ଭୁବନେଶ୍ୱର: ଅକ୍ଟୋବର ମାସରେ ଓଡ଼ିଶାରେ ବାତ୍ୟା ‘ତିତଲି’ ଯୋଗୁ ହୋଇଥିବା କ୍ଷୟକ୍ଷତିର ସହାୟତା ପାଇଁ କେନ୍ଦ୍ର ସରକାର ଅତିରିକ୍ତ ସହାୟତା ରାଶିର ମଞ୍ଜୁର କରିଛନ୍ତି ।
କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହଙ୍କ ଅଧ୍ୟକ୍ଷତାରେ ସୋମବାର ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ଓଡ଼ିଶାକୁ ଜାତୀୟ ବିପର୍ଯ୍ୟୟ ପ୍ରଶମନ ପାଣ୍ଠି (ଏନଡ଼ିଆରଏଫ)ରୁ ୧୦୨୩ କୋଟି ୫୯ ଲକ୍ଷ ଟଙ୍କା ଅତିରିକ୍ତ ସହାୟତା ରାଶି ମଞ୍ଜୁର ହୋଇଛି ।
ଏନେଇ କେନ୍ଦ୍ର ପେଟ୍ରୋଲିୟମ ଓ ପ୍ରାକୃତିକ ଗ୍ୟାସ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓଡ଼ିଶାକୁ ଏହି ଅତିରିକ୍ତ ସହାୟତା ରାଶି ମଞ୍ଜୁରୀ ଲାଗି କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହଙ୍କୁ ଟ୍ୱିଟ୍ଟ କରି ଧନ୍ୟବାଦ ଅର୍ପଣ କରିଛନ୍ତି ।
Thank the High Level Committee chaired by @rajnathsingh ji for approving the additional assistance of Rs 1023.59 Cr. from NDRF for Odisha which had been hit by #CycloneTitli. Had requested shri @rajnathsingh ji to expedite consideration of additional assistance from @NDRFHQ . https://t.co/f25FLCqwBe
— Dharmendra Pradhan (@dpradhanbjp) December 17, 2018
ଗତ କିଛିଦିନ ପୂର୍ବରୁ ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଟେଲିଫୋନ ମାଧ୍ୟମରେ କେନ୍ଦ୍ର ଗୃହମନ୍ତ୍ରୀଙ୍କ ସହିତ ତିତଲି ବାତ୍ୟା ଯୋଗୁଁ କ୍ଷୟକ୍ଷତି ହୋଇଥିବା ମରାମତି କାର୍ଯ୍ୟ ଏବଂ ପୁନଃରୁଦ୍ଧାର କାର୍ଯ୍ୟ ଲାଗି ସହାୟତା ରାଶି ତୁରନ୍ତ ପ୍ରଦାନ କରିବାକୁ ଅନୁରୋଧ କରିଥିଲେ । କେନ୍ଦ୍ର ଗୃହମନ୍ତ୍ରୀ ରାଜନାଥ ସିଂହ ମଧ୍ୟ ଏହା ଖୁବ ଶିଘ୍ର ମଞ୍ଜୁର କରାଯିବା ନେଇ ମୁଖ୍ୟମନ୍ତ୍ରୀଙ୍କୁ ଆଶ୍ୱାସନା ଦେଇଥିଲେ ।
ଓଡ଼ିଶା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏସମ୍ପର୍କରେ କେନ୍ଦ୍ରମନ୍ତ୍ରୀଙ୍କୁ ଡ଼ିସେମ୍ବର ୧୩ ତାରିଖରେ ପତ୍ର ଦ୍ୱାରା ଜଣାଇଥିଲେ । ଏହି ପତ୍ରରେ ନବୀନ ଉଲ୍ଲେଖ କରିଥିଲେ, “ଅକ୍ଟୋବର ୨୦୧୮ ରେ ହୋଇଥିବା ବାତ୍ୟା ତିତଲି, ଏହା ସହିତ ବନ୍ୟା ଏବଂ ମାଟି ଧସିବା ଯୋଗୁଁ ଓଡ଼ିଶାର ୧୭ ଜିଲ୍ଲାର ୧୨୮ଟି ବ୍ଲକରେ ୬୦.୩୧ ଲକ୍ଷ ଲୋକ ପ୍ରଭାବିତ ହୋଇଥିଲେ” ।
ଏଠାରେ ଉଲ୍ଲେଖଯୋଗ୍ୟ, ଏହି ବାତ୍ୟା, ବନ୍ୟା ଏବଂ ମାଟି ଧସିବା ଯୋଗୁଁ ୭୦ ଜଣ ବ୍ୟକ୍ତିଙ୍କର ପ୍ରାଣହାନୀ ଘଟିଥିଲା । ଏହି ପ୍ରାକୃତିକ ବିପର୍ଯ୍ୟୟ ଯୋଗୁଁ ଓଡ଼ିଶାର ୧୭ଟି ଜିଲ୍ଲାର ସମୁଦାୟ ୬୦.୩୧ ବ୍ୟକ୍ତି ପ୍ରଭାବିତ ହୋଇଥିଲେ ।
କେନ୍ଦ୍ର ସରକାରଙ୍କ ଏହି କମିଟି ମଧ୍ୟ ତ୍ରିପୁରା ଲାଗି ୨୬୮.୬୩ କୋଟି ଟଙ୍କା ରାଶି ମଞ୍ଜୁର କରିଛନ୍ତି ।
Comments are closed.