ରିଲଞ୍ଚ୍ ହେବ ବାଇଜୁସ୍‌: ବାଇଜୁ ରବିନ୍ଦ୍ରନ୍

ନୂଆଦିଲ୍ଲୀ:  ରିଲଞ୍ଚ୍ ହେବାକୁ ଯାଉଛି ବାଇଜୁସ୍‌। ଏନେଇ ନିଜେ ବାଇଜୁସ୍‌ର କୋ-ଫାଉଣ୍ଡର ବାଇଜୁ ରବିନ୍ଦ୍ରନ ସୂଚନା ଦେଇଛନ୍ତି। ରବିନ୍ଦ୍ରନ କହିଛନ୍ତି ଖୁବଶୀଘ୍ର କମ୍ପାନି ରିଲଞ୍ଚ ହେବ। ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ନିଜର ଏକ ପୁରୁଣା ଫଟୋ ସେୟାର କରି ରବିନ୍ଦ୍ରନ କହିଛନ୍ତି, ‘ ଆମେ ଭାଙ୍ଗିଯାଇଥିଲୁ, କିନ୍ତୁ ହାରିନାହୁଁ, ଆମେ ପୁଣି ଛିଡ଼ାହେବୁ।’

ସେ କହିଛନ୍ତି, ଆମେ ଆମର ପୁରୁଣା ସହଯୋଗୀଙ୍କ ସହ ରିଲଞ୍ଚ କରିବୁ। ହୁଏତ ମୋର ଅତି ଆଶାବାଦୀ ହେବା କିଛି ଲୋକଙ୍କୁ ପାଗଳାମୀ ବୋଲି ଲାଗିପାରେ। କିନ୍ତୁ ଏହା ଭୁଲନ୍ତୁ ନାହିଁ, ୧ ନମ୍ବର ହେବା ପାଇଁ ସମସ୍ତଙ୍କ ଠାରୁ ଭିନ୍ନ ଏବଂ ଅଜବ ହେବାକୁ ପଡ଼ିଥାଏ। ମୁଁ ଗତ ୨୦ ବର୍ଷରେ କଥା କହିବାକୁ ଆସିଛି, ଭଲ ୧୭ ବର୍ଷ, ଖରାପ ୨ ଏବଂ ଅତି ଖରାପ ୧। ୯ ବର୍ଷରେ ଆମେ ୨.୧୫ ଲକ୍ଷ ଗ୍ରାଜୁଏଟ୍ସଙ୍କୁ ହାୟର କରିଥିଲୁ। ଅନୁଭବି ଏବଂ ଏକାଡେମିକ୍ ବ୍ୟାକଗ୍ରାଉଣ୍ଡ୍ ଆଧାରରେ ଭେଦଭାବ ନକରି ସମସ୍ତଙ୍କୁ ସର୍ବନିମ୍ନ ୬ ଲକ୍ଷ ଟଙ୍କାର ଦରମା ଦେଇଥିଲୁ। ଏହି ଯୁବକଙ୍କୁ ତାଙ୍କ କ୍ୟାରିୟରର ପ୍ରଥମ ସୁଯୋଗ ଦେବା ମୋ ଜୀବନର ସବୁଠୁ ବଡ଼ ସମ୍ମାନ ଥିଲା।’’

Broke, not Broken. We will rise again. pic.twitter.com/dAekepwCtf

— Byju Raveendran (@ByjuofBYJUS) March 30, 2025

ସେ ଆହୁରି କହିଛନ୍ତି, ଗୋଟିଏ ସମୟ ଥିଲା ବାଇଜୁସ୍‌ ଦେଶର ସବୁଠୁ ବଡ଼ ଏଡ୍‌ଟେକ୍ ଷ୍ଟାର୍ଟଅପ୍‌ ଥିଲା। ୨୦୨୨ ପର୍ଯ୍ୟନ୍ତ ଏହାର ଭାଲ୍ୟୁ ୨୨ ବିଲିୟନ ଡଲାର ବା ପ୍ରାୟ ୧.୮୮ ଲକ୍ଷ କୋଟି ଟଙ୍କା ଥିଲା। କିନ୍ତୁ ଭୁଲ ଆର୍ଥିକ ପରିଚାଳନା ଏବଂ ଅନ୍ୟ ସମସ୍ୟା କାରଣରୁ ୨୦୨୪ରେ କମ୍ପାନିର ନେଟଓ୍ବର୍ଥ ଶୂନ ହୋଇଯାଇଥିଲା।

