରକାଶରେ ବିଳମ୍ବ କରି ସରକାର କିଛି ଲୁଚାଇବାକୁ ଚେଷ୍ଟା କରୁଛନ୍ତି ବୋଲି ଦଳ ଅଭିଯୋଗ କରିଛି।
ରତ୍ନଭଣ୍ଡାର ଚାବି ହଜିବା ଘଟଣା ଅନେକ ଦ୍ୱନ୍ଦ୍ୱ ଓ ବିବାଦ ସୃଷ୍ଟି କରିଛି। ଏହାପରେ ସରକାର ଏହି ଘଟଣାର ତଦନ୍ତ ପାଇଁ ଏକ କମିସନ ଗଠନ କରିଥିଲେ। ତେବେ କମିସନଙ୍କ ରିପୋର୍ଟକୁ ଏଯାଏଁ ସାର୍ବଜନୀନ କରାଯାଇନାହିଁ।
Comments are closed.