state of emergency: ଜଙ୍ଗଲରେ ଅଗ୍ନିକାଣ୍ଡ; ୧୮ ଜଣଙ୍କର ମୃତ୍ୟୁ , ଜରୁରୀକାଳୀନ ପରିସ୍ଥିତି ଘୋଷଣା କଲେ ରାଷ୍ଟ୍ରପତି

ନୂଆଦିଲ୍ଲୀ: ରବିବାର ଦକ୍ଷିଣ ଚିଲିରେ ଭୟଙ୍କର ଜଙ୍ଗଲ ଅଗ୍ନିକାଣ୍ଡ ସମଗ୍ର ଦେଶକୁ ଥରାଇ ଦେଇଛି। ଅତି କମରେ ୧୮ଜଣଙ୍କର ମୃତ୍ୟୁ ହୋଇଛି ଏବଂ ନିଆଁ ଅନିୟନ୍ତ୍ରିତ ଭାବରେ ବ୍ୟାପିବାରେ ଲାଗିଛି।

ରାଷ୍ଟ୍ରପତି ଗାବ୍ରିଏଲ୍ ବୋରିକ୍ ​​ନୁବଲ୍ ଏବଂ ବାୟୋବିଓ ଅଞ୍ଚଳରେ ବିପର୍ଯ୍ୟୟ ଘୋଷଣା କରିଛନ୍ତି। ପ୍ରବଳ ପବନ ଏବଂ ଭୀଷଣ ଗରମ ଯୋଗୁଁ ଅଗ୍ନିଶମ କର୍ମଚାରୀମାନଙ୍କ ପାଇଁ ନିଆଁକୁ ନିୟନ୍ତ୍ରଣ କରିବା ଅତ୍ୟନ୍ତ କଷ୍ଟକର ହୋଇପଡିଛି। ହଜାର ହଜାର ଲୋକ ଘର ଛାଡିବାକୁ ବାଧ୍ୟ ହୋଇଛନ୍ତି ଏବଂ ମୃତ୍ୟୁ ସଂଖ୍ୟା ବୃଦ୍ଧି ପାଇବାର ଆଶଙ୍କା କରାଯାଉଛି ।

ଅଗ୍ନିକାଣ୍ଡ ଯୋଗୁଁ ୨୦,୦୦୦ ରୁ ଅଧିକ ଲୋକଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତରିତ କରାଯାଇଛି। କିଛି ରିପୋର୍ଟରେ ଏହି ସଂଖ୍ୟା ୫୦,୦୦୦ ପର୍ଯ୍ୟନ୍ତ ରହିଛି ବୋଲି କୁହାଯାଇଛି। ବିପର୍ଯ୍ୟୟ ପରିଚାଳନା ସଂସ୍ଥା ରିପୋର୍ଟ କରିଛି ଯେ ଅତି କମରେ ୨୫୦ ଘର ସମ୍ପୂର୍ଣ୍ଣ ନଷ୍ଟ ହୋଇଯାଇଛି।

ଚଳିତ ବର୍ଷ ଆରମ୍ଭରୁ, ଚିଲି ଏବଂ ପଡ଼ୋଶୀ ଆର୍ଜେଣ୍ଟିନା ନିରନ୍ତର ଗରମପ୍ରବାହ ଅନୁଭବ କରୁଛନ୍ତି। ସମ୍ପ୍ରତି ଆର୍ଜେଣ୍ଟିନାର ପଟାଗୋନିଆ ଅଞ୍ଚଳରେ ଏକ ବଡ଼ ଧରଣର ଜଙ୍ଗଲ ଅଗ୍ନିକାଣ୍ଡ ଘଟିଥିଲା। ବର୍ତ୍ତମାନ ଚିଲିରେ ସଙ୍କଟ ଆହୁରି ବଢିବାରେ ଲାଗିଛି ।