ସୂଚନାଯୋଗ୍ୟ, ପ୍ରଥମେ ୨୦୧୧ରେ ରବିନ୍ଦ୍ରନ ବାଇଜୁସର ଆରମ୍ଭ, ଏକ ଛୋଟ ଏଜୁକେସନ ପ୍ଲାଟଫର୍ମ ଭାବରେ ହୋଇଥିଲା। କିନ୍ତୁ ୨୦୧୫ରେ ଏହାର ଆପ୍ ଲଞ୍ଚ ସହ ଏହା ଦ୍ରୁତ ଭାବରେ ବୃଦ୍ଧି ପାଇଥିଲା। ପିଲାଙ୍କ ପାଇଁ ଇଣ୍ଟରାକ୍ଟିଭ ଲର୍ଣ୍ଣିଂ, ସହଜ ଭାଷା ଏବଂ ଟେକ୍ନୋଲୋଜିର ବ୍ୟବହାର ଏହାର ବିଶେଷତ୍ବ ଥିଲା। ୨୦୨୦-୨୧ରେ କୋଭିଡ୍ ମହାମାରୀ ଅନଲାଇନ୍ ଶିକ୍ଷାର ଚାହିଦା ବଢ଼ାଇଥିଲା ଏବଂ ବାଇଜୁସ ଏହାର ଫାଇଦା ଉଠାଇଥିଲା। ଶାହରୁଖ ଖାନଙ୍କ ସହ ଆକ୍ରାମକ ମାର୍କେଟିଂ ଏବଂ ହ୍ବାଇଟ ହ୍ୟାଟ୍‌ ଜୁନିୟର, ଆକାଶ ଭଳି କମ୍ପାନିଙ୍କ ଅଧିଗ୍ରହଣ କମ୍ପାନିକୁ ୨୦୨୨ରେ ୨୨ ବିଲିୟନ ଡଲାରର ଭାଲ୍ୟୁଏସନରେ ପହଞ୍ଚାଇଥିଲା।

ହେଲେ ୨୦୨୨ ପରେ ବାଇଜୁସ୍‌ ନିଜର ଲୋକପ୍ରିୟତା ହରାଇବାକୁ ଲାଗିଥିଲା।  ଋଣ ଭାର କମ୍ପାନି ଉପରେ ବୋଝ ହୋଇପଡ଼ିଲା। ଆର୍ଥିକ ରିପୋର୍ଟରେ ବିଳମ୍ବ କାରଣରୁ କମ୍ପାନୀକୁ ୨୦୨୧-୨୨ରେ ୮, ୨୪୫ କୋଟି ଟଙ୍କାର କ୍ଷତି ସହିବାକୁ ପଡିଥିଲା। ନିବେଶକମାନେ କମ୍ପାନିର ପାରଦର୍ଶିତା ଉପରେ ପ୍ରଶ୍ନ ଉଠାଇଥିଲେ।

୨୦୨୩ ରେ ଇଡି FEMA ଉଲ୍ଲଘଂନର ଯାଞ୍ଚ ଆରମ୍ଭ କରିଥିଲା। ବୋର୍ଡ ମେମ୍ବର ଏବଂ ଅଡିଟର ଡେଲଇଟ୍‌ ଇସ୍ତଫା ଦେଇଥିଲା। ଆମେରିକା ଋଣଦାତାମାନେ କମ୍ପାନିକୁ ଦେବାଳିଆ ଘୋଷଣା କରିବା ଦାବି କରିଥିଲେ। ଏହାପରେ କର୍ମଚାରୀଙ୍କୁ ଛଟେଇ କରାଯାଇଥିଲା। ଆଉ ଧୀରେ ଧୀରେ ବାଇଜୁସର ଭାଲ୍ୟୁଏସନ ଦ୍ରୁତ ଭାବରେ ଖସିଥିଲା।