ବାଲେଶ୍ୱର: ବାହାନଗା ଷ୍ଟେସନରେ ଘଟିଥିବା ମର୍ମନ୍ତୁଦ ରେଳ ଦୁର୍ଘଟଣା ମାମଲାରେ ସୋମବାର ସିବିଆଇ ଭାରତୀୟ ରେଳବାଇର ଆଉ ଦୁଇ ଜଣ କର୍ମଚାରୀଙ୍କୁ ପଚରାଉଚରା କରିଛି। ନାମ ଉଲ୍ଲେଖ ନଥିବା ଏହି ଦୁଇ କର୍ମଚାରୀଙ୍କୁ ଭୁବନେଶ୍ୱର ଉପକଣ୍ଠ ଚନ୍ଦକା ଥାନାରେ ଡକାଇ ସିବିଆଇ ଅଧିକାରୀଙ୍କ ଏକ ଟିମ୍ ପଚରାଉଚରା କରିଥିଲେ।
୨୦୨୩ ମସିହା ଜୁନ୍ ୨ ତାରିଖରେ ଘଟିଥିବା ଏହି ଦୁର୍ଘଟଣାରେ ଏଯାବତ ୨୯୪ ଜଣଙ୍କ ମୃତ୍ୟୁ ହୋଇଥିବା ବେଳେ ସିବିଆଇ ଏହାର ତଦନ୍ତ କରୁଛି। ଦକ୍ଷିଣ-ପୂର୍ବ ସର୍କଲର ରେଳ ସୁରକ୍ଷା କମିଶନର (ସିଆରଏସ)ଙ୍କ ତଦନ୍ତ ରିପୋର୍ଟରେ ଦର୍ଶାଯାଇଥିଲା ଯେ ଅତୀତରେ ଉତ୍ତର ସିଗନାଲରେ କରାଯାଇଥିବା ସିଗନାଲ୍ ସର୍କିଟ୍ ପରିବର୍ତ୍ତନରେ ତ୍ରୁଟି ଯୋଗୁଁ ଏହି ଦୁର୍ଘଟଣା ଘଟିଛି।
ଏହି ମାମଲାରେ ସିବିଆଇ ପୂର୍ବରୁ ତିନି ଜଣ ରେଳ କର୍ମଚାରୀଙ୍କୁ ଗିରଫ କରିସାରିଛି। ସେମାନେ ହେଲେ ସିନିୟର ସେକ୍ସନ ଇଞ୍ଜିନିୟର (ସିଗନାଲ୍) ଅରୁଣ କୁମାର ମହନ୍ତ, ସେକ୍ସନ ଇଞ୍ଜିନିୟର ମହମ୍ମଦ ଅମିର ଖାଁ, ଟେକ୍ନିସିଆନ ପପୁ କୁମାର। ଦୁର୍ଘଟଣା ସମୟରେ ଏମାନେ ସମସ୍ତେ ବାଲେଶ୍ୱରରେ କାର୍ଯ୍ୟରତ ଥିଲେ।
ଏହି ଦୁର୍ଘଟଣା ଓ ଏଥିରେ ରେଳ କର୍ମଚାରୀଙ୍କ ଭୂମିକା ସମ୍ପର୍କରେ ଅଧିକ ତଥ୍ୟ ସଂଗ୍ରହ କରିବା ପାଇଁ ସିବିଆଇ ଏହି ଦୁଇ କର୍ମଚାରୀଙ୍କୁ ପଚରାଉଚରା କରିବ ବୋଲି ଜଣାପଡ଼ିଛି। ଏପରିକି ବାହାନଗା ବଜାର ଷ୍ଟେସନର ଷ୍ଟେସନ ମାଷ୍ଟରଙ୍କୁ ମଧ୍ୟ ସିବିଆଇ ପଚରାଉଚରା କରିପାରେ। ଯାହାଙ୍କ ନାମ ଏଯାବତ୍ ଜଣାପଡ଼ିନାହିଁ।
ସିବିଆଇର ତଦନ୍ତ ଜାରି ରହିଥିବା ବେଳେ କେବେ ସିବିଆଇ ଏହି ମାମଲାରେ ଚାର୍ଜସିଟ୍ ଦାଖଲ କରିବ ତାହା ସ୍ପଷ୍ଟ ହୋଇନାହିଁ। ତେବେ ଯେଉଁ ରେଳ କର୍ମଚାରୀମାନେ ଏହି ଦୁର୍ଘଟଣା ପାଇଁ ଦାୟୀ ସେମାନଙ୍କ ବିରୋଧରେ ସିବିଆଇ କାର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି ଆଶା କରାଯାଉଛି।
Comments are closed